Read Sumi Naga SAMUEL ATUGHIU 13 Bible Online

SAMUEL ATUGHIU 13 - Sumi Naga bible

SAMUEL ATUGHIU 13

¹Saul ye apunu mpe shighi shi ake[3] lono kalu; eno paye ampe lhobidikini Israilmi shou ayehpe.

²Pano timi 3,000 kishephelu; 2,00 no Saul gholo Miqmas lo eno Bethel ghakhu atolo ngove pe eno 1,000 no panu Jonathan no akeu Benjamin lughilo Gibea lo hapuwu. Tinguno alauye kumtsu pututa kilo kighide puwove.

³Jonathan no Filistiyami ghushimi shou ahza kutsuu Geba ipikeu lono heqhivetsu, eno tipau sutsa Filistiyami kumtsuno chilu. Tishike lono Saul no aghini kishimi hapuwu puzuno Ibrimi pelono aghu shiwupe nike aghakhu kumtsulo afuko igha.

⁴Israilmi kumtsu vilo Saul no Filistiya ghushimi shou ahzakutsuu heqhive keu eno Filistiyami no panongu ju kuchhube chekeu pikulhapua. Tighenguno ku akeu sutsa timiqo no chiluno Gilgal lono Saul gholo hekutsupe ngolu.

⁵Filistiyami no Israilmi sasu aghu shinike kumqoluve; panonguye khurkulu 30,000 ae, khurshi ghushimi 6,000 eno azughilo saye toi ghushimino kihikha mla kepushi kuchoqhe ae. Panonguno Miqmas lo Bethaven lono kipela kudau panongu ghazu shino ngolu.

⁶Tishi puzu panonguno khughu shi Israilmi lethuve, ikehu Israilmiye kumu shimlave. Israilmi khamiye asuki, atuki, akuthoku, alahu kumtsu lo itshu lukhave;

⁷khamiye Jordan kathasu Gad ngo Gilead lughi kudau polukha. Ikemu Saul ye tikutolo Gilgal lo ngo ae eno pa gholo ngo akemi timiqoye akumsa launo khokhoshive.

⁸Paye atsala tsuni kutolo Samuel khea, kughengu Samuel no tishilopi pa vilo pipua kehu, ikemu Samuel ye tikuto lo Gilgal lo ighimono ae. Ikehu timiqoye Saul khemono pokhave,

⁹tishi kelono pano panongu vilo pi, “Pitikumlla ghakishi ngo kuposhukulu ghakishi kuma ilau sughilo.” Pano pitikumlla ghakishi tsukeu taveni kiche launo,

¹⁰Samuel no ighilu. Saul ye pa sasu kusholuniye khalacheu ipeno pa sasulu,

¹¹ikemu Samuel no pi, “Noye kiu mlave akya?” Saul no khochile, “Timiqono ikhemono pokhave eno noghi ighinie pikeu kiqi lono ighimove; tinguno alauno Filistiyamino Miqmas lo homxa pesu kheluve.

¹²Ikehu niye hitoi kumsuve, Filistiyamiye hile Gilgal alono ni leniye shi ayeakena eno niye AMPEU lopu shilu amoe. Tighenguno aghakishi lakhi shipesu tsumasa kenapi ilolo ighive.”

¹³Samuel no pi, “Tiye ighono nikhanigha kumla shivae, Noye AMPEU oLhou no ahza otsukeu gho lumovae. Tsala nono pa gholukepi aye opelono eno olagha qo pelono alhokuthu Israilmi shou kalupeni cheke.

¹⁴Ikemu oyehkipeye pekibe wolumae. Kughengu nono pa hebidevae tighenguno AMPEU ye pano lunishi akeu timi kisheluniae eno pa pelono pawu timiqo shou ayehkipeu shilu peniae.”

¹⁵Samuel ye tithiu Gilgal qhiveno pa lalo cheve. Timi khijehi ngo akeno tipaqono Saul papesu pawu ghushimi gholo kuqhanike wuve. Panonguye Gilgal lono chesu Benjamin lughi kudau Gibea lo cheve. Saul no pawu ghushimi xujukelo timi 600 toike aghi.

¹⁶Saul ngo panu Jonathan eno pano wu timiqo ishi Benjamin lughilo Geba ipi keu alo aghazu shilu; eno Filistiyami no Miqmas ipike alo aghazu shino ngoa.

¹⁷Filistiyami ghushimi aloji kuthu shipuzu pano ghazu lono ipeghino aghulawu: aloji lakhino Shuwal lughi lono Ofra kudau wuve,

¹⁸aloji lakhino Bet Horon eno aloji akuthuuno Zeboyim Khila juqhilu ake kudau eno aghasa lau wuve.

¹⁹Israil yeghi kumtsulo ayikiyiqi phumlave; kughengu Filistiyamino ishi pi, “Ibrimi pelo pano kutoshino azutakihi momu angu mlalukeu shiju peniu.”

²⁰(Israilmi ye kumtsuno Filistiyami lau ighino panongu cheqha, akuphu, amughu eno hashiwo chighinike ghenguno wumasave cheke;

²¹amughu kichighi me eno ayi cheqha kutsughameno pisa lakhi luche eno akuphu kichighi meno pisa kini ishi luche.)

²²Aghu shike tsalani Saul ngo panu Jonathan pama likhino azuta angu pe akethono Israilmi ghushimi khuu ulomu azuta angu kuhave.

²³Filistiyamino ghushimi aloji lakhi Miqmas la kheluvepe nike hapuwuve.