Read Sumi Naga PIYEKUSU 4 Bible Online

PIYEKUSU 4 - Sumi Naga bible

PIYEKUSU 4

¹Tipathiu ino kungunhetsu kutau lakhi ithulu ike kungughalo ahukikha lakhi khaqhipua. Puzuu afuko ghugha toikeuno iputsakeu sutsa huno ishipi, “Hilau ikughilo eno hipathiu kiu shiveni cheni keno ino opiyenike.”

²Paikhavino Aghungu no ipeithaluve eno julo kungughalo akuka lakhu lakhi ae eno milakhino tilehi iqa ae.

³Tile iqakeu giye amekushotu jasper ngo karneliatu toikeu eno emerald tu toikeu milisu lakhino tipau kuka lakhu vehomxa pesu ae.

⁴Alakhu kutau muku bidino akuka lakhu veho pesu ae eno tipaqo shou muchomi muku bidino aphi kimiye pepu eno shunayino shikeu kutsukuqho pepuno alakhu tipaqo shou iqa ae.

⁵Akuka lakhu lono tsutsupha eno tsutsukusu sutsa ipeghi. Tipau gizulo akulu tsuni iqu ake, tiye Alhou kimthe ghahwu tsuni huke.

⁶Akukalakhu zulo ayina zughi toi, phuphuyi ithulukeu ghi ae. Akuka lakhu sumxa pesu, tipau ako phivilo akuxu akeu lhoxu bidi ae, tipaqoye athiu ghi azuu ghi anhethino chhitoi puake.

⁷Akuxu akeu lhoxu atughiuye abongushu lakhi kimihike, akiniuye amshitsu kimihi, akuthuuye timi gi kimihi pua, eno abidiuye aluqu yechekeu kimihike.

⁸Akuxu akeu lhoxu lakhi khino achishibo tsugho pu-a, eno tiye ashoughi aloughi anhethino chhitoi xapua. Putho-pucho panonguno tamono ishi alephe: “Ampeu Alhou Akughushuuye akimthe, akimthe, akimtheke, Paye acheghi, paye acheni, paye ighini kuau ke.”

⁹Akuxu akeu lhoxu huno akimthejekipi, agigihupu eno shikimthikeu le phe pesu akuka lakhulo akeu, khuu alhokupujulo xuachekeu lau tsukelo,

¹⁰muchomi mukubidi huno ti akuka lakhulo iqa akeu, alhokupujulo xuachekeu zulo itsaiqi puzu pa mllae. Panonguno alepheghi akuka lakhu zulo panoqo kutsukuqho lhaqhino ishipi,

¹¹“NiMpeu eno niLhou! Nono akimthejekipi, agigihupu eno akuka ithulu kuzupuke; Kughengu thwokha nono lhopheke, opulou lono panonguye achenipe eno lhophepe qhike.”