Read Sumi Naga XAKUTHAMI 14 Bible Online

XAKUTHAMI 14 - Sumi Naga bible

XAKUTHAMI 14

¹Ghulo lakhi Samson no Timna lo iqi, eno pano Filistiya limi lakhi sasu kuju thilu.

²Paye akilo idewono papu ngo paza pama vilo hitoi pi, “Filistiyami ilimi lakhi Timna lo ani, liye iloqhiyi ithulu ani. Niye li sasu kulakupu shini shi anike tipau pesu inipu shitsulo.”

³Ikemu papu ngo paza pama no pa iniju, “Noye kushiye ayehkumthami Filistiyalimi pesu onipu shinike kumsu anikya? Noye ni lagha alimi lakhimu phumlave akeshea?” Ikemu Samson no papu vilo pi, “Ino lunishi kutu akeuye noye ighenguno wuno initsulo.”

⁴AMPEU vechewono Samson pelono tipaqo qhuiniju apekeu pa puaza ye vethalumono ake, kughengu AMPEU ye Filistiyami sasu aghushi penikeu tuqhudo chheju ake. Hipa ghuloki lo Filistiyami no Israilmi shou ayeh pe ake.

⁵Tighenguno Samson no papu ngo paza pama sasu Timna lo iqi. Panonguno atsailu vechesu iqi chekelo, pano abongushu lhothe lakhi igha aghikeu chilu.

⁶Paikhavi lono AMPEU kuka no Samson pelo akumto shivepe, eno pano pawu kumsano aneti lakhi suxula akeshi abongushu suxula kututa shivetsu. Ikemu pano kiu mlavekeno tipau ghili papu aza vilo pimoe.

⁷Tishiveno paye ailiu lau wuno li sasu kuptsa eno pano li ju pa love.

⁸Ado kitila thiu Samson ye li sasu kulakupu shiniye idewu. Pano wuchekelo puzuu pano abongushu heqhi pesu qhivekeu alo akhi amqo lakhi ti akithi kumo alou akhi ishino akhingozu aghikeu akichiqhi ithulu.

⁹Pau chhopulo akhingozu epheno ti chu-ghi pa lalo cheve. Tishino papu ngo paza pama lau hami pesu ighino pamaghi tsu pamano ti chuve, ikemu Samson no papu ngo paza pama vilo akhi ngozu huye pano abongushu heqhi vekeu kumo lono lisughi keu tsa kumu pimoe.

¹⁰Papuno ailiu nokilo wu, eno Samson no aghulhu kije lakhi kutope qhi. Tiye lhothemino shichekeu akhuayeh kiqi lono ke.

¹¹Kughou Filistiyami no pa ithulukeno, panonguno apumi shighi pa gholo ngope nike hapuwutsu.

¹²Samson no panongu vilo pi, “Sulekutho lakhi ino nongu vilo pini. Tsalatsa nonguno tipau kiqi hi aghulhu shi akeu atsala tsuni dolono ivilo pilu aye, ino aphikuzu phepheyikeu shighi eno aghulhu lo uchekeu phi shighi nongu lakhi khi tsunike khu ani;

¹³ikemu nonguno tipau kiqi ivilo pitsu mlave aye nonguno aphikuzu phepheyikeu shighi aghulhu lo uchekeu phi shighi itsulo.” Ike panonguno pa vilo pi, “Owu, sulekutho pijulo, ninguno inijuni.”

¹⁴Tileno pano pi, “Tsuchuve chekeu lono hami chukepu shilu; Akumto lono hami ngoniyikeu ipeghilu.” Atsala kuthu kutolo panonguno ahole tipau akiqi phuju amu kumu phuphemlave.

¹⁵Atsala abidini loye panonguno Samson nipu vilo pi, “Okimi vilo sulekutho kiqi inijuno ningu vilo pitsulo. Nono tishimo aye ninguno opukilo ami suve tsuno noghi tipau gholono piti kuqhave penani. Okujo ye hilehi ni tsusu no ni pukaqhiniye shi anikenale?”

¹⁶Ikehu Samson nipu no anhezu ipeghi ghi pa lau wuno pi, “Noye ikimiye amoe! Noye qeti iju kuchhube anie! Noye ikusamiqo vilo Sulekutho lakhi pikemu ivilo tipau kiqi ye pitsumoe!” Pano pi, “Julepi, niye ipu ngo iza pama vilomu ti pimokeno kishipuzu niye ovilo pinikya?”

¹⁷Ike lino atsala tsuni aghulhu shi ake kutolo qeti tipau ghenguno pi auve. Atsala akutsuniu loye pano ahole tipau kiqi li vilo pive, kughengu lino tipau pipeniye pa punaqhi kutu auvekehu. Tileno lino ahole kiqi Filistiyami vilo pivetsu.

¹⁸Tighenguno atsala akutsuniu lo Samson no azuabo lo ilomphi lono, aphughilo timiqono pa vilo pi, “Akhingozu nguno kutau kiuno ngoniyikeu anikya? Abongushu nguno kutau kiuno akumtou anikya?” Samson no pi chile, “Tsalatsa nomu nonguno imshiqu sasu hokidemokeaye, nonguye itehi kutolomu khochile mthano aghini cheke.”

¹⁹Paikhavi lono AMPEU kukano pa pesu mutotoi shivetsu, ipuzu paye tileno Ashkelon lo iqi no timi shighi heqhi pithiveno panongu phi aloke xapewo timi khunoqono pawu sulekutho kiqi pilukeno tipaqo tsuve. Tishiveno paye kiu shivekeno tipau ghenguno ighono pa mlo ide ghi akilo idewove,

²⁰eno pa nipu ye pesu pawu kulakupu lo pa shou kiviu tsuve.