Read Sumi Naga PIYEKUSU 9 Bible Online

PIYEKUSU 9 - Sumi Naga bible

PIYEKUSU 9

¹Tileno kungumi apunguuno pa fuko kuyigha ike ayepu lakhi atsutsu lono ayeghilo ikiqivekeu ino ithulu, eno aqoh-kutho[4] khadu tipau tsupe pua.

²Ayepu no aqoh-kutho kunha lhaphe keloye ami-phoki kuloghi lakhi toikeu lono amichhi ikughi; eno aqo-kutho lono ikughike michhino tsukinhe ngo amlhu kuzuphope zumoyive.

³Tileno amichhi lono tulhaqu ipeghino ayeghi shou iqighi; eno tulhaqu tipaqoye ayeghilo achuwo-pazano qukepu kuka aketoikeu kuka tsupepua.

⁴Panongu pelo ayeghilo asutsuni momu ashubo shipusapemo nike ahzatsu pua; ikemu timi khunoqo kishelo Alhou wu amchi chishidakeu kuhakeno tipaqo ghimenikeu shiae.

⁵Panonguye timi tipaqo pithipemo nikeu shipua, ikemu aqhi pungu ghenguno timi tipaqo pishipuju ghime penikeu shiae, eno panonguno pishipuju ghimekeu kusu huye achuwo-pazano timi qukelo sukeu toike.

⁶Aqhi pungu dolo timino thivenishi kelauno akithi phu nani, ikemu ithumla nani; panonguye thivenishi nani ikemu akithino panoqo launo wuve nani.

⁷Tulhaquqo ju akogheye khurshi aghushilo sawuniye kutopusu aketoi; panongu kutsulo shunayino shikeu kutsukuqho kimihi pua, eno panoqo giye timi gi mihi.

⁸Panongu saye totimi sa toi, eno panongu huye abongushu hutoi.

⁹Panongu mlaqhaye ayi kutuqhokeu mla-kuxa toikeuno nhapua, eno panongu chishibono asutsa shikeu ghughaye khurkuluno aghushiwuniye kohachekeu sutsa toike.

¹⁰Panongu shomhi eno qukepu-shu huye achuwa-paza shomhi eno tipaulo qukepu-shu akeu toike, eno panongu shomhi pesu aqhi pungu ghenguno timi ghuzanikepu kuka puake.

¹¹Aqoh-kutho shou ampi shiakeu kungumi huno panongu shou akukau shiake; Ibrimi tsauno pa jeye Abaddon[5]; Grik tsauno pa je Apolion.

¹²Akuighupu atughiuye wovae; hipathiu itaghi akuighupu kini ighinikeu shiani.

¹³Tileno kungumi akutsughouno pa fuko kuyigha, ikelauye Alhou zulo shunayino shikeu aghokiptibo akeulo acheku bidi kudauno asutsa lakhi ighikeu ino chilu.

¹⁴Asutsa huno kungumi akutsughou vilo ishipi, “Eufrati ghoki kijelo kungumi bidi tshupe puakeqo kuqhophevelo!”

¹⁵Ike kungumi pano bidiye kuqhopheve, kughengu hipa tuqhudo hipa tsala, hipa qhi, hipa mipe kutolo panoqo kutope puakeuye timi lhoxu kikije akuthuu pithive peniyeke.

¹⁶Panoqoye khijekeno tipau kikihi ino chiluke, ti khurghushimi chekeqo kikihiye milion kini ae.

¹⁷Ino kungulonhetsulo khurshiqo ye hitoi ithulue: khurshi shou chekemiye ayikutuqhokeu mla-kuxa pepu ae, tiye ami toi huchui, safir toi tsulabeyi eno amichu toi awunye. Khurshiqo kutsuye abongushu toi eno ami, amichhi eno amichuno panoqo kichi lono ipeghi.

¹⁸Pusa hipano kuthu pesu timi lhoxu kikije akuthuu pithikhavetsu: khurshiqo kichi lono ami, amichhi eno amichu ipeghikeu huno.

¹⁹Kughengu khurshi tipaqo kukaye panoqo kichilo eno panoqo shomhilo ake. Panoqo shomhiye apighi toi akutsu puake eno tipaqo pesu timiqo ghuzake.

²⁰Timi khije pusa hipaqono pithimono achili shiaghikeno tipaqoye panonguno mlape qhichekeu launo xaideghimoe. Panonguye tughami mllachekeu phevemoe, momu shunayi, tsandiyi, alazayi, asu atu julho mllachekeu phevemoe, tipaqoye ithuluchemo, chiluchemo eno alachelu chemoe.

²¹Tike kumono panonguno ghiqhikile chekeu, kuduu shichekeu, salha shupukeu eno pukachekeu lono xaideghimoe.