Read Sumi Naga PIYEKUSU 5 Bible Online

PIYEKUSU 5 - Sumi Naga bible

PIYEKUSU 5

¹Akuka lakhulo iqa akeu uajeu likuzu kaku lakhi ino ithulu; tiye ashou ghi aloughi yepukupe pua eno mekhakeu tsuni pesu tipau mekha pua.

²Kungumi akumto lakhino asutsa kuloghi lono ishi asheshu akeu ino ithulu, “Khuuno mekhakeu supho puzu likuzu kaku xachho kuzupu kya?”

³Ikemu kungughalo, ayeghilo momu ayeghi qhou namu khunomu likuzu kaku tipau xukho puzu alou jusunikemi lakhimu kuhave.

⁴Likuzu kaku tipau xakho puzu alou jusunikemi akuzupumi lakhimu kuhaveke ghenguno niye shishe qa-ae.

⁵Tileno muchomi gholo lakhino ivilo ishipi, “Qakevilo. Julo, Juda shiyeh Abongushuu, David laghami[3] huno theqhikulushi toluvae, eno pano mekhakeu supho puzu likuzu kaku lhaphelu nanike.”

⁶Tileno akuka lakhu ngo akuxu akeu lhoxuqo dolo eno muchomiqo gholo Bheriti lakhi puthugho aghikeu ino ithulu. Bheriti huye ghiqhipuakeu toi ipeghi. Tiye akibo tsuni pua, tipaqoye Alhou kimthe ghahwu tsuni ayeghiqhalo puwu puakeqoke.

⁷Bheriti huno akuka lakhulo iqa akeu u-ajeu lono likuzu kaku ikhilu.

⁸Kughou pano likuzu kaku ikhilu keno, akuxu akeu lhoxu bidi ngo muchomi mukubidi no Bheriti zulo itsaiqi. Panongu lakhi khino akighi lebo ngo tsungquikeuno abohu chhitoikeu pesu ae, tipaqoye Alhouw timiqo kukhukighinike.

⁹Panonguno alekithe lakhi ishi phea, “Nono likuzu kaku ikhilu puzu mekhakeu xukhonikeu akuzupuke; Kughengu oghiqhiveke eno okithi vechewo ashiayeh, atsajeli, timi kututa muqo gholono Alhou timi shi lupenikeu qhuluke.

¹⁰NiLhou qe penike achinemi yehkipeqha lakhi panoqo ghengu shipe qhitsue, eno panonguno ayeghi shou ayehpe nani.”

¹¹Itaghi ino jukelauye kungumi phikhakumla qhethonheno qhethonhe kutolo akeu sutsa chilue. Panonguye akuka lakhu ngo akuxu akeu lhoxu bidi eno muchomiqo vehomxa pesu puthughono,

¹²aghugha kuloghi lono alephe ae, “Ghiqhivekeu Bheriti huye akuka, kinikulu, alokutsu, akumto, agigihu akimthe jekipi eno shekiqhe ithulu kuzuke!”

¹³Kungughalo, ayeghilo, ayeghiqhou eno azughilo lhoxu akeqo, tsutsu yeghiqhalo akeu kumtsuno ishipi, “Akuka lakhulo iqa akeu eno Bheriti lau shekiqhe, agigihu, akimthe jekipi, akimthe jekughushu alhokupuju kutolo apelo!”

¹⁴Akuxu akeu lhoxu bidino ishi khochile, “Amen!” Muchomiqo huno itsaiqino mllae.