Read Sumi Naga PIYEKUSU 1 Bible Online

PIYEKUSU 1 - Sumi Naga bible

PIYEKUSU 1

¹Kaku hipauye Jisu Khristo no piyesukeuke. Alhou no piyesukeu hipau Khristo tsuke. tishianguno paikhavilo kiu shiveni cheni keno pa qemiqo lau piyepe niyeke. Khristo no kungumi puwuno pa qeu Johan vilo thime hipaqo kighithikilepeke.

²Johan no pano ithulukeu kumtsu pesu Alhou tsa eno Jisu Khristo no kuchou piyekeulo ashepe shiani.

³Khunono kaku hipau phini keno tipaqo kumghae eno khunono tungkupu tsape hipaqo chiluni eno tipaulo yepuakeu pelu nikeno tipaqo kumghae; kughengu adoye kupunuvae.

⁴Johan no Asia yeghi bocholo akukuhou tsuni akeqo lau yelu ani. Alhou, khuu acheghi, acheni eno ighini kuau pa launo; eno pa zulo akimthe ghahwu tsuni akeu launo;

⁵eno Jisu Khristo no amikuchoshi ashepe shichekeu, kithimi gholono xuputhu tughiu, ayeghilo kukami shou ayehkipeu launo kupukini eno aloinokeu nongu wu shilupeniu. Khuno ningu kimiye eno pa jih vechewo axine lono ningu xaphelu,

⁶eno pa Lhou eno pa Pu qepeniye ningu pesu achinemi yehkipeqha lakhi shivetsu keno, pa lau akimthe jekipi,ayehkipe alhokupujulo achepelo! Amen.

⁷Julo, paye khungkusu shouno cheni. Timi kumtsuno pa ithulu nani, pa qhuqhi pithikemi ghi; eno ayeghilo timi jeli akemi kumtsuno pa shou amlo ghime shi nani. Tishi peniu! Amen.

⁸“Niye atughiu eno ashekhau” ipi Ampeu Alhou Akughushuu, khuuno acheghi, khuuno acheni eno khuuno ighini cheni keno pano pike.

⁹Ni Johan ye nongu thikuzuu ke, eno Jisu papemi lakhi kehu Alhou yehkipe laumino kutuughi shilukusa puqhe akeulo nighi nongu sasu kusaje chekemike. Ino Alhou tsape shikeu eno Jisu shepe shikeu ghenguno Patmos zudoyeghilo ikughape qhiveke.

¹⁰Ampeu Tsalani Aghungu no ipeitha ake, eno izupouno afuko ghugha toikeu kije lakhino ishi pikeu ino chilu,

¹¹“Nono kiu ithulu keno kaku lakhilo yepukulo eno akukuhou tsuni lau tipau tsupuwulo: Efesia, Smurna, Pergamos, Thuatira, Sardia, Filadelfia eno Laodikia kukuhouqo lau tsupuwulo.”

¹²Ike khuuno iputsa akeno tipau juniye igho ju kelauye shunayino shikeu akulukibepu tsuni ino ithulu,

¹³eno tipaqo mutalo timi toike lakhi aghi, eno apukhu kutolo chijebobo-phikuzu u-ae, eno shunayino shikeu pokha pesu pa chita khapu ae.

¹⁴Pa kutsusaye asupha kimiye toi eno murasu kimiye toike; eno pa nhethiye ami kuyiqu toike.

¹⁵Pa pukhuye alazayi pitikutsughuveno phupuyi akeshi mulapuyike, eno pa sutsaye aghokiqo ghugha toike.

¹⁶Pa u-ajeu ayepu tsuni peae eno azutakihi kutsugha lakhi pa kichi lono ipeghi. Pa gi ye puchou tsukinhe kumghalo toike.

¹⁷Kughou ino pa ithulukeno niye thivekeshi pa pukhu phivilo ikiqive. Ikemu pano pa u-ajeu pesu ishou bepuzu ishipi, “Musakevilo, niye atughiu eno ashekhauke,

¹⁸eno niye xu achekeuke; niye thive ikemu itehiye alhokupujulo xu acheni. Ino Akithi ngo Kithimi-yeghi[1] khadu peani.

¹⁹Itehi nono kiu ithulu ani eno hithiu kiu shi nani keno, nono kiu ithulukeno tipaqo yepukulo.

²⁰Ayepu tsuni i-u ajeu akeu nono ithulukeu eno shunayino shikeu akulu kibepu tsuni wu kuthokuzu kiqiye hike: ayepu tsuni huye akukuhou tsuni wu kungumiqo ke eno akulukibepu tsuni huye akukuhou tsuni huke.”