Read Sumi Naga 3 JOHAN 1 Bible Online

3 JOHAN 1 - Sumi Naga bible

3 JOHAN 1

¹Amuchouno kimiyeche keu Gaiya, kuchouno ino kimiyeche keu lau yelu ani.

²Ino kimiyeche keu, noye thwokhalo akivishi aghi nani eno oshi-aji akivishi aghi nani kepi ino pulu ani. Okuxuye akivishi anikepi ino ithi ani.

³Kughono athikuzumi khamino hilau ighi puzu nono kuchou kuxu xuchekeu ghili pesu ivilo pikeno niye shishe alokivi shive, mutsuqheyino noye kuchou lono pulhapuju xu achenike.

⁴Itianuliqono kuchoulo xu acheni kepi ino chilukeuno alokivi akijeu tinguno kutau kiumu kuhae.

⁵Kimiyeche keu, Khristomi akusamino inaghaumi shiaghi pinamu nono panongu lau akumla kivi shikeu huye noye pukhubekuluu shianike.

⁶Panonguno akukuhomi hilau akeqo vilo okikimiye ghili pivae. Alhou pulou kumlapushi panongu ghuzulalo kuphu puwulo.

⁷Kughengu panonguye Khristo kumla shiniye wuchekelo Alhou pulumokemi lauye kiumu lupepuamoe.

⁸Tishiaye, ninguye timi hipaqo kuphu kepue tishianguno ninguye panonguno kuchou ghenguno mla chekeulo mla kuqhalu anike.

⁹Ino ikhonheyikeu yesu lakhi akukuhou lau yepuwuke, ikemu Diotrefa no panongu sakipheu shinishi chekeu huno ino pikeulo kumsu kutojutsumoe.

¹⁰Tighenguno pano kiukiu shipuani keno ino ighi anguno pano ningu shou lhoksakugha tsa zalepukukeqo kumtsu kughaju nani. Paye tighi aghaqimo puzu pa ampino athikuzumi sasunikeu hachileve, eno kutamino sasunikeu ghi pano hachilevetsu eno akukuho lono athikuzumiqo hapheveke!

¹¹Kimiyeche keu, alhoksa pape kevilo ikemu akivipu papelo. Khunono akivipu shi cheni keno panoye Alhou laumike; khunono alhoksa shi cheni keno paye Alhou ithulu chemoe.

¹²Timi kumtsuno Demetria ye akivikepi picheni; Kuchou hughi paye akivike picheni. Nighi pa shepe shiani, eno ino ashepe shitsukeuye kuchou kepi nonguno ithiani.

¹³Niye nongu lau avehu kutomo yekepushi anikemu akiye loye tipaqo yemoveni;

¹⁴niye itheno nongu sasu kushonikeu kumsu ani eno tileno ningu ampino kuptsalu nani.

¹⁵Aloinokeu nongu gholo alo. Akusamino petha nongu tsu ani. Shompamiqo kumtsu lau petha tsu ani.