Read Sumi Naga SAMUEL ATUGHIU 15 Bible Online

SAMUEL ATUGHIU 15 - Sumi Naga bible

SAMUEL ATUGHIU 15

¹Samuel no Saul vilo pi, “Niye AMPEU no puwu keu, teli pesu nukishepe pawu timi Israilmi shou akukau shilupe niye okishekeu huke. Tighenguno AMPEU Akughushuuno kiu pi anikeno inijulo.

²Pano Amalekmi aghime tsunicheni kughengu panongu puasu no Israilmi no Ijip lono ipecheke ghulokilo lakhachileke.

³Wulo eno Amalekmi lepuzu panonguno pighi aghikeu kumtsu shipusa khavetsulo. Kiu nhemghamu qhikevilo, kiptimi, totimi, atianuli, anga kughunu, amshi, bheri, kemel eno gadaha hipaqo kumtsu pithi khavetsulo.”

⁴Saul no pawu ghushimi kumtsu ku-kutsuno Telem lono panongu kihiju: ikelo Israil lono ighikeu ghushimi 200,000 eno Juda lono ighikeqo ghushimi 10,000 ishi hekutsu kumqolu.

⁵Tithiu Saul ngo pawu ghushimi Amalekmi phughilo ilono aghoki qhaikeu mukulo asumnipho lo ithsupe miqea.

⁶Tile Saul no Kenaimi vilo pi, “Chevelo, poluvelo, Amalekmi gholono kututa shi chhiliu poluvelo, mthano panongu gholono aqoshi nongu shipsa luve nosake; kughengu nonguno Israilmi no Ijip lono ipecheke ghulokilo kikimiye pephe tsupe puani.” Ike Kenaimiye Amalekmi launo kututa shiveno pokhave.

⁷Saul no Amalekmi leluve, Havila lono wo Ijip yeghi kipela kudau akeu Shur kutolo aghushi susu ighie;

⁸Pano Amalekmi kukau Agag akuxuno kughaluve ikemu kutamiye kumtsu pithikhave.

⁹Ikemu Saul ngo pawu timiqoye Agag pithimove, eno bheri akiviu, amshi akiviu eno amshiti kivi eno bheriti, momu thime akivi lakhimu kutsakungomove; ame kuhano avehupu shimokeqo likhi kutsakungovetsu.

¹⁰AMPEU no Samuel vilo pi,

¹¹“Saul pelono akukau shilu pe keuye imlo savae; paye ilauno tsughuvae eno izah kutsuqo hebidevae.” Samuel ye agha ideve puzu putho kupuju AMPEU vilo qhuiniju ae.

¹²Thanau itheno paye Saul phuwuniye cheve . Pano chilukeuno Saul ye Karmel taun lo wuvapi chilu, tipa alo pa likhi pa kutoshino kumsuma mokeu michipu tu shoveno Gilgal lo cheve aghi.

¹³Samuel no cheiqhoghino Saul sholu kelo Saul no petha pa tsughi ishi pi, “Samuel, AMPEU no okumgha tsupeniu! Niye AMPEU zah kutsu gholuvae.”

¹⁴Samuel no iniju, “Tishiaye kishieno niye amshi ngo bheriqono igha akeu chilu anikya?”

¹⁵Saul no khochile, “Iwu timiqono Amalekmi launo sughikeuke. Panonguno bheri eno amshi akiviu AMPEU oLhou lau aghakishi tsunike ghenguno heqhimono pe puanie, ikemu tinguno alauye ninguno kumtsu kutsakungopeve tsuae.”

¹⁶“Inaqhoivelo,” pi Samuel no ghasuve, “Iji AMPEU no ivilo kiu pikeno ti ovilo pitsuni.” “Ivilo pilo,” pi Saul no pi.

¹⁷Samuel no khochile, “Noye olikhi opesu kumu akhotoshi kumsumo namu, noye Israil shiyeh sakipheu ke. AMPEU no opesu Israilmi shou akukau shipenike okishelue,

¹⁸eno pano ahza lakhi otsupuwu keuye Amalek lhoksa kughami kumtsu puxu kevino pithivelo pi ahza otsue. Panongu heqhi khamphi kutolo aghushi alopi ovilo pie.

¹⁹Tishi aye noye kughiye hakholukeu nhemgha suxachuve kya, eno tishi keu lono AMPEU loshipusuve tsu kya?”

²⁰Saul no ghechile pi, “Niye AMPEU gholuvae, pano ivilo piketoi wue eno akukau Agag sachile saghi eno Amalekmi kumtsu pithivetsuae.

²¹Ikemu iwu timiqono bheri ngo amshi akiviu khikhi panonguno lelukeno tipaqoye pithimove; tishinike zuqhu, panonguno tipaqo pesu hile Gilgal lo sughino AMPEU oLhou lau aghakishi kumlla shiniye sughi khae.”

²²Samuel no pi, “AMPEU ye khikhiu pulo ani kya? aghokulu keo, akumlla eno aghakishi kya? Bheri akiviu pesu pa mllani kepu zuqhuye pa gholu keuno akiviu.

²³Pa ghobide keuye atumu sasu aphiphie, eno amlo kumka huye ajulho mllakeu xine sasu aphiphie. Kughengu nono AMPEU zahkutsu milive kehu pa ghi okuka kishi milivae.”

²⁴Saul no khochile, “Iye, ino axine mlavae, ino AMPEU zahkutsu gholumove eno nono mijepiye keu hebidevae. Niye iwu timi msave kehu panonguno shinishi keu shivepeke.

²⁵Ikemu ino oqhuiniju ani, ixine qhivetsulo eno isasu Gilgal lo idewolo eno ipelono AMPEU mllalu pelo.”

²⁶Samuel no khochileve, “Niye osasu idewomlae, kughengu nono AMPEU zahkutsu milive kehu pa ghi noye Israilmi shou akukau shi akeu lono omilivae.”

²⁷Tishieno Samuel ye woveniye xatsughu wove, ikemu Saul no pa phi chijeboboi uchekeu tsuquluveno suxuvetsu.

²⁸Tileno Samuel no pa vilo pi, “AMPEU no ishino olauno Israil kukaphu kubove tsua eno onguno akiviu timi tsuveniae.

²⁹Israilmi akughushu Lhou ye miki chemoe momu pa mlo kilive chemoe. Paye timi lakhi kumoe- paye pa mlo kilichemoe.”

³⁰Saul no pi, “Niye axine shivae, ikemu iwu timi sakiphemi eno Israilmi kumtsu zulo sukumsa ipiye tsulo. Ipuzu isasu idewono ipelo AMPEU oLhou mllalu pelo.”

³¹Tishi piauve kehu Samuel no pa sasu Gilgal lo idewo eno Saul no tileno AMPEU mlla.

³²Samuel no ahza tsu, “Akukau Agag ilau saghilo.” Agag no pa lau ighi, akumsano thuthushi, pa likhi pa mlo kutono hishi kumsughi ighi, “Thiveni keuye kiutoi kukhu kimjikelae!”[4]

³³Samuel no pi, “Ozutano aza kutomo anga kuhavepe ketoi, itehiye ozauno anga kuhakeu shive peniae.” Tishi pino Samuel no Gilgal lo akumlla khache a lono Agag miche peve.

³⁴Tishive kethiu Samuel ye Rama lo cheve eno akukau Saul no pa ki Gibea lo wove.

³⁵Samuel ye tithiu pano thimoke kutolo akukau Saul putsawumove; ikemu pa ghenguno amlo imeche. AMPEU ye Saul pesu Israilmi shou akukau shivepekeu ghenguno amlo save.