Read Sumi Naga PIYEKUSU 10 Bible Online

PIYEKUSU 10 - Sumi Naga bible

PIYEKUSU 10

¹Tileno kungumi akumto lakhi kungugha kudauno iqicheghi. Paye khungkusu lono kuzupe eno milisu lakhino pa kutsu vehope ae; pa giye tsukinhe toi eno pa pukhuye ami tsukucho toi.

²Pa ulo likuzu kaku aghulo lakhi lhaphepe ae. Pa pukhu ajeuno azughilo chhosu eno pa pukhu piyiuno ayeghi shou nepe ngono

³abongushu ghugha toikeu sutsa lono vekipighi ighae. Pano ighave kethiu tsutsukusu tsunino ighae.

⁴Kughono tsutsukusu tsunino igha tavekeno, ino yepukuniye shike, ikemu atsutsu kudauno asutsa lakhino ishi pikeu ino chilu, “Tsutsukusu tsunino kiu piveakeno kusupe pualo eno tipau yepesu qhikevilo!”

⁵Tileno kungumi azu shou eno ayeghi shou puthugho akeu ino ithulukeu huno kunguu pa uajeu chhopuku

⁶eno kungugha, ayeghi, azughi eno tipaqolo akeu jeli kumtsu lhophekeu Alhou, khuuno alhokupujulo xu acheni keno paje lono tushoqhighi ishipi, “Hinguno hilau munuvepemo nani.

⁷Ikemu kughou kungumi akutsuniuno pa fuko kuyighani keno tile Alhou no pawu tuqhou kukughu, pa qemi tungkupmi lau kutughuvekeu hu shikupu nani.”

⁸Tileno kungugha kudauno iputsa keu sutsa huno itaghi ivilo ishipi, “Wupuzu azughi ngo ayeghi shou puthugho akeu kungumi ulono likuzu kaku lhaphepua keu ikhilulo.”

⁹Ike ino kungumi lau wuno pa vilo likuzu kaku kitila hu itsuvelopi khu. Tileno pano ivilo ishipi, “Ikhilulo eno chuvelo; tiye opolo khumtsayi nani ikemu okichiloye akhingozu toi ngoniyi nani.”

¹⁰Ike ino kungumi ulono likuzu kaku aghulo hu ikhilu puzu tipau chuve eno ikichilo tiye akhingozu toi ngoyini michelu. Ikemu ino tipau chuve kelauye ipolo khumtsayive.

¹¹Tileno ivilo ishipi, “Noye itaghi timi jeli, ashiayeh jeli, atsa jeli eno kukami kutomo ghenguno Alhou tsape shimasae.”