Read Sumi Naga PIYEKUSU 22 Bible Online

PIYEKUSU 22 - Sumi Naga bible

PIYEKUSU 22

¹Kungumi huno akuxupuzu akeu ghoki ghi ipiye, tiye mlapuyi mulla- ide ae, eno Alhou ngo Bheriti kuka lakhu lono qoipeghi puzu

²aphughilo alaghila mta zusu qowu ae. Aghoki hukukuu eno hikukuu akuxupu subo ae; tipaulo ampelo axathi ghuthu chighikini pithi cheni, aqhilo ghuthu lakhikhi; tipau nipaqoye ashiayehqo shipivilukepu ghenguno ake.

³Alhou no ghushovekeu jeli kiumu aphughi tipaulo ithumla nani. Alhou kuka lakhu ngo Bheriti kuka lakhuye aphughi alou ake eno pa qemiqono pa mlla nani.

⁴Panonguno pa gi ithulu nani, eno panongu kishelo pa je yepuku puaghi nani.

⁵Tilehiye putho tsala kuhae eno panonguye akulu momu tsukinhe kuvu avehupu kuhae, kughengu Ampeu Alhou no panongu kuvu shive nani eno panonguye alhokupujulo kukami toi ayehpe anani.

⁶Tileno kungumi huno ivilo pi, “Atsa hipaqoye kuchou eno pukhukulupuke. Ampeu Alhou, khuno pa Ghungu pesu tungkupumi tsu cheni keno pano pawu kungumi puwu puzu itheno kiushive nani keno pa qemiqo lau piyeniyeke.”

⁷“Julo! Niye itheno cheni. Khunono kaku hipaulo tungkupu-tsa yepuakeu peluni keno tipano kumghae,” ipi Jisu no piani.

⁸Ni Johan no hipaqo kumtsu chilu eno ithuluvae. Kughono ino hipaqo kumtsu chilu tave eno ithulu tave keno, kungumi khuuno hipaqo thwokha ipiye akeno pa mllaniye pa pukhu phivilo iluikiqi.

⁹Ikemu pano ivilo ishipi, “Tishi kevilo! Niye aqemi okusauke, eno tungkupumi qemi akusami, eno hipau kakulo atsa pipuakeu pelukemiqo qemi akusamike. Alhou mllalo!”

¹⁰Pano ivilo highi pi, “Kaku hipaulo tungkupu tsa pipuakeu kusupe qhi kevilo, kughengu hipaqo kumtsu shikupuni keu ghulokiye kupunuvae.

¹¹Khunono alhoksa keno tishi alhoksa shilo, eno khunono mithekumo xine keno tishi mithekumo xine shiapelo; khunono akivi keno akivipu shiapelo, eno khunono akimthe keno tishi akimthe shiapelo”

¹²Jisu no piani, “Niye itheno cheae! Pututano kiu mlape puani keno tipau qhemi asaxu tsunike ghenguno ino isaxu pesu cheni.

¹³Niye Alfa eno Omega ke, atughiu eno ashekhau, abothu eno kishekhakeuke.”

¹⁴Khunono pano phimini mithemighei shikimthe keno tipanoqo kumghae, tishikeu lono akuxupu subo xathi chukuzupu shi nani eno aliwo kikha vechesu aphughilo wulu nanike.

¹⁵Ikemu aphughi nguno khalauye alhoksa kitiqevekeqo, kuduu shichekemiqo, salha shupukemi, ghikiqhimi, ajulho shisuno tipau mllakemi, akimki kimiye eno miki cheni keno tipaqono acheni.

¹⁶“Ni, Jisu no thime hipaqo pesu nongu akukuhou qolo asheshupeniye iwu kungumi puwuvae. Niye David kuhu-aghu eno David laghamike; niye inaqhe yepu huke.”

¹⁷Aghungu eno kulaliuno piani, “Ighilo!” Khunono “Ighilo” ipikeu sutsa chilu keno tipaqo pelo ighi pelo. Khunono tughuthi anikeno ighilo, khunono lunishi ani keno akuxupuzu kumsagho shighi ikhilulo.

¹⁸Khunoqono kaku hipaulo tungkuptsa chiluve akeno ni Johan no tipaqo vilo piputo ani, khunono hipaqolo kiukiumu sukuphani keno, kaku hipaulo pusaqo pipuakeu Alhou no tipau pesu pa shou aghime qabetsu nani.

¹⁹Khunono kaku hipaulo tungkuptsa pipuakeu lono kiukiumu ikhiveni keno, akuxupu subo xathi pa saje akeu eno kaku hipaulo Akimthe Phughi ghili pipuakeu lono pa saje akeu ikhiluve nani.

²⁰Hipau kumtsulo khuno pa shepe tsuani keno pano piani “Mutsuqheyino tishike! Niye itheno cheni!” Tishilo,Ighilo, Ampeu Jisu!

²¹Ampeu Jisu wu kupukini kimthemi kumtsu gholo apeniu!Amen.