Read Sumi Naga PIYEKUSU 11 Bible Online

PIYEKUSU 11 - Sumi Naga bible

PIYEKUSU 11

¹Tileno akusu lakhi pesu itsu, tiye mighiju kepu kusu lakhi toi eno ivilo ishipi, “Ithuno Alhou chineki ngo agho-kiptia ngo tile mlla akeqo ngo ishi mighijulo.

²Ikemu akikhala bochoye mighiju kevilo, kughengu tipaqhaye Alhou yeh kumthamiqo tsuveake, eno panonguno aqhi lhobidi kini ghenguno Akimthe phughi hu nedaqoda nani.

³Ino ishepemi kini puwu nani, eno pamano yeqhiye phi upuzu atsala 1260 kutolo Alhou tsa pesu asheshulu kepu akuka tsu nani.”

⁴Ashepemi hipamaye olivsubo kini eno akulu kibepu kini ayeghi Mpeu zulo puthugho achekeu huke.

⁵Khunono pama shipusaniye shinikeno pama kichi lono ami ipeghi puzu aghumi pitiqhive cheni, titoi shipuzu pama shipusaniye shikemi pithive nani.

⁶Pamaye atsutsu khave kepu kuka ani, tighianguno pamano Alhou tsa pesu asheshu ake tsala thaqhulo tsutsughu kitilamu ghuqhi pemo niyeke; eno pamaye azu pesu ahji kughulhove kulupu kuka ghi ani eno pamano shinishike thaqhu ayeghi shou pusa jeli vepuku kulupu kuka ghi ani.

⁷Kughou pamano ashepe shikeu shikhaveni keno, aqohkutho lono ipeghikeu tughashi huno pama sasu aghushino pama shou toluve eno pama pithive nani,

⁸eno pama sukumoye aphughi khilehino panongu Mpeu yedapithive keno tipau laghilalo anani. Aphughi tipauye aholetsauye Sodom momu Ijip.

⁹Atsala kuthuno tuxa kutolo timi jeli, ashiayeh jeli, aqo-aho jeli eno atsa jeli lono timiqo ighi puzu pama sukumolo jupuku nani eno akumokilo tipaqo suwo qhovenikeu lakha nani.

¹⁰Ayeghilo akemino timi hipama thivekeu ghenguno alokivishi nani. Panonguno alovi ilhe eno agho chhekile nani, kughengu tungkupumi hupamano ayeghilo akemi shou pitipuzaqhi keu sughicheke.

¹¹Ikemu atsala kuthuno tuxa thiu Alhou launo akuxupi tuthu ighi puzu pama lolo ilove, eno pamano puthugholuve eno pama ithulukemi kumtsuno shishe akichiqhive.

¹²Tileno atsutsu kudauno asutsa kuloghi lakhi pama vilo ishi pikeu pamano chilu, “Hilau ikughivelo.” Pama ghumino juakelauye pamaye khungkusu lono kungughalo ikuve.

¹³Tipa mutsa ayeghi shishe ilu, aphughi hu kikije achighiuye kutsapinive eno timi 7000 pithivetsu. Timi achilishi aghikeqoye shishe musaveno akimthe jekipipushi kungugha Lhou sheqhetsue.

¹⁴Akuighupu akiniuye wovae, ikemu akuighupu akuthuuye pai ighini cheni!

¹⁵Tileno kungumi akutsuniuno pa fuko kuyigha, ikelauye atsutsulo vekipighi asutsa shiae eno ishipi “Ayeghi kukaqhaye niMpeu eno pawu Mesiya wu akukaqha shiluvae eno pano alhokupujulo kacheuve nani.”

¹⁶Ikelo muchomi mukubidi khunoqomi Alhou zulo alakhulo iqa akeno tipaqono panongu gi pishiqho pesu itsaiqino Alhou mllaghi ishipi,

¹⁷“Ampeu Alhou akumtou, itehi achekeu eno puzuuno acheghikeu! Ninguno oshikimthi ani, nono okuka kije ikhiluveno ayehpethuvae!

¹⁸Alhou yeh kumthamino aloghu-ide, kughengu ologhu ighive kehu, eno kithimi shou xathabe kepudo shivae. Tungkupmi oqemi owu timi, omllachekemiqo, kijemi momu kitilamiqo ajume tsunikeu tuqhudo ighi ani. Khunoqono ayeghi shipusa cheni keno tipaqo shipusa nikeu tuqhudoke!”

¹⁹Tileno kungughalo Alhou chineki khaqhive, eno Puloshoqhi Bohu hu tile akeu ithulu. Tileno tsutsupha kulo kong kong shi tsutsusu igha ayeghi ilu eno shishe murasu qie.