Read Sumi Naga RUT 2 Bible Online

RUT 2 - Sumi Naga bible

RUT 2

¹Naomi ye asholokumi lakhi ache. Pa je ye Boaz pa ye Elimelek no-bolomi kinimi lakhi ke.

²Rut no Naomi vilo pi, “Ipelo alu lo huno ikimiye aghikemi thiu no athilu pughi pelo.” Tile Naomi no li vilo pi, “Tishilo, ninga.”

³Ike li no ghile hu aghikemi lulo hu puzu ghilemi thiu athilu ake. Lino hu akeu lu ye Elimelek no-bolomi Boaz lu shi aghi.

⁴Ikelauye Boaz ghi Bethlehem lono ighi eno aghikulumi vilo pi, “AMPEU nongu gholo apelo.” Panonguno “AMPEU no okumgha tsupeniu” ipi khochile.

⁵Tile Boaz no pa qepumi lakhi aghikulumi jukutsu apekeu vilo, “Hiye khuno ghalimi kya?” ipi iniju.

⁶Aqepuuno khochile, “Liye Muab noghalimi ke, Naomi no Muab ghakhu lono ide ighike lono sasu ighi keu ke.

⁷Lino, ‘Kimiye puzu aghi luqhiveke tikhau athilu penima’ pi inijuke. Ike li ye inaqhe no itehi kuto mula apuzu kutula akulho qhiniye akicheqholo hianie.”

⁸Tile Boaz no Rut vilo pi, “Inilo, ninga, alu hipau qhive no kutami lulo athilu kevilo, iqelimi kupunu ghi hile mula alo.

⁹Panonguno khile aghilu aghinikeno jupuzu panongu thikhau wulo. Ino aqepumiqo vilo obu pemonike ahza tsuve ake. Nono kughono tughuthini keno aqepumiqo no alilo azu pewo supuanike wuno shoyelo.”

¹⁰Tile Rut no itsaiqi puzu Boaz vilo pi. “Niye inalimi keghi kiu lono olopu shilu puzuno ishi ikimiye anikya?”

¹¹Ikemu Boaz no li khochile, “Okimi thivemu oni ghengu nono kiu shitsu chekeno kumtsu ivilo lhevae. Noye opuaza eno opunugha qhive puzu nono mthamithekemi gholo ighive keu ivilo pivae.

¹²Nono mulavekeu lo AMPEU pelo olochile peni. Eno Israilmi MPEU Alhou chishibo qholo oshokhalu penike ghengu ighini keulo ojume tsupeni!”

¹³Rut no khochile, “Niye oqelimi mu kumokemu nono ikupu keu tsa pitsu keu likhimu imlo qivae.”

¹⁴Alhe chu akelo Boaz no Rut vilo pi, “Hilau ighino asho lu puzu akulhozulo putsuno chulo.” Ikehu li no ghilemi phivilo iqa, ike Boaz no aghikibiye chhopuwo li tsuke. Lino aghakiqishi chuno hami chukhamono qhive.

¹⁵Lino itaghi athiluniye ithu kemtsa Boaz no pa qepumiqo vilo ahza tsughi pi, “Aghi ghope piqhepuake gholo pimu li pelo athilu pelo eno li shikukujo kevilo.

¹⁶Akipiqhe gholono mu aghipe hami sujope qhitsulo eno li pelo athilu lupelo, eno li lomi pikevilo.”

¹⁷Ikehu Rut no avelau kutolo athilu-a puzu li no lu lukeu likutsujuke lauye akho lakhi muta-a shi aghi.

¹⁸Li no athi xapusu aki lo woghi no khije pughi kela pusu lini piye, eno lino aghikibiye chukha kumo ghi ikhiphe pesu lini tsu.

¹⁹Tile Naomi no li vilo iniju, “Noye ishi khile athilu akya? Eno khuno lulo mla akya? Timi khuno oheju keno AMPEU pelo pa kumgha tsupeni!” Rut no lini vilo pikeuno “Ishi niye Boaz ipikeu no lulo mla ake” ipive.

²⁰Naomi no pi, “AMPEU pelo pa kumghatsu peni! Kuxumi lau pina kithimi lau pimu AMPEU ye pano piqhive keu khilemu peve chemoe.” Naomi no li vilo highi pi, “Timi tipau ye ni sholokumi ke eno pano ningu valu kuzupu shi anike.”

²¹Tile Rut no pi, “Tinguno alau pano ivilo pikeu no panonguno ghile hukha moke kuto pa qemi gholo mula alo pike.”

²²Naomi no li mukishiu Rut vilo pi, “Tishimapi, pa qelimi gholo wukeu pavie, kughengu kutami lulo hunike lo ohakha nosake.”

²³Ikehu ashothi ghoqhi khamoke kutolo Rut ye Baoz qelimi gholo athilu ache, eno li ye lini sasu acheke.