Read Sumi Naga SAMUEL ATUGHIU 1 Bible Online

SAMUEL ATUGHIU 1 - Sumi Naga bible

SAMUEL ATUGHIU 1

¹Efraim lagha lono ighikemi timi lakhi paje Elkana ache. paye Efraim ghakhulo taun lakhi Rama ipikeulo ache. Paye Jeroham nu eno Elihu tilimi lakhike eno Zuf lagha lono ikowokemi Tohu kibolomi ke.

²Elkana ye anipu kini ache,Hanna ngo Peninna pama. Peninna ye anuliqo ache ikemu Hanna ye lakhimu kuha.

³Mpe atsu tsu Elkana ye Rama lono Shilo lo wuno aghakishi kumllagho pesu AMPEU akiqheu tsuche, tilehi Eli nu Hofni ngo Fineha pamano AMPEU chineu shi acheke.

⁴Elkana no pa ghakishi kumlla tsukeu kumtsulo ashi saje lakhiye pesu Peninna ngo li nuliqo tsuche.

⁵AMPEU no Hanna pelo ati anuli ithumlano achepe namu Elkana ye ighono li kimiye kehu saje lakhiye pesu li tsucheke.

⁶Hanna no anu kuha kehu Peninna no alhokuthu li thaigha jukunathake tsa piche, kughengu AMPEU no li pesu anuhami kughulhove tsukehu.

⁷Hitoi ampe kushuwa tishi cheuve, kugho kughomu pama kumtsa AMPEU kilo wu aye Peninna no Hanna mlo ighono shipsave tsuno Hanna ye qakeghi qauveche eno kumu chusho move che.

⁸Li kimi Elkana no li vilo iniju, “Hanna, noye kushiye qa ani kya? Noye kushiye chumono ani kya? Noye kushiye alhokuthu amlo ime acheni kya? Niye anuli chighi nguno akiviu ipi noye mtha kesha?”

⁹Ghuthu lakhi Shilo lo panonguno chusho tave kethiu, Hanna no puthughove. Tilehi Eli achineuye AMPEU phiki hukikha phivilo iqa ae.

¹⁰Liye ighono amlo ghime kutho lono AMPEU lau inikhu eno amlo ghujushi mloqae.

¹¹Lino AMPEU lau tushokiqhi lakhi hitoi piqhi, “O AMPEU Akiqheu, tsalatsa nono oqeliu mlo kighishi lo jupukuno ikumsulu tsu aye, eno oqeliu kumsuma tsumono anu lakhi tsu aye, ino pa pesu akuxu kupujulo AMPEU tsuvenie eno pa kutsusa miyetsu movenike.”

¹²Lino tamo mithe AMPEU lau inikhu ake ghulokilo Eli no li kichi kukulo jukuto ae.

¹³Hanna ye li mlo kutouno inikhu ae, ikehu liye amtsuye kulo akemu li sutsa ye chilumoe. Eli no kumsukeuye liye shomzu vea kughashi ae

¹⁴ikehu li vilo ishi pi, “Owu shokumzu ghili piye akevelo! Owu shokumzu lono taveno alotsuvelo.”

¹⁵Ikemu Hanna no khochile, “Akijeu niye shomzu amoe, ikemu niye ighono amlo ghujumi topumi lakhie; niye khilemu aji shochemo momu shomzuve kepumu yechemoe, ikemu AMPEU lau imlo ghime kumtsu kuqho leqhi piphe ake.

¹⁶Tighenguno niye ame kuha keu topumi kepi kumsu kepu kumoe, niye ighono amlo ghimemi lakhi kehu hitoi inikhu ake.”

¹⁷Eli no li vilo pi, “Akivishi wolo, Israil Lhou pelono nono kiu khu akeno tipau otsupenie.”

¹⁸Lino khochile “Ogizulo oqeliu pelo azukuvupu shilupeniu.” Tishiveno liye wuveno achuqupu hami chulu eno liye amlo kusa kuhave.

¹⁹Thoghiu Elkana eno pa bolomi inaqhe itheno ithughino AMPEU mllave kethiu Rama lo pano kilo idewove. Elkana no pa nipu Hanna sasu kushove eno AMPEU no li kighini khochile tsu.

²⁰Tileno liye mishiuveno anu lakhi punulu. Lino pa je Samuel ipi kutsu, “Kughengu AMPEU vilo ino pa khuluke.”

²¹Elkana eno pa bolomiye ampelo AMPEU lau aghakishi kumlla tsuchekeu eno pano tushoqhi pe puakeu tsunike ghenguno Shilo lo wu kepudo ighive.

²²Ikemu tipaulo Hanna ye wumove. Lino li kimi vilo pi, “Anu no asatheluve kemtsa ino pa sasu AMPEU kilo wuno, tipathiu pa kuxu kupujulo tilehi acheuve pe nani.”

²³Elkana no khochile, “Nono kiuno akiviu pi kumsu anikeno tipau shilo; anu no asathe moke kutolo akilo pa sasu ngo aghilo. Eno nono AMPEU lau tushoqhi puakeu kuchou shi achipi kalupeni.” Tighenguno Hanna ye akilo ngove eno anu hu loji puthu thuve.

²⁴Lino pa lojimoveno asatheluve kethiu, lino pa sasu Shilo lo wu, pa gholo ampe kuthu mishitsu, ashokukubo kilogram chighi eno ashiyiko hughi lo aji pilisu pusu wu. Samuel itimi shi aphi lono Shilo lo AMPEU kilo sawo qhie.

²⁵Panonguno amshitsu heqhive kethiu anu sasu Eli lau wu.

²⁶Hanna no pa vilo pi, “Akijeu, ikipimi qhitsulo. Noye ikumsulu aphima? Ino hilehi puthughono AMPEU lau inikhu ake lono nono ithulu keu totimi huke.

²⁷Ino pa vilo anu hipau tsulopi khue eno kuchono ino khukeu kiqi lono pano itsue.

²⁸Tighenguno ino AMPEU lau pa ikhiphe pesu tsu anie. Pano xu ake tivilo paye AMPEU wu shivae.” Tishino panonguno tipa alono AMPEU mllae.