Read Sumi Naga XAKUTHAMI 15 Bible Online

XAKUTHAMI 15 - Sumi Naga bible

XAKUTHAMI 15

¹Ado kitila thiu, Ashothi qhile hu ake ghuloki lono Samson no ane lhothe lakhi pesu pa nipu putsaniye wu; eno pano li pu vilo pi, “Niye inipu zuabolo ilonishi anie.” Ikemu pano papelo ilopemoe.

²Pano Samson vilo pi, “Ino thebei noye li jukuchhube veapi kumsuveno ino li pesu oshou tsuvae. Ikemu li tsunipu no aju akiviu, nono kumsu aghiaye, nono li pafo zuqhulo li lulu nani.”

³Samson no pi, “Ino Filistiyami lau kiu mlanikeno tiye imakho shimla nani!”

⁴Tishi pino paye wuve puzu sher 300 kughaluve. Pano Sher shomhi kinini no tsugha kuqhave tsuno ti kumkho keulo akuluqhe tsughadave tsu.

⁵Tishiveno ti akuluqhe lo ami hesuve tsuno sher kuqhoveno Filistiyami ashothi lulo halesuve tsu. Pano hitoi shino ashothi lukutsu pe kumqo puakeu pitive tsukeu likhi kumono alulo lukhamla no akeqo kumtsu pitileve tsu. Oliv luche ghi pitileve tsu.

⁶Kughou Filistiyamino khuuno hishi shive tsu keapi kighinikile jukeulo Samson pangu Timna lo akeuno Samson nipu pesu pa shou kilo puwove aghikeu ghenguno Samson no hitoi pitileve tsuepi panonguno ithive. Tighenguno Filistiyamino axu ideveno wupuzu atotiu papu kilo ami suve tsuno tile no li pitiqhivepe.

⁷Tishiveke lono Samson no panongu vilo pi, “Nonguno hitoi mla aniaye nighi nongu lau amkhu lumokeloye inaqhoi ngo amla nani!”

⁸Tithiu pano panoqo ihulokeushi lethuve eno panongu kutomo heqhi pithivetsu. Tishiveno paye Etam lo atuxu lo atuki lo wuno tilau ngove.

⁹Filistiyamino ighino Juda lo aghazu shiluno Lehi taun lethuve.

¹⁰Juda lo timiqono panongu iniju, “Kiu shiye nonguye ni le anikya?” Panonguno khichile, “Ninguye Samson tshupesu wuvenike ighi ani, pano kiutoi ningu lau mlakeno tipaphi shi nighi pa lau mlaniye ighi ani.”

¹¹Tileno Juda lo timi 3,000 no Etam tuxu lo atuki lo wuno Samson vilo pi, “Noye Filistiyamiye ningu shou ayehkipeu pi mthake shea? Noye ningu lau kiu mlavetsu akya?” Pano khochile, “Panonguno ilau mlakeu toi nighi tipau tho panongu lau mlave tsuae.”

¹²Panonguno pa vilo pi, “Ninguye otshu sasu wuniye hile ighi ani, tishino okugha pesu panongu ulo phesuve tsunie.” Samson no pi, “Nonguye khilemu nongu kutoshi ye iheqhi pithimoe pi tushoqhilu nanima?”

¹³Panonguno khochile pi, “Moe, ninguye oheqhimoe, ikemu otshu sawo panongu ulo phesuvetsu keu likhi shinie.” Ike panonguno akighi kipili akithe kinino pa phiau pheve tsuno atuxu lono pa khape ighi.

¹⁴Pano Lehi toluke mtsa, Filistiyami no posu pa kudau ighamuku ighi. Paikhavi lono AMPEU kuka no pa shikumtoluve eno akighi kipili pa phi au tsugha puakeu hu ayethili amino pitivekeshi kumu akumchho shimono sutha pevetsu.

¹⁵Tishino pano tipa alo gadaha anileshi thive aghikeu mukhughi lakhi phulu. Pano pawu chhopiqi ti ikhiluno gadaha mukhughi pesuno timi 1,000 heqhi pithivetsu.

¹⁶Ikehu Samson no hitoi phe, “Gadaha mukhughi lakhi pesuno ino timi 1,000 heqhi pithilu; Gadaha mukhughi lakhino ino panoqo amqoshi qhikhave.”

¹⁷Tishiveno pano amkhughi hu vepuwuve. Khileno hishive keno tipau a je pesuno Ramar Lehi[3] ipi kuvetsu.

¹⁸Samson ye ighono tughuthive, ikehu pano AMPEU ku no pi, “Nono tokulu kije hipau pesu itsu; ikemu niye atughu no thiveni cheae eno ayekumthami Filistiyami pelono ikughaluve peniye anikeshea?”

¹⁹Tileno Alhou no Lehi lo ayeghi kubokhu pimhipuza lakhi lhaphetsu eno azuno tipau lo qoipeghilu. Samson no tipau zu yelu no pa tughu ghapiqi luno aghuthi puxulu. Ike azu pekighi-a tipau pesuno Hakhore [4] kuvetsu eno tiye itehi kutolo Lehi lo aphi.

²⁰Filistiyami no tipa ghakhu shou ayehpe cheke ghuloki lono Samson no ampe muku kutolo Israilmi sapheluke.