Read Sumi Naga XAKUTHAMI 5 Bible Online

XAKUTHAMI 5 - Sumi Naga bible

XAKUTHAMI 5

¹Tipa tsalani Debora ngo Barak khuu Abinoam nukeno pama no hipa le pheke:

²AMPEU sheqhelo! Israilmi ye aghushinike pulo kuqha luke; Timiqono alokivishi akutoshino wunikeu shilue.

³Inijulo, nongu kukamiqo! Nongu ayehkipemi amlo tsulo! Israil Lhou AMPEU lau ino ale pheni eno alebo ighani.

⁴AMPEU, nono kughou Seir naghuto qhivekeno nono kughou Edom ghakhu lono ipeghikeno, ayeghi sukini, eno atsutsu lono tsutsughu iqighi. Iyei, khungkusu lono azu leqhie.

⁵Naghutoqono Sinai to MPEU zulo, Israil Lhou eno AMPEU zulo ithae.

⁶Anat nu Shamqar ghulokilo Jael ghulokilo, Kemel loji ye ayeghi heche wumoe. aghuzumiye alaghi bidelau no wuche.

⁷Debora, Israilmi taunqo ye qhepu qheghuleive; nono ighimoke kutolo panongu ye abokumsa shi ae. Israilmi paza lakhi toi nono ighitsue.

⁸Israilmino kutau lhou kithe kisheluve ikehu aghakhu lo aghukishi ipeghive. Israil lo timi 40,000 wuke dolo khuwano azuto momu angupa pewu keshea?

⁹Imlo ye Israil lo zahkutsuu gholo eno timi khunoqo alokivishi akutoshino wukha keno panongu gholo anie. AMPEU sheqhelo!

¹⁰Nongu gadaha kimiye lo iqano chechekeqo hipau ghili pilo, eno apukhu lono ala chechekeqo khile khile wumu hipau ghili pesu pitsulo;

¹¹Inijulo! Azukikhe homxa pesu timi aqhano AMPEU wu tokulu ghili lhe akhanie, Israilmi wu tokulu pi anie! Tishipuzu AMPEU wu timiqono panongu phughiqo lono chesu iqighi khae.

¹²Ithulo, Debora, ithulo! Ale lakhi phe sasu wulo! Azuu wulo, Abinoam nu Barak, nono leluvekemi sasu chevelo!

¹³Tishino aghokulumi panongu sakiphetomi lau iqighi khae; AMPEU wu timiqo ghi pa lau iqighi khae, aghushi nike kutopesu.

¹⁴Panonguno Efraim lono akhila lo ighi, Benjamin eno pa lagha papesu; Zahkutsumi ghi Makhir lono iqighi khae, Kijemi ghi Zebulun lono iqighi khae.

¹⁵Isakhar lagha lo sakiphetomi ghi Debora sasu ighie iyei, Isakhar ghi Barak ghi ishi ighie, eno panonguno pa papesu akhila kuto lo wue. Ikemu Ruben laghaye kije kututa shive; panongu ye ighinikeu kughakutha shimlave.

¹⁶Kushiye panonguye bheri sasu athiu ngokhave kya? Iyei, Ruben laghaye kututa shive; panonguye ighinikeu kughakutha shimlave.

¹⁷Gad laghaye Jordan kipelau ngove, eno Dan lagha ye zukilu lo ngove Asher laghano azughi muku lo ngokhave; panonguye azughi muku kuxa lo ngove.

¹⁸Ikemu Zebulun ngo Naftali laghaye aghushiqa lo panongu kuxu vekusa shie.

¹⁹Megido ghoki phivilo Taanak lono kukamiqo ighino aghushi; Kanan kukami ghi aghushi, ikemu panonguye tsandiyi suwuvetsu moe.

²⁰Atsutsulo ayepuqono kichighi; panonguno azughi kathawu kichelo, panonguno Sisera sasu aghushi

²¹Kishon lo azu yimi ipeghikeu no panongu yipewu Kishon ghoki chhekide qowukeu lono. Ino akumto lono chewuni, azuu huni!

²²Tishino khurshi no akumthu shi pokeu lono panongu pukhu mutsuno ayeghi lo neda susu powu.

²³“Meroz ghusholo!” pi AMPEU wu kungumino pi ani, tile xukuami ghusholo! Panonguye AMPEU kuphunike ghushimi toi aghushi pa kuphu nike ighimoe,

²⁴Kumtsu nguno angukiviu totimi huye Jael ke. liye Heber Kenimi nipu huke kumtsu nguno angukiviu totimi huye aphiki lo ngo ake.

²⁵Sisera no azu khukemu, lino akichhizu pesu pa tsuke; abohu jukivi lono lino akichhizu sughi tsuke.

²⁶Lino au halauno aphiki yetsakeu yikumtsu ikhilu akumla kishimino pechekeu au halauno aghihesu pelu; Lino Sisera heqhino pa bogheghi kubovetsuke; lino akutsu lono pa yepilive tsuke.

²⁷Paye pa khonhe pishe pesu ikiqive; paye ayeghilo iluqiveno thive.

²⁸Sisera paza no alashe lono juphe: lino ghokuna puakeu thiuno putoju a. Lino iniju, “Khurkulu hupauye kushiye munu ighi anikya?” “Kushiye pawu khurshi qoye munu ideghi anikya?”

²⁹Li wu alokutsulimino li khochiletsu, eno liye anguno anguno li likhi li iniju auve.

³⁰“Panonguye anhemghaqo mu hakholumo eno kijelu kepushi shimokeshela; ghushimi lakhi ghenguno ilimi lakhimu kinimu ithulumo keshela. Sisera ghenguno amekusho phi-nhemhgha, kukaliu ghenguno jukivi phinhe mgha hakholu mokeshela!”

³¹Hipaphi shi oghumiqo kumtsu thive pelo, O AMPEU, ikemu oshounoqomi pelono tsukinhe ipechekelo toi vulupelo! Tipa ghakhulo ampe lhobidi kutolo alokughuno alue.