Read Sumi Naga XAKUTHAMI 4 Bible Online

XAKUTHAMI 4 - Sumi Naga bible

XAKUTHAMI 4

¹Ehud thiveke thiu Israilmiye itaghi AMPEU gizulo axine shive.

²Tighenguno AMPEU no Kananmi kukau Hazor phughi lo akukau Jabin pelono panongu leluvepe. Pawu ghushimi shou zahtou ye Sisera, Haroshet Juda kumomi huno shi ake.

³Jabin ye ayino shikeu khurkulu 900 kutolo acheke, pano Israilmi shou ampe muku kutolo ayikusa eno kiyimto keu lono ayehpeche. Tishike lono Israilmino AMPEU lau akukuphu ghenguno igha khu.

⁴Tipa ghulokilo Lapidot nipu Debora ye tungukulimi lakhi shiche eno lino Israilmi ghenguno xakuthau kumla shi ake.

⁵Efraim ghakhu tolo Tama ngo Bethel kuma dolo lino amsabo hami qholo ngoche, tishino Israilmino li lau ighino liwu kughakutha luche.

⁶Ghulo lakhi lino Naftali lo akeu Kedes phughi lo ngochekeu Abinoam nu Barak kuno pa vilo pi, “AMPEU, Israil Lhou no ahza hipau otsu ani: ‘Naftali ngo Zebulun dolono timi 10,000 kisheluno panongu sasu Tabor to lo sawulo.

⁷Ino Jabin wu ghushimi shou Zahtou Sisera pelono osasu Kishon Ghoki lono aghu shijupeni. Paye pawu khurkulu eno ghushimi ani, ikemu pa shou tolupe nikeu kuka ino otsu nani.’ ”

⁸Tileno Barak no khochile, “Nono isasu wuaye nighi wuni ikemu nono isasu wumoaye nighi ilikhi ye wumoe.”

⁹Lino khochile, “Alo, ino osasu wuni, ikemu tishiaye tokulu ye oje shimae, kughengu AMPEU no Sisera pesu topumi lakhi ulo phesuve tsuni cheni.” Tishino Debora no Barak sasu Kedes lo wu.

¹⁰Barak no Zebulun ngo Naftali lagha Kedes lo ku-su eno timi 10,000 no pa papesu wu. Debora ghi pa gholo wu.

¹¹Tishi akelono Kenimi Heber ipi keuno pa phiki Zananim lo aphisubo phivilo shipe qhilu. Ike paye Kenimi gholo no kajosusu wuveke, hi Kenimiye Muse ngukishiu Hobab polo kughukomi ke.

¹²Kughou Sisera ye Barak no Tabor tolo ikuvae pikeu ithivekeno,

¹³pano pawu ayi khurkulu 900 eno pawu timiqo ku-kutsuno Judakumomi Haroshet ipikeu lono Kishon ghoki lo puwuve.

¹⁴Tileno Debora no Barak vilo pi, “Wulo AMPEU no osache nani! Ishiye pano opelo Sisera shou tolupe nike otsuvae.” Ike Barak no Tabor to lono pawu timi 10,000 sasu iqive.

¹⁵Kughou Barak no pawu ghushimi sasu lethu keno AMPEU no Sisera ngo pawu ayi khurkuluqo ngo timiqo kumtsu lau kubang keu puwuvetsu. Ike Sisera ye pawu khurkulu lono ilhe iqighiveno apukhu lono pove.

¹⁶Barak no khurkulu ngo Judakumomi Haroshet wu ghushimi eno Sisera wu ghushimi kumtsu hasasu wuno ghiqhi pithikhave tsu. Timi lakhimu ghumono pithivetsu.

¹⁷Ikemu Sisera ye posusu ighino Kenimi Heber nipu Jael phiki lo ilove, kughengu Hazar lo akukau Jabin ngo Heber lagha dolo kulakishi achekehu.

¹⁸Jael no khalacheu ipeghino Sisera sasu kushono pavilo pi, “Sholokuu iloghilo akijeu; iphiki bocholo iloghilo, kumu msakevilo.” Kuchono pano sholokuu ilo eno lino alashelo aphi nhaqhi chekeu phi thiu pa kusupe qhive.

¹⁹Pano li vilo pi, “Kishima azu ipiye lo; niye tughuthi ani.” Ikehu lino ashiyikono shikeu jolabo lono akichhizu lesuno pa piye no itaghi pa kughutshuve.

²⁰Tileno pano li vilo pi, “Aphiki kulaghi lo puthugho ngolo eno khualano timi khami hilehi anike shelapi iniju aye kuhae ipivelo.”

²¹Sisera ye ighono akulho shiveno zuqei huve. Tishi ake lono Heber nipu Jael no aghihesu lakhi eno aphiki yetsakeu yikumtsu ikhilu puzu mkhano pa phivilo wuno pa heqhi pithiveno aphiki yetsakeu yikumtsuno pa kutsulo jipesu no ayeghi lo yetsave.

²²Kughou Barak no Sisera phusu ighikeno Jael no khalacheu ipeghino pa sasu kushono pa vilo pi, “Hilau ighilo! nono phuchekeu timi hu ino opiyeni.” Ike pano li sasu sholokuu ilo eno Sisera ye kuchono yetsakeu yikumtsu huno pa kutsu lo yepili pesu ayeghilo ikiqi thive aghikeu ithulu.

²³Tipa tsalani no Alhou no Israilmi pelono Kananmi kukau Jabin shou tokulu shilupe.

²⁴Panonguno Jabin kutsalumo ke kutolo pa hache.