Read Sumi Naga XAKUTHAMI 20 Bible Online

XAKUTHAMI 20 - Sumi Naga bible

XAKUTHAMI 20

¹Israil yeghi ahuu Dan lono iqi Bersheba kuto, kipelau Gilead yeghi kuto lono Israilmi thaqu ye aghushinikeu kutothuve. Panongu kumtsuno Mizpa lo AMPEU zulo kumtsa amqo shi hekutsulu.

²Israil lagha lo sakiphemi kumtsu hi Alhou wu timino kumqo ngokeu alo wo ngokelo aghushimi pano 4,00,000 kutolo hekutsulu.

³Benjamin lagha ghi Israilmiye kumtsu Mizpa lo hekutsu pesu kumqo anipi keu chilu. Israilmino iniju, “Kishishino hi axekusu angusu kumla shivekeno ni vilo pilo?”

⁴Levimi khuu nipu ghiqhi pithive keno pano khochile pi, “Inipu ikujo Benjamin yeghi lo Gibea lo izuwuno tile zu ake.

⁵Gibea lo timiqono ighi no ilethuve eno putho lono aki suhupesu ngoluve. Panonguye ipithiveni keu shi ighie; ikemu shimlaveno inipu sazuve tsuno liye tipau lono thive.

⁶Ikehu ino li phimpi ikhilu puzu ghitha chighi kini shiveno aleqhi lakhi khi pesu Israil lagha chighikini lau kijesuve tsuke. Timi hipaqoye ningu gholo alhoksa mithemokeu kumla shisuve tsu ake.

⁷Nongu hile ngo akeqo kumtsu Israilmike, tighenguno ninguye hipau mkhu kiu shimasa kya?”

⁸Timi kumtsu puthugho ithughino pi, “Ningu aphiki lo aghina, aki kuchou lo aghinamu akiu idewomae.

⁹Ningu ye hi shimasae: Ningu asaqhi juno timi khami pelono Gibea leju pemasae.

¹⁰Israilmi saje chighi lo saje lakhi ye ghushimi ghenguno achuqupu tsukeu shimasa, eno kutamiqo no wupuzu Gibea aghime tsu kepu kughengu panonguno Israil lo mithekumo kumla mlave tsuae.”

¹¹Ikehu Israil lo timiqo kumtsu akupughu akimiji lakhi shilukeu ye wuno taun tipau levetsunikeu shilu.

¹²Israilmino aghinimi hapesu Benjamin yeghiqha kumtsu lo puwuno ishi piwupe, “Nonguye hi axekusu angusu kumla shivekeu ye kiu ghenguno kya?

¹³Itehi Gibea lo timi khunoqono alhoksa kumla shikeno tipaqo niulo phesuve tsulo, tishi aye nino tipaqo heqhi pithiveno alhoksa kumla hipau Israil yeghi lono ikhipeveni ke.” Ikemu Benjamin lo timiqono Israilmino tishi piamu kumu atsa initsumoe.

¹⁴Benjamin yeghiqha lo aphughi lo kuami kumtsu Gibea lo ighino Israilmi sasu aghu shinikeu kutouve.

¹⁵Tipa tsalani panonguno aphughiqo lono ghushimi 26,000 kukutsulu. Tinguno alau Gibea lo kihikusumi xukuami gholono timi pakutakemi pano 700 kishephelu eno tipaqoye kumtsu piyiu sulami qoke. Panongu kumtsu asalothi pahi shi aghimu vezumono atu vepuwo kelo veku chekeqoke.

¹⁶

¹⁷Israilmiye qokiphe luvekemi ghushimi 4,00,000 kutolo hekutsu pe ngolu.

¹⁸Israilmi no mllache keu a Bethel lo wuno tileno panonguno Alhou vilo iniju, “Khikhiu lagha paghino Benjamin timiqo lethu paghini kya?” AMPEU no khochile, “Juda lagha paghino lelo.”

¹⁹Tighenguno Israilmino tishiwo thoghiu Gibea phughi phivilo aghazu shinike ghenguno wukhave.

²⁰Panonguno Benjaminmi wu ghushimi lethu eno ghushimi pesu aphughi kudau jupuwo ghi ngokhe luvepe.

²¹Benjamin mi wu ghushimi khalacheu ipeghi puzu tipa tsala lo likhino Israilmi ghushimi 22,000 heqhi pithi vetsu.

²²Tileno Israilmino akumlla-a lo wuno AMPEU zulo kijiliu kutolo muloqa. Panonguno pa iniju, “Ninguye itaghi wuno nithikuzumi Benjaminmi sasu aghushikepu keomokya?” AMPEU no khochile, “Tishilo.” Ikehu Israilmi ghushimi mtokithe luno puzuu wovekeu tsalalo shiketoi panongu wu ghushimi pesu thosu alo a-a kutope ngokhe.

²³

²⁴Panonguno wuno akiniu Benjaminmi wu ghushimi sasu aghushi.

²⁵Itaghi Benjaminmino akiniu Gibea hechesu ipeghino itehiu loye Israilmi qokiphe luvekemi pano 18,000 heqhi pithivetsu.

²⁶Tishike lono Israilmi kumtsu Bethel lo wupuzu mloqa. Panonguno AMPEU zulo iqa eno tipani kijiliu shiveke kutolo kumu chumo. Panonguno Kuposhukeu Ghakishi kumlla ngo akuchopu Piti mllakeu ghakishi shipesu AMPEU zulo tsulu.

²⁷Alhou wu Puloshoqhi Bohu ye tipa ghulokilo Bethel lo acheke, eno Fineha, Eleazar nu Aron tilinu no tipaulo ampi shitsu acheke. Timiqono AMPEU vilo iniju, “Ninguye wuno ningu thikuzumi Benjaminmi sasu aghushilo pikeo ikeo shikevilo pi anikya?” AMPEU no khochile, “Aghushilo thoghiu ye panongu shou tokulu pesu ino nongu tsuni.”

²⁸

²⁹Ikehu Israilmino ghushimi khami Gibea homxa kughutshupe qhive.

³⁰Tishino atsala akuthuni loye Benjaminmi ghushimi sasu aghushithu no pano ghushimi khami pesu Gibea lepenikeu shi a-a kutope ngokhe luvepe, puzuu shiketoi shive.

³¹Benjamin no aghushinike khalacheu ipeghi eno aphughi lono putosulo wukhave. Puzuu toi panonguno Bethel ngo Gibea laghi eno ghasaqha lo ngo akhakeqo Israilmi heqhi thuve. Kumtsu kuqhakelo Israilmi shighi kutolo heqhi pithivetsu.

³²Benjaminmino pi, “Ninguno azuu shiketoi panongu theqhilu anie.” Ikemu Israilmino amqu shino poveke ghili shino Benjaminmi ghushimi pelo panongu hakuqo susu aphughi lono putosu lo ha ighipekeu muqu shive.

³³Tishino Israilmi wu ghushimi amqo akichiu sunhechile pesu Baal Tamar lo kumqolu, ipuzu timi khunoqo Gibea suhope ngo akeno tipaqono pututa kughutshu-a atunhepho lono ipeghino aphughi homxa bothaluve.

³⁴Israil lo kishekiphe akiqheu pano 10,000 no Gibea lethuve eno tipau ghushi ye ighono kumsapu shi aghushie.

³⁵AMPEU no Benjaminmi ghushimi shou tokulu pesuno Israilmi tsu veke. Israilmino tipa tsalani pano ghumi 25,100 heqhi pithivetsuke.

³⁶Tithiu Bemjaminmi ye tomlave pikeu ithilu. Israilmi ghushimi amqo akichiu ye Benjaminmi lau no idechile ghive, kughengu panonguye pano timi Gibea suhope itshu ngo akeqo shou pukhube pesu ae.

³⁷Timi hipaqono mtazu posu Gibea kudau powu; eno panonguno aphughi lo lhasayi ilono tile aghikemi kumtsu heqhivetsu.

³⁸Israilmi ghushimi amqo akichiu ngo timi kughutshu pua keqo no amchi lakhi shipua. Ike tiye panonguno kughou taun lono amchhi phoboi ipeghikeu ithuluni keno,

³⁹Israilmi aghushiqa lo ngo akeqono tipau mtsa lono aghu shithunikeu shipe kuchughu pua. Tishi aphi lono Benjaminmino Israilmi shighi kutolo heqhi pithivetsu. Panonguno panongu dolo hitoi pikile, “Ninguno puzuu toi panongu theqhi toluve ala.”

⁴⁰Tishi akelono amchi shipuakeu ipeghi, tiye amchhi phoboi ketoi ti taun lono phoipeghi. Ikehu Benjaminmiye panongu thiu jupuwono aphughi kumtsu ami iqu ipeghikeu ithuluno akumzave.

⁴¹Tileno Israilmi no xatsughu ighi keuloye Benjaminmi ye akumsa lono kichimamaive, kughengu panonguye puhaveni chenipi ithive.

⁴²ike panonguye Israilmi launo idechile susu aluzaqha kudau pokhave, ikemu panonguye pokakulupu shimlave. Kughengu panonguye Israilmi wu ghushimi akichiu mqo ngo ti aphughi lono ipeghi kemiqo mta dolono hasuno kughalukhave, tishino panoqo kutsavetsu.

⁴³Israilmino aghumi khathaluve, kitilamu ngomono panongu hasusu Gibea kipelau kutolo hahu eno panonguno tishi hachekelo heqhi pithive ghi hawuke.

⁴⁴Ikehu Benjaminmi ghushimi 18,000 kutolo heqhi pithivetsu.

⁴⁵Kutamiqo no Rimon Tuqu kudau pove. ikemu ti kudau pocheke lono panongu 5,000 ye ala lono heqhi pithivetsu. Tishino Israilmino Banjaminmi Gidom kutolo hasusu wuno 2,000 heqhi pithive tsu.

⁴⁶Tipa tsala lo likhino Benjaminmi wu ghushimi amlo kumtomi panongu kumtsu kuqhakelo 25,000 kutolo heqhi pithivetsu.

⁴⁷Ikemu timi 600 ye pokaluveno panonguye Rimon Tuqu kudau wuno tilehi aqhi bidi ngolu.

⁴⁸Israilmino ide ighino Benjaminmi achili shi aghikeqo kiptimi, totimi, anuli eno lhoxu kumtsu heqhi khavetsu. Eno tipau hokumxa lo taun kumtsu pitilevetsu.