Read Sumi Naga XAKUTHAMI 21 Bible Online

XAKUTHAMI 21 - Sumi Naga bible

XAKUTHAMI 21

¹Tipathiu Israilmi Mizpa lo kumqo ngono AMPEU lau ashoqhi shilu: “Ningu khuunomu ningu ngaqo pesu Benjamin mi kilo kulapuwumoe.”

²Ikehu Israilmiye Bethel lo wupuzu Alhou zulo kijiliu kutolo tishi ngolu. Panongu kumtsu ighamuku anhezu pijighi pi,

³“AMPEU Israil Lhou, kushiye hikithipu shivepe kya? Kushiye Benjamin lagha ye Israil lono have peniye kutoaya kya?”

⁴Thoghiu inaqhe itheno timiqoye akipti kumlla-a lakhi shino tipau shou kuposhukeu ghakishi kumlla ngo akuchopu piti kumllavekeu ghakishi shipesu tsulu.

⁵Panonguno iniju, “Israil lagha dolo khuno laghano Mizpa lo AMPEU zulo kumqo ngokelo wumove keu akeshea?” (Panonguno ighono mishishei keu shoqhi chukeuye khuu khuumu Mizpa lo wumokeu ye heqhi pithivenikeu shipuae.)

⁶Ikehu Israilmiye panongu thikuzumi Benjaminmi ghenguno amlo imeveno pi, “Ishino Israil lagha gholo lakhiye puhavae.

⁷Ninguye Benjaminmi khunoqo achili shi anikeno tipaqo nipu khilau luwu tsuni kya? Kughengu ninguno AMPEU zulo mishishei tushoqhive keuye ningu ngaqo pesu panongu kilo kula puwo moni keu shoqhi shi puani.”

⁸Kughou panonguno kighinikile jukeno tilehi Israil lagha dolo Gilead yeghilo Jabes lagha ye khuunomu Mizpa lo kuhokelo wumo keu phupheluve.

⁹Tilikhi kumono ghushimi aje kukelo ghi Jabes laghaye khunomu khochilemo.

¹⁰Tighenguno Mizpa hoho vechewono timi amlokivimi pano 12,000 hapuwuno hitoi ahza tsupuwu, “Jabes lo kiptimi totimi eno anuli khumu qhikevino heqhi pithikhavelo.

¹¹Kiptimi totimi kumtsu khuuno atathe kumove akeno tipaqo kumtsu heqhi khavelo.”

¹²Jabes lo kuamiqo dolo ili lhothe pano 400 phuphelu, ikehu panonguno Kanan yeghi lo Shilo ghazulo panoqo saghilu.

¹³Tithiu ahoho lono Benjaminmi Rimon Tuqu qhalo ngo akemi vilo aghukishi ashekha shivae pikeu sutsa pithi puwu.

¹⁴Tileno Benjaminmi ghi ide ighi ipuzu Israilmi kutamiqono Jabes lono ghiqhi khamono saghikeu ilimiqo hu pesu Benjaminmi tsuve. Ikemu tino panongu kumtsu ghenguno lukumkha shimove.

¹⁵Timiqoye Benjaminmi ghenguno amlo save kughengu AMPEU no Israil lagha kuqha pesu achekeu kubovetsuke.

¹⁶Ikehu sakiphemi Hoho lono pi,”Benjamin lagha lo totimi ye kuhavae. Ipuzu kiptimi achili shi akeqo sala anipu khilau luu tsuni kya?

¹⁷Israil ye pa lagha chighi kini achekeu hu lakhimu puhave kepu kumoe. Benjamin lagha pelono xulupe nike ghenguno ninguye alaghi phuju masae,

¹⁸ikemu panongu peloye khilemu ningu ngaqo sasu kulakupu shipe kepu kumoe, kughengu ninguno nilikhi ningu shou khuukhumu ninga pesu Benjamin lagha sasu kulakupu shikeuye angsu pa shou ikupeni pi tushoqhi vae.”

¹⁹Tileno panonguno kumsuve, “Ampelo shichekeu AMPEU pinye Shilo lo kuhochekeu kuhoni cheae.” (Shilo ye Bethel ahuu ake eno Lebona apeuke, Bethel ngo Shekem kuma dolo alaghi ajeu acheke)

²⁰Panonguno Benjaminmi vilo pi, “Wuno atsayili lo itshuluvelo

²¹eno chheju alo. Kughou Shilo limiqono apinye ghulokilo ilhenike khalacheu ipeghini keno, nongu ghi atsaili lono khalacheu ipeghilo. Nongu lakhi khino ilimi lakhi khi anguka lono nongu nipu shikepushi tsuqu luvelo eno li sasu nongu gholono Benjamin ghakhulo sawuvelo.

²²Tsalatsa panongu punoqo momu apelimiqono nongu lau ighino tishimlake ipi aye nonguno ishi pilo, Kimiyeno ningu pelono panongu sa apelo, kughengu ninguye aghukishi qa lono ningu nipu shinike ghenguno nongu launo ikhisuwuve tsu amoe. Momu nonguno panoqo pesu mu ningu tsu amoe, ikehu nonguye nongu shoqhi kubovapi kumsu pimi kevilo.”

²³Ikehu Benjaminmiye hitoi shi; panongu lakhi khino ilimi khunoqo Shilo lo ilheniye ighikha keno tipau lono pututa nipu shinikeu kisheluno tsuqupe sasu pokhave. Tishino puzuu pano ghakhu lo wuveno panongu wu taun qo shi kitheluno tilau xuukhaveke.

²⁴Tipau mtsa lono Israilmi kutamiqo ghi pututa alimi alagha phususu wuveno pututa tinhemgha pighilu khave.

²⁵Tipau ghulokilo Israil lo akukau kuhano acheke. Kumtsu no pututa chipiu kiqi lono aghoshi xu ache.