Read Sumi Naga XAKUTHAMI 2 Bible Online

XAKUTHAMI 2 - Sumi Naga bible

XAKUTHAMI 2

¹AMPEU wu kungumi no Gilgal lono Bokhim lo ipeghino Israilmi vilo pi, “Ino Ijip lono nongu saipeghi no nongu puasuqo vilo piqhi puakeu yeghilo sailoghi tsu. Ino pi ani, ‘Niye nongu lau Puloshoqhi shi puakeu khilemu hephomo nani.

²Nonguye hipa ghakhulo kughuna aghikemi sasu khilemu puloshoqhi shikevilo. Nonguno panongu kumlla a-qo tuleqhi khave tsulo.’ Ikemu nonguye ino kiu shilo pikeno tipau shitsumono bidelau mlavae.

³Tighenguno itehiye ino nongu vilo pi anike niye nongu gizu lono panoqo hale puwuve tsuni chemoe. Ikemu panonguno nongu ghumi shivepe nani eno panongu lhou mllauve keu huno nongu kitimevepe nani.”

⁴Kughou kumgumi huno Israilmi vilo hipa tsa pikeno panongu kumtsuno qaukhave,

⁵tighenguno hipau-a pesu Bokhim ipi ku tsu.

⁶Joshua no Israilmi pututa lalo puwuveno timi lakhi khino pututa saje shitsu keu yeghi pukha lukhave.

⁷Joshua no xu ake kutolo ye Israilmino AMPEU huthu ache, Joshua thiveke thiu ghi sakiphemi khunoqo no AMPEU no Israilmi lau thime kije mlatsukeu ithulu keno pano kuxu tiviloye AMPEU huthu cheke.

⁸AMPEU qeu Nun nu Joshua ye apunu mpe 110 shi akelono akuxu wove.

⁹Paye Gaash naghuto ahuu Efraim ghakhu lo Timnat Sera pa saje shitsukeu yeghilo qhove.

¹⁰Tipau tiqheli kumtsu thi khaveno tipashelo ipeghikeu tiqhelimiye AMPEU kumsumave eno AMPEU no Israil ghenguno kiu mlatsu keno kumsuma khave.

¹¹Tipathiu Israilmiye AMPEU zulo axine shiuveno Baal mllau khave.

¹²panongu ye AMPEU mllamove, panongu puasuno mlla chekeu Lhou khuuno Ijip lono panongu saipeghi keno tipau pheveno alhou kutau mllauve, panongu suho pesu akeqono mlla chekeu lhou mllauve. Panonguno tipaqo zulo pishiqhouve keu lono AMPEU loghu shikighideve tsu.

¹³Panongu ye AMPEU mllamove eno Baal ngo Ashtar lhouqo mllau khave.

¹⁴Tighenguno AMPEU no Israilmi lau ighono axu ideveno suxakuchumi pelo le ighipe no panongu kuakini lipuwuve pe. Pano ghumiqo pelono panongu qhasuluvepeno Israilmi ye kiunomu panongu sushokulupu shimove.

¹⁵Pano tishi nanipi panongu vilo pipua keu toi , panonguno aghushiqalo wukeu kumtsulo AMPEU no panongu mithiuve. Panongu ye ighono amlo iju khave.

¹⁶Tishino AMPEU no Israilmi lau xakuthami puwu tsu no suxakuchumi launo panoqo xaphe tsu.

¹⁷Ikemu tishimu Israilmiye panongu xakuthami tsa initsumoe. Israilmiye AMPEU lau amlo tsumoveno alhou kutau mllau khave. Panongu puasu ye AMPEU zahkutsu aghokulu shiche, ikemu tiqheli akitheu ye tipaqo shitsumove.

¹⁸Kughokughomu AMPEU no xakuthau lakhi tsu aye, AMPEU no pa kuphuno aghumi ulono timiqo xaphe luno pa kuxu tivilo aloinolu chepeke. Ghichhe ghimeno qhasupe akeu lono igha khuke ghenguno AMPEU no panongu kimiyeve cheke.

¹⁹Ikemu xakuthau no thiveke mtsa timiqoye itaghi idechile aqau kuxulo ilove eno azuu tiqhelimi nguno alhoksa shikitheuve. Panonguno alhou kutau mllauveno amlo thonhei panongu lhoksa laghilo xu acheuve.

²⁰Tishike lono AMPEU no Israilmi lau muqhu-mza axu ideveno pi, “Tiqheli hipauye Puloshoqhi khikhi ino panongu puasu vilo shilopi keno tipaqo kubovae. Kughengu panongu ye igholumovae,

²¹tighenguno nighi Joshua kithi thiuye ayeghi hipaulo kughuna akemi shiayeh lakhimu halepuwu tsumo nani.

²²Ino tipaqo peithano Israilmi ye panongu puasuno shiche ketoi ilaghi zusu wunike mokeno shiyeh kutami hipaqo veche wono ghukeju ani cheni.”

²³AMPEU no shiyeh hipaqo pelo ayeghi tipau lo ngo acheuve penikeu pulovetsu; Joshua pelono tipaqo shou tokulu shiluve penikeu tsumove momu Joshua thive ke thiumu paye tipaqo hale puwuve tsunikeu shimove.