Read Sumi Naga PIYEKUSU 20 Bible Online

PIYEKUSU 20 - Sumi Naga bible

PIYEKUSU 20

¹Tileno kungugha lono kungumi lakhi iqicheghi keu ino ithulu, eno pa ulo aqoh-kutho khadu ayikichhe kushuwa lakhi peche.

²Pano Dragon, khaghi apighi hu tsuquluve, tipauye Tughami momu Satan huke, eno ampe 1000 ghenguno pa tshupe qhive.

³Kungumi huno pa kughapesu aqohkutholo vesuve eno tipau khaveno mekhave, tishianguno ampe 1000 tovemoke kutolo pa pelo ashiayeh jeliqo pishiqhi pemoniyeke. Tipathiuno ado kitila ghenguno pa kuqhophe maye sa nani.

⁴Tileno ino akuka lakhu eno tipaqolo iqa akeqo ithulu; panongu pelo kughatha penikepu kuka tsupe pua. Timi khunoqono Jisu no kuchou pephepiyevekeu eno Alhou tsa pesu asheshuke ghenguno ghiqhive keno tipaqo ngulho ghi ino ithulu. Panonguye tughashi momu tipau julho shisukeu mllamoe momu panongu kishelo eno panongu ulo tughashi wu amchi ikhilumokeqoke. Panonguno Khristo gholo xupuzu ampe 1000 ayehpeke.

⁵Kithimi kutamiqoye ampe qhethonhe wovemoke kutolo xuithughimoe. Hino kithimi xuputhu keu atughiuke.

⁶Kithimi xuputhukeu atughiu hipaulo khunoqono suluni keno tipanoqoye shishe akumgha eno alokivipue. Akithi akiniuye panoqo shou akuka kuha nani, panonguye Alhou wu eno Khristo wu achinemi shive nani eno panonguno pa gholo ampe 1000 ayehpe nani.

⁷Ampe 1000 toveke thiuye Satan ye pa kughuki lono khaqhipheve nani,

⁸pano ayeghi cheku bidilo ashiayeh akeqo, ti Gog ngo Magog pishiqhinike wuve nani. Satan no aghu shiniaye panoqo kumtsu kumqo sasu ighi nani.

⁹Panonguno ayeghi nhakhaluve eno Akimthemiqono achekeu eno pano kimiyechekeu phughi hu suhuluve. Ikemu kungugha lono ami iqighino panoqo pitiqhive.

¹⁰Tileno pano pishiqhichekeu Tughami huye ami eno amichu pitiakeu yizulo vesuve, khipa-alo tughashi ngo kichileu tungkupu vesupe puakeno, eno putho pucho alhokupujulo panonguye tileno pitipuzaqhi nani.

¹¹Tileno ino akuka lakhu akuloghi lakhi metsughoikeu eno tipau shou iqa akeu ngo ishi ithulu. Ayeghi ngo kungugha pa zulono yeuveno ithumlave.

¹²Eno kithimi kijemi kitilami kumtsu akuka lakhu zulo puthugho akeu ino ithulu. Kakuqo lhaphe eno kuxumi kaku kutau lakhi ghi lhape pua. Kithimiye pututano kiu mlapua keno kakuqolo yepe puaghikeu kiqi lono panoqo shou kughathabetsu.

¹³Tileno azughino tipaulo kithimi akeqo pesu tsuve. Akithi eno kithila yeghi ghi tipaulo kithimi akeqo pesu tsuve. Panongu kumtsu pututano kiu mlapuaghi keno tipau kiqi lono kughathabetsu.

¹⁴Tileno akithi ngo kithila yeghiye amiyizulo vesuve. (Amiyizu hipauye akithi akiniuke.)

¹⁵Kuxumi kakulo khunoqo je yepuku puaghimo keno tipaqoye amiyizulo vesuve.