Read Sumi Naga XAKUTHAMI 3 Bible Online

XAKUTHAMI 3 - Sumi Naga bible

XAKUTHAMI 3

¹Tishi kehu AMPEU no ashiayeh hami thosulo khilemu Kanan lo aghushi chemokeqo pelono Israilmi peju penike tipa yeghilo qhivetsu.

²Pano hi shikeuye Israilmi tiqheli lakhi khi pelo aghukishi ghili shikalu penike ghenguno thosulo khilemu aghu shiwu jumokemi qophe tsuniye shike.

³Tiye Filistiya phughi pungu lo Kananmi, Sidoniyami eno Havimi Libanon naghuto lo kughuna kuami Ball Hermon to lono Hamat Kita kutolo akemi pelo Israilmi ghakhu lo ngovepe ke.

⁴Panongu pelo Israilmi lau pekuju lakhi shipeniye ke tishikeu lono Israilmiye kuchouno AMPEU zahkutsu panongu puasu Muse vechewo tsu keu aghokulu shinani ke mo keno peju niyeshike.

⁵Tighenguno Israilmiye Kananmi, Hatimi, Amarimi, Perizimi, Havimi eno Jebusimi hipaqo gholo kitekungo kughunauve.

⁶Panonguye panoqo sasu kululeuveno panongu lhouqo mllau khave.

⁷Israilmiye AMPEU panongu Lhou kumsumaveno pa lau axine shive puzu Baal eno Ashera lhou mllauve.

⁸Tileno AMPEU no Israilmi lau ighono amlo ideveno Mesopotamia lo akukau Kushan Rishathayim pelo panongu leluvepe. Panongu ye ampe tache kutolo paqholo acheuve.

⁹Tishike lono Israilmi AMPEU lau igha khu eno pano timi lakhi pelo panongu kuqho phe tsupenikeu puwu. Timi tipau jeye Othniel ke, paye Kaleb thikuzuu Kenaz nuke.

¹⁰AMPEU ghunguno pa shou ighi eno paye Israilmi sakipheu shiluve. othniel no aghu shiwu kelo AMPEU no Mesopotamia kukau shou tokulu shilupe.

¹¹Tipa yeghiqhalo ampe lhobidi kutolo alokughuno shi ache eno tithiu Othniel ghi thive.

¹²Israilmiye itaghi AMPEU zulo axine shive. Tighenguno AMPEU no Muab lo akukau Eglon pesu Israilmi nguno akumtou shivetsu.

¹³Eglon no Amunmi ngo Amalekmi gholo sukuqhano Israilmi sasu aghushi no toluve eno Jerikho amsabo phughi ipi chekeu leluvetsu,

¹⁴Israilmiye ampe chighi tache kutolo Eglon qholo acheuve.

¹⁵Tileno Israilmino AMPEU lau ighamuku khu eno pano timi lakhi panongu kuqhophe tsupe nike puwutsu. Timi huye Ehud ke, a-u piyiu sulami lakhi ke, paye Benjamin lagha lono ighikemi Gera nuke. Israilmino Muab kukau Eglon lau agho pe pa tsu peniye Ehud hapuwu.

¹⁶Ehud no azutakihi akushulau miter tuxa puto-puto tsughaminheyi keu pewu. Pano aphi qhouno tipau pa yiku ajeu chhepuluve.

¹⁷Tishino pano agho pesu Eglon aqu chhibochhilei keu tsuni ye wu.

¹⁸Kughou Ehud no agho pa tsuvekeno pano ti agho xapusu chekeqo vilo akilo idewovelo pive.

¹⁹Ikemu Ehud ye Gilgal phivilo atu xipuakeu phivilo sutsughuluve no Eglon lau idewono pi, “Akukau akijeu, niye ovilo tuqhou tsa pikepu shi ani.” Tighenguno akukau no pa qemi ahza tsuve, “Nikujo likhi ngovepelo!” Ikehu aqemi kumtsu khalacheu ipekhave.

²⁰Ike akukau no pa likhi ngochekeu kunguu chebolo iqa akelono Ehud no pa lau ighino pi, “Alhou launo ighikeu tsa niye ovilo pikepu shi ani.”

²¹Ehud no pa-u piyiu no azutakihi ikhilu puzu akukau kivelo chuxusuvetsu.

²²Azutalaghi ghi kumtsu ilokha chuxusuvetsu kehu athano azuta kihi kumtsu kuxakha pe ngove. Ehud no akukau kive lono azuta sujoqhive tsumokehu kighinolino pa pukhu kuma dolono ijunanashi ijoqiae.

²³Tishiveno Ehud no idechilewo pa thiu ahukikha khave no tipaqo alou khathape tishi qhiveno khalacheu ipeno cheve.

²⁴Aqemiqono ighi eno ahukikha kha puaghi keu ithulu ikemu panonguye akukau no tishi khaveno aki alou pa likhi akulho qhi ngo ani kughashi kumsuve.

²⁵Panonguye pa kheju kepu thaqhu ngo kheju akemu ahukikha khaqhimo mitheve kehu panonguye akhadu ikhiluno aki khaqhilu. Ikelo panongu mipeu ye aghuza lo ikiqi thive aghikeu ithulu.

²⁶Panonguno khe akelono Ehud ye pokaluve. Paye atu xipuakeu hechesu Seira lo pove.

²⁷Pano Efraim ghakhu toghi toluke mtsa afuko ighape Israilmi pelo aghu shipenike kutughu; tishino pano sasu ato lono chhiliu kudau panongu saiqi.

²⁸Pano panongu vilo pi, “Ipapelo! AMPEU no nongu ghumi Muabmi shou tokulu pesu nongu tsuvae.” Ike panongu ye Ehud papesu chhiliu iqighi eno Muabmino Jordan kathaniye akeu alono panongu kugha luve; timi lakhimu Jordan katha ikupemono kughalu khave.

²⁹Tipa tsalani panonguno Muabmi ghushimi kivimi 10,000 kutolo pithive tsu; panongu lakhimu pokamlave.

³⁰Tipa tsalanino Israilmino Muabmi theqhiluveno tipa ghakhulo ampe lhotache kutolo alokughuno shi ache.

³¹Tipashelo sakipheu xakuthau ye Anat nu Shamgar ke. Pano amshitsu hechekeu yisahukusu pesu Filistiyami 600 heqhi pithive tsuno Israilmi xalutsuke.