Read Sumi Naga SAMUEL ATUGHIU 16 Bible Online

SAMUEL ATUGHIU 16 - Sumi Naga bible

SAMUEL ATUGHIU 16

¹AMPEU no Samuel vilo pi, “Noye khitohilo Saul ghenguno amlo iju aniye kya? Niye pa pelono Israilmi shou akukau shipemo nikeu shi milivae. Tighenguno noye oliv teli pesu Bethlehem lo timi lakhi paje Jese lau wulo, kughengu ino pa nuli gholo milakhi kishepesu akukau shipeni keu shivae.”

²Samuel no iniju, “Niye kishino ti shiluni kya? Tsala Saul no ti chilu aye, paye ipithive nani!” AMPEU no khochile, “Noye amshiti lakhi ogholo sawulo eno noye AMPEU lau aghakishi kumlla tsuniye ighi ani pilo.

³Ti aghakishi shiakelo Jese ghi kusulo, tishiaye nono kiu shikepu keno ino ovilo pitsu nani. Noye ino timi kiche tsunike tipau pesu akukau shipenike telino pa nukisheluvelo.”

⁴Samuel ye AMPEU no pa vilo kiu shilo pikeno shinike ghenguno Bethlehem lo wuve, tilehi aphughilo sakiphemino msa khokhoshi pa sasu kusholuno iniju, “Tungkupuo noye alokughunopu xukuju shi ighi anikema?”

⁵Pano khochile. “Iyei niye AMPEU lau aghakishi kumlla shiniye ighi anie. Nongu likhi nongu shikimtheveno igholo ighilo.” Pano Jese ngo pa nuli vilo ghi panongu likhi panongu shikimtheveno aghakishi alo ighilo pi panongu kusu.

⁶Kughou panonguno wo a-a tolukeno, Samuel no Jese nu Eliab ithulukelo pa likhi pa putsaghi ishipi, “Timi hilehi puthugho akeu hipauno AMPEU no kishelu keu shi aghinani keniae.”

⁷Ikemu AMPEU no pa vilo pi, “Pano kishi qhemghai eno ajukivi shi aghinamu tiye jukevilo. Niye pa milivae, kughengu niye timino kughathabe ketoi kughathabe chemoe. Timiye ashou jukivi phucheni, ikemu niye timi mlo likhi jucheni.”

⁸Tileno Jese no pa nu Abinadab Samuel lau saghi. Ikemu Samuel no pi, “Moe, AMPEU ye hipau kishe puamoe.”

⁹Jese no Shamma sasu ighi. “Moe, AMPEU ye hipaumu kishelu puamoe,” ipi Samuel no pive.

¹⁰Hitoi shighi Jese no pa nu tsuni kumtsu lakhi khino Samuel lau saghino piye. Tileno Samuel no pa vilo pi, “Moe, AMPEU ye hipano tsuni lakhimu kishelu puamoe.”

¹¹Tishi pino pano pa vilo iniju, “Noye hinguno alau anu anikeo kuhavea kya?” Jese no khochile, “Kumtsu nguno aitiu aphie, ikemu paye hulau bheri khe anipeke.” Samuel no pi. “Pa pelo hilau ighiju pelo. Ninguye pano ighimoke kutolo aghakishi kumlla tsumono aghinie.”

¹²Ike Jese no pa kusaghi. Paye ighono aju alo, ashi aji kivimi lhothemi shia eno pa nhethiye tsughukhuike. AMPEU no Samuel vilo pi, “Hipau ke-teli pesu pa nukisheluvelo!”

¹³Tileno Samuel no oliv teli ikhipheno pamunoqo kua lono David nukisheluve. Paikhavi lono AMPEU ghunguno David shou ikughive puzu tipa tsalanino pa sasu ngouve. Tishiveno Samuel ye Rama lo idewove.

¹⁴AMPEU ghunguye Saul qhive, tileno aghungu lhoksa AMPEU no puwukeu huno pa shikighime thuve.

¹⁵Pa qemi qono pa vilo pi, “Alhou no aghungu lhoksa puwukeu huno oshikighime aniepi ninguye ithi ani.

¹⁶Tighenguno ahza ningu tsulo akijeu, tishi aye nino timi lakhi akighilebo ighathi aghikeu phusaghinie. Tishi aye aghungu lhoksa lakhi olau ighikelo, timi huno pa lebo igha aye noye achipishi luve nani.”

¹⁷Kuchono Saul no ahza panongu tsu, “Khuuno akivishi alebo ighathi anikeno timi tipau phulu aye ilau sasu ighilo.”

¹⁸Tilehi pa khe akemi gholo milakhino ishi pi, “Bethlehem taun lo Jese nuli gholo milakhiye ale phekithi ani. Paye amlo kivimi eno pa jughi ighono aloe, aghukivimi lakhi eno atsapilo ghi thayike AMPEU ye pa gholo ani.”

¹⁹Tighenguno Saul no pa ghinikishimi Jese lau puwuno ishi pilopi, “Onu David bheri khechekeu ilau hapuwu lo.”

²⁰Jese no gadaha lakhi pelono asho chhitoi xapupe, aneti lakhi eno ashiyiko bohu lono aji chhitoi pilisu tsuno David pelo Saul lau wupeke.

²¹David no Saul lau ighi puzu pa kumla shinikeu shive. Saul no David ju ighono pa lokutuno pa pelo pa ghunanu pekishe xapupeni keu timi shi pa kisheluve.

²²Tileno Saul no asutsa lakhi Jese lau puwu: “Niye David ilo ani. Tighenguno pa pelo igholo apenikeu shitsulo.”

²³Kughokughomu aghungu lhoksa lakhi Alhou no Saul lau puwu ke ghulokilo David no pa kighilebo ighathuveche. Tishi aye aghungu lhoksaye wuveche eno Saul ye alo tsukithelu che eno itaghi puzuu toi achipi shivecheke.