Read Sumi Naga PIYEKUSU 8 Bible Online

PIYEKUSU 8 - Sumi Naga bible

PIYEKUSU 8

¹Kughono Bheritino mekhapuakeu akutsuniu suphono lhaphe keno, ayikihedo tuxa kutolo kungughalo inaqhoive.

²Tileno Alhou zulo kungumi tsuni akeqo ino ithulu eno afuko tsuni pesu panongu tsue.

³Kungumi kutau lakhi, shunayino shikeu amikihipu peakeuno ighino agho kiptialo puthugho. Akuka lakhu zulo shunano shikeu agho kipitia lono Alhou timiqo kighini gholo xukutshuno mllapeniye tsungquyikeu kutomo pesu pa tsu.

⁴Alhou zulo kungumi akeu ulono tsungquyikeu pitikeu michhi gholono Alhou wu timiqo kighini kunguu iku.

⁵Tileno kungumino tsungquyikeu kiptibohu ikhilu eno agho kiptia lono ami hipesu tipaulo suno ayeghi shou vepuku. Tileno kong- kong shi tsutsu-sue, tsutsu pha kulo eno ayeghi ilue.

⁶Tileno kungumi tsuni afuko tsuni peakeqono tipaqo kuyighanike kutoluve.

⁷Kungumi atughiuno pa fuko kuigha. Tipa mtsa apughu, ami, eno ajih pesu xukutshuno ayeghi shou leqhipuku. Ayeghi kikije kuthulo lakhi, asubo kikije kuthulo lakhi eno atsuni kuxu kumtsu pitilekhave.

⁸Kungumi akiniuno pa fuko kuyigha kelo kiukela naghuto kuloghi toikeu lakhi amino piti-ghi azughilo vesuve. Azughi kikije kuthulo lakhiye ajih ilhowuve,

⁹azughilo lhoxu kikije kuthulo lakhiye thikhave eno ashukaki akeqo kikije kuthulo lakhiye shipusave.

¹⁰Kungumi akuthuuno pa fuko kuyigha, kelo ayepu kije lakhi, akulu lakhi toi iquakeu atsutsu lono pheqhi eno aghoki akeqo kikije kuthulo lakhi shou azupuki shou ikiqi iku.

¹¹Ayepu tipau jeye “Khumtsayi.” Azu kikije kuthu shikelo lakhiye khumtsayive eno azu yekeu lono timi kutomo thive kughengu tiye khumtsayike.

¹²Kungumi abidiuno pa fuko kuyigha, kelo tsukinhe kikije kuthulo lakhiye ghaphove, aqhi ngo ayepuqo ghi kikije kuthulo lakhiye ghaphove, ikehu tipau kuvu ghi saje kuthulo lakhiye kuhave; atsala kikije akuthuu loye eno putho kikije akuthuu loye akuvu kuhave.

¹³Tileno ino jukeloye, aluqu lakhi, kunguu amlhulo yechekeu huno asutsa vekipighi ishi pikeu ino chilu, “Kughono itaghi kungumi mikuthuno afuko kuyighakeu sutsa ighinikeno, ayeghilo akemiqo ghenguno akuighupue, akuighupue, akuighupue!”