Read Sumi Naga XAKUTHAMI 19 Bible Online

XAKUTHAMI 19 - Sumi Naga bible

XAKUTHAMI 19

¹Khaghi Israilmino akukau qhimono acheke ghulokilo, Levimi lakhi Efraim ghakhu toghi lo acheke. Pano Juda ghakhu lo Bethlehem lono ilimi lakhi pa nipu amishiu shinike lu,

²ikemu lino pa shou amlo ideveno idechile Bethlehem lo li puno kilo aqhi bidi kutolo ngove.

³Timi huno li putsa kidekudai shino li pelono pa kilo ideghi penike ghenguno li putsa wunikeu kughakutha shilu. Pano pa qeu lakhi eno gadaha kini ishi pa gholo sawu. Tile ailiu no Levimi aki piye, eno kughou li puno pa ithulukeno, pano alokivishi pa sasulu.

⁴Apuno pa pelo tsuikhomo ngolepi auvekehu paye atsala kuthu tile ngove. Tishino pama atuna huye kumtsa chu-sho eno tsala puwolu.

⁵Atsala abidiniye panonguno inaqhe itheno ithughive no chevenikeu shi aghili kutoluve. Ikemu lipu no Leviu vilo pi, “Atughushi kiwala kitila chupaghilo. Kughengu tishikeuno oghenguno akiviu ke. Tishino wulu nani.”

⁶Ike pamano kumtsa iqano kuchukusho shiluve. Tileno lipu huno pa vilo pi, “Oshikimithimu itijighi hile zuveno olo vepiqi lulo.”

⁷Ikemu Levimi huye chevenikeu shiauve lipu no tsuikhomo ngovelopi auvekehu paye itaghi tipaji tile zuve.

⁸Atsala apunguni inaqhe paye chevenikeu shive ikemu itaghi lipuno pi, “Kiwana chupaghilo ipuzu puchouno mu wokepu shilo.” Ikehu pamaye itaghi kumtsa chulu.

⁹Kughou Leviu ngo pa nipu amshiu eno aqeu pano kuthu no cheveniye shivekeno itaghi apu no pi, “Julo, hiye avela shiwo cheae; tighenguno itiji ye hile ngovelo. Pai zumoive nanike ngono adokivi shi puwolo, thoghiu ye itheno ithuno akilo wokepushilo.”

¹⁰Ikemu timi huye tipaji tile zunishi move, ikehu paye pawu gadaha kuma eno pa nipu amshiu ishi sasu Jebus tiye Jerusalem lo wuve.

¹¹Kughou panonguno chesusu Jebusimi kupunu lukeno atsala ilove kichelauno aqeuno ampiu vilo pi, “Ighilo, ningu Jebusimi phughi hipau lo ngoveno itiji hile zuveni.”

¹²Pa mpiu no pichile,”Moe, ningu ye inami phughi khunoqo Israilmi kumo keno hila ngomlae. Ningu ye Gibea lo wumasae.”

¹³Pano highi pi, “Ighilo, pukaputsano Gibea momu Rama tolu aye tikuma khikhiu lomu zulu nani.”

¹⁴Ike panongu no Benjamin yeghi lo Gibea toluke mtsa tsukinhe ilove.

¹⁵Tile panonguno ngoveno tipaji tile zuve. Ike panonguno aphughi lo iloghino kodibo akeulo ngolu, ikemu tipaji khunomu ighino panongu sasumoe.

¹⁶Panonguno tilehi ngo akelono muchomi lakhi alulo huno zumoi wochekeu no tile ighiluno panongu sasu kusholu. Amchou ye inahuuye Efraim ghakhu lono ighikemi ke, ikemu paye itehiye Gibea lo auvekemi shiva (ti Gibea lo kuami qoye Benjamin lagha ke).

¹⁷Pano aghuzumi aphughi lo kodibo akeulo iqa aghikhake hu amchouno hitoi iniju, “Nonguye khilau no ighi eno khilau wuche khanikya? “

¹⁸Levimi huno khochile, “Ninguye Juda yeghilo Bethlehem lo izuuno ningu ki[5] Efraim ghakhu lo idewo che ake. Ikemu khuunomu itiji ningu sasu mono aphie,

¹⁹ningu ye gadaha sala ghi achuqupu aghijini pucheni eno inipu ngo aqeu nikuthu salaghi asho ngo aji ghi pucheni. Ninguno kiu avehupu shikeno ti kumtsu pucheni.”

²⁰Amchou no pi, “Tishiaye ikilo ighilo! Ino nongu tucho mujo tsu nani; nongu ye hilehi aphughi lo kodibo akeulo ngo akevelo.”

²¹Tishino pano panoqo sasu pa kilo wono panoqo wu gadaha achuqupu tsuvetsu. Pa wu inami qono aphi-au qhuvekethiu kuchukusho shilu.

²²Panonguno chu-sho no alokughuno shi ngo akelono aphughi lo timi lhoksamino ighino aki suhu pesu ngoluve. Panonguno ahukikha kukhu eno ighamuku amchou vilo pi, “Itehi ogholo ighikeu timi hilau pipelo! Ningu ye pa sasu ashiaji kuqhani shi ani!”

²³Tileno amchouno khalacheu ipepuzu panongu vilo pi, “Khilemu tishikepu kumoe, ishounoqo! alhoksa kumla hikithipu ghushoghili shikepu kumoe! Timi hipau ye iwu inami ke.

²⁴Julo! hile pa nipu ghi ani eno inga ililhothe ani ino pama sasu khalacheu ipeghi tsunike tilauno nonguno kiu kiu shinishi anikeno nongu ghoshi pe itha lunani. Ikemu ju aphi kumqhupu kumla timi hipau lauye shikevilo!”

²⁵Ikemu timi lhoksami no amchou tsa ini tsumoe. Tighenguno Levimi huno pa nipu amshiu khalacheu pipeveno panongu gholo qhivetsu. Tileno panonguno puthotsu li suqoqhi sasu wo thanau to.

²⁶Atsala ipecheke ghulokiu no liye ti amchou hukikha khilehi li kimi no zu akeno tipau phivilo ighono iluqive. Liye tsukinhe ipeghiveke kutolo tishi ngove.

²⁷Li kimino tipana ithughi puzu ahukikha khaqhi susu pa lalo wuveniye cheke lono pa nipu huye liu chopuwo ahukikha tomlano akulaghi lo ikiqi ngo aghikeu sholu.

²⁸Pano pi, “Ithughivelo, ningu wuveni.” Ikemu kumu khochilemove. Tileno pano li sukumo pilitauno gadaha shou pepukuno pa kilo wove.

²⁹Kughou pano aki tolukeno, pano aki sholokuu ilono azuta chi lakhi ikhilu. Tishino pa nipu phimpi ghitha chighi kini shiveno aleqhi lakhi khi pesu Israil lagha chighikini lau kijevetsu.

³⁰Tipau ithulu kemi kumtsu no pi, “Ninguye khilemu hikithipu chilumphie! Israilmino Ijip qhiveno ipeghi kethiu khilemu hikithipu shiju mphie! Ninguye hipau ghenguno kiu kiu mu shimasae. Hiye kiu shikepu kya?”