Read Sumi Naga JUDA 1 Bible Online

JUDA 1 - Sumi Naga bible

JUDA 1

¹Jisu Khristo qeu eno Jems thikuzuu Juda Alhou no kuluvekemi khunoqono Apu Alhou kikimiyelo acheni eno Jisu Khristo ghenguno susho pesu akemiqo lau yelu ani.

²Kupukini, aloinokeu eno kikimiye nongu lau kighishelu apeniu!

³Kimiyechekemiqo, niye tolukivi thaqhu pukaputsa puzu ningu ghenguno xakulupu aqu shiakeu ghili pesu nongu lau yelu akeulo, nongu vilo Alhou no ghuthu khavino kumtsu ghenguno akupulupu pawu timiqo tsupe puakeu hu nonguye tipau susho masakepi qhuiniju ani.

⁴Kughengu khunomu mthano akelono Alhou lau amlo tsuchemokemi khamino tuqhouno ningu gholo iloghivae. Timi hipaqoye niLhou wu kukumgha tsape ghili tuchighi pesu pano shi aji lhoksa puloulo suve ani eno niMpeu ni Kukutsuu ye Jisu Khristo likhike pa hakha anie. Highenguno timi hipaqo Alhou no peve nikeu shi khaghino amichi shipe qhivae.

⁵Nonguye puzuuno ithive akemu ino itaghi hipau piputo kithenishi ani, ike Ampeu no Israilmiqo Ijip yeghi lono xapheluve kemu athikhau khunoqono pulumo keno tipaqoye pithiveke.

⁶Kungumi khipaqono panono akepualo ngomoveno tipa-a kacheve nikeno , panonguye aqhou zumoikeulo lhokta yikichhe pesu tshuve cheni, eno kughakutha Tsala akijeu ighimoke kutolo qhipua cheni.

⁷Sodom ngo Gomora eno tipau sukumxalo aphughi akeqo kumsululo. Timi tile akeqono kungumi hupaqo toi shike, panonguno kipitimi totimi dolo mithemokeu eno chighichilai keu shike, alhomi pesu panongu shou aghime tsukeu huno kumtsu zulo kichekipiyeke.

⁸Titoi, timi hipaqoye pano samo-pumo akelauye pano phimpi shou axine shiwuve cheni; panonguye Alhou yehpe lakha cheni eno kunguu akimthe jukuvumiqo thaigha cheni.

⁹Ikemu kungumi gholo atou Mikhael ghi tishi chemoe. Pano Muse sukumo ghenguno tughami sasu kohakishi kelo thaighakeu tsa pipuku nikeu musa ighuno ishi pike, “Ampeu no olomi piani.”

¹⁰Ikemu timi hipaqoye panonguno mthakeu jeli thaqhuye thaigha acheni; eno kumsuphe kumlau tughashiqo toikeu kuxu, ti chukeyeh likhi ithi akeu huno panoqo shipusa puhave cheni.

¹¹Timi tipaqo ghenguno ahakusapuke! Panonguye Kain no pulakeu laghi pula cheni, eno pisa ghenguno alakimneshi Balaam no kuquvekeu xine lau papewu cheni. Kora no hebide ipeghikeu toi panonguno hebide puzu Kora toi panonguye puhave ani.

¹²Timi hipaqono kujomono kumtsa tsuqukile chekeu huye nowu kuposhukulu ghulhulo tichetighepuke. Panonguye pano likhi pano heju auve ani. Panonguye khungkusu amulhuno fupe chekeuno tsutsughu sughichemo keu toike. Panonguye tuqu tsalalo axathi pithimokeu subo toike, akuhu lono nhuveno abo akuchopu thivekeu subo toike.

¹³Panonguye azufukukucho kighideno muqho ipeghi ketoi panongu kukujopu pephe cheni. Panonguye itsu itsukiche yepuqo toike, panoqo ghenguno Alhou no akuzu kutholo alhokupuju ghenguno a-a kutope qhipuani.

¹⁴Hiye Adam lono tiqheli akutsuniulo ikoighi akemi Enok no khaghi timi hipaqo ghenguno ishi pivae: “Ampeu no phikhakumla kungumi akimthemi sasu ighi puzu

¹⁵kumtsu shou kughathabe nani, eno panonguno Alhou sumokeu kumla khijehi shipuani keno eno Alhou sumokemi axinemino pa shou alhoksa tsa pikeu kumtsu pesu panoqo shou kughabepuku nani!”

¹⁶Timi hipaqoye muchhochekemi, akuxulo aghaqimlakemi, alhoksapulo ngosukumlalo xu acheni, pano likhi pano qhekuza tsa zalekemi, panolah phunike ghenguno alatsa timi vilo picheni.

¹⁷Ikemu nonguye hi kumsuchilelulo, kimiyechekemiqo, ni Mpeu Jisu Khristo wu apostolmino azunatha ghi nongu vilo pivae.

¹⁸Panonguno nongu vilo pikeuno, “Ashekha tsalaloye nongu jukunathakemi ipeghi nani, panonguye Alhou sumokeu ngosukumla kuxu papewuve nani.”

¹⁹Timi hipaqono kijethakeu huthuphe cheni, ayeghilo kuxu likhi amlo tsukemi, Aghungu Kimthe kuhakemiqoke.

²⁰Ikemu ino kimiyechekeqo, nonguye nongu kupulu shishe akimtheu shou nongu kuxu xupukulo; Aghungu Kimthe lono inikhulo;

²¹nonguye Alhou kikimiyelo alo; lhokta kuxu kutolo niMpeu Jisu Khristo no nongu lau kupuqhiyi penikeu huqhe alo.

²²Khunoqomino amlo lhelheyi anikeno tipaqo mlo shikumto tsualo;

²³kutami khamiye ami lono sunhephelu puzu tipaqo xalulo; eno kutami khamiye musa pulaghi kupuqhiyikeu piyelo; ikemu panongu shi aji kimineno aphiminilo axine shipukuvekeu jukuchhubelo.

²⁴Itehiye, nongu pelo veqhipemono jukutochekeu lau eno pa kimthe jukuvupu kungo-alo alokivishi eno tukutiye shimono nongu saghilu nikeu lau,

²⁵ni Mpeu Jisu Khristo vechewo niXakuluu eno pa likhino Alhou ke, pa lau akimthe jekipi, akughushu, akuka eno ayehkipe, khaghi wovekeu lono itehi kuto eno alhokupuju lono alhokupuju kuto apelo! Amen.