Read Sumi Naga RUT 3 Bible Online

RUT 3 - Sumi Naga bible

RUT 3

¹Ghulo lakhi Naomi no Rut vilo ishi pi, “Ninga, niye okimi phutsu mayesae, tishianguno opelo akibo shiluve penike.

²Hi ithilo, Boaz ye nisholokumi ke, nono pa qelimi sasu mula aepi kehu. Julo, pa ye thohu pa niqalo athilo amu-u qhi anicheni.

³Pano opuloni mala hi shijulo. Noye azu kuchhuve eno tsunquyi keu xo supuve eno ophimini akiviu pepuve ishi puzu pa niqa kudau hulo. Ikemu pano kuchu kusho ta mphi kutolo oithi pekevilo.

⁴Pano khipa-a lo zuve nikeno jupe pualo, tishino wu puzu pa phivilo ihozuvelo, tishikeu lono noye pa kilo wonishi anikenapi pa pelo ithi penike, tile pa no ovilo ale pinimala julo!”

⁵Rut no lini khochile, “Nono pikeu kumtsu ino shinie.”

⁶Rut no aniqalo hu eno lini no pikeu hutoi shike.

⁷Boaz no chusho vekethiu alokivishi apuzu wuno athi likutsu puakeu shelo ihozuve. Rut no mukhano ighi puzu Boaz phivilo ihozuve.

⁸Zubumtalo Boaz no zuidathughi, eno ideighi kelo totimi lakhi pa phivilo zu aghikeu ithuluno akichiqhive.

⁹“No khuu kya?” ipi pano iniju kelo Rut no pi, “Oqeliu ni Rut kewa! Nono asholokumi kehu eno ivalu kuzupu shi anikehu, isasu kulawunima pi anikewa!”

¹⁰Tile Boaz no pi, “AMPEU pelo okumgha tsupeni, ninga! Apumi kumlhomi na momu kinimi namu nono pape wumokeu hiye atughulo ani hejukeu nguno ashekha launo abolomi ivuila keu piye anikena hio!

¹¹Ti omlo lipi kevilo, ninga! Nono ivilo pikeu kumtsu oghenguno ino shinike, noye thai kemi totimi lakhi kepi aghami kumtsuno ithi anie.

¹²Niye no sholokumi eno ovalu kuzupuke ikemu inguno kutami lakhiuno ovalukuzumi aphie.

¹³Putho shi aphi kutolo hilau ngovelo eno thanauno timi huno ovalu nikeu pulo anikeo mokela inijuni. Pano ‘alo’ ipi aye ta, ikemu pano mopiaye ino ovaluni putsa pi AMPEU je lono tushoqhi anie. Inaqhe kuto zu aghilo.”

¹⁴Ike liye inaqhe kuto zu apuzu timi khumu li ithumla aphi lono ithuve. Kughengu Boaz no li vilo pi, “Timi khuu pelomu noye hile ighiepi ithi pe kevilo.”

¹⁵Tsuthove kethiu Boaz no li vilo pi, “Oku-u phi sughino qhalo.” Lino ti qhatsuke lauye pano athi akho lakhi shou lesu tsu puzu li xapipe, tishino liye aphulo idewove.

¹⁶Rut no woghi kelo lini no ishi iniju, “Ninga! Avehu hu kishi shilukya? “ Rut no li vilo Boaz no kiu pikela kumtsu lhe.

¹⁷“Pano athi akho lakhi shou itsu ghi pikeuno niye au kumsa kishi olau idewo pemo pike.”

¹⁸Naomi no li vilo pi, “Ninga! avehu kishini cheni kela ithimoke kuto noye inaqhoi khe aghilo, kughengu Boaz ye ishino avehu hipau xatha moke kutolo ngosu mula nani.”