Read Sumi Naga SAMUEL ATUGHIU 20 Bible Online

SAMUEL ATUGHIU 20 - Sumi Naga bible

SAMUEL ATUGHIU 20

¹Tipathiu David ye Rama lo Naiot lono pove eno Jonathan lau wuve. “Niye kiu mlave kya?” pi pano iniju. “Niye kiu lhoksa kumla shive kya? Niye kiu kipimi kumla shivekeno opuye ipithiveni shi kutu anikya?”

²Jonathan no khochile, “Opelo thivepeni keuye Alhou pulou kumoe! Julo, kije na aghulo namu ipuye kumtsu ivilo pive cheni; ikemu kishino ipuye ilauno hipau kusuve anikya? Khilemu hishi chemokeno!”

³Ikemu David no khochile, “Nono kiutoi iju alo chenikeno opuno akivishi ithi ani eno pano kiu kughu anikeno opelo ithi pemonikeu shi kughakutha shipuani, kughengu nono ithive aye noye ighono omlo ghuzave niae. Ino Alhou jelono ovilo tushoqhi pi anike niye akithi lono kupkado lakhimu kumovae!”

⁴Jonathan no pi, “Nono kiu shinishi anikeno ino shitsunie.”

⁵Tileno David no Jonathan vilo pi, “Thoghi tsalaye aqhithe pinye ke eno niye akukau gholo chuke pushi ani. Tighenguno nono pulo aghi aye, niye thoghi aghiniu kutolo alulo itshuu veni.

⁶Tsala opuno ino aghulhu lupalo kuhakeu ithuluno ighiju aye pa vilo paye Bethlehem lo pa kilo wovae pivetsulo, kughengu pa kibolomi ghenguno ampelo aghakishi tsuchekeu kumlla tsukepu do toveke ghenguno wove ake ithe wokepu zah pa tsutsulopi pithivetsulo.

⁷Tsala pano ‘kumu kumoe’ ipi aye niye xaluniae; ikemu pano amlo ideuve aye paye ighimeqhi nike kuchughu pesu aniepi nono ti ithivelo.

⁸Ighenguno aghini hipau shitsulo nono isasu ashou kuchou shilukeu kiqi lono ino kiu opithivea keno amlolo qhi luvelo. Ikemu ikipimi shi aghi aye, nono iheqhivelo! Kushiye isasu opu pelono iheqhi pithi penike pa lau isawu anikya?”

⁹Jonathan no khochile, “Khilemu akukumsu lomu hikithipu kumsu phekevilo!” “Ipuno opithiveni keu kuchughu akeu ithike aye niye ovilo pimoni chekesha?”

¹⁰Tileno David no iniju, “Opuno amlo ide okhochile keu khuuno ivilo ighino pitsuni kya?”

¹¹Jonathan no khochile, “Nikujo alulo huni kholo.” Ikehu pama kumtsa alulo huve.

¹²Tileno Jonathan no David vilo pi, “AMPEU Israil Lhou no nikujo dolo thopi shipeniu! Thoghiu hipa ghulokilo eno aghiniu ngo ishi ino ipu vilo inijuni. Tsala pa kukumsu olau achipilo shi aghi aye ino atsa olau pipuwuni.

¹³Tsala pano opithiveni keu kukumsu lhoksa aghi aye niye ovilo pimono ngomlae eno opelo polu pemo keloye AMPEU pelono iheqhi pithive peni, AMPEU no ipu gholo aketoi pa pelono osa chepeniu!

¹⁴Ino akuxu achili shilu aye owu tuqhou shoqhi qhino ilau aghokulu shilo; ikemu tsala ino thivekepu shive aye

¹⁵isholokumi lau kikimiye eno aghokulu ilau shiketoi piyetsulo. Kughou AMPEU no oghumi kumtsu shipuhakhave tsuni keno,

¹⁶nikujo dolo tushoqhi puakeu kubo kevilo. Tsala ti hephove aye, AMPEU no aghime otsu nani.”

¹⁷Jonathan no itaghi David pelono pano ighono David kimiyeshe keu hutoi pa ghi tipaphi shi pa kimiyelo pi tushoqhi kithepe.

¹⁸Tileno Jonathan no pa vilo pi, “Thoghiuye Aqhithe Pinye ghulhu shi ani, eno nono aghulhu alo kuhakeu mlalei ithive nani.

¹⁹Tinguno alau aghiniu kutolo nono kuhave keu mutsuqhei ithive nani; tighenguno ghulo kutau toi nono khile itshu chenikeno tipa alo wuvelo eno atupikiye ihjepe itshuluvelo.

²⁰Tileno ino amchi shikeulo vepuku aketoi ghuthu kuthu apiji tipa alo vepukuni.

²¹Ipuzu ino iqemi vilo wuno tipau phusughilo pini. Tsala ino pa vilo apiji hi khalacheu kudau anike juno sughilo ipi aye tipau kiqiye noye kumu msakepu kuhake ghenguno ashou ipeghilu nani. Ino xukuau AMPEU jelono pi anike noye kumu kumsapu sholupemo nani.

²²Ikemu tsala ino pa vilo ‘Apijiqo ovechesu hukudau anike pa lokutovelo’. ipi aye AMPEU no ohapuwuve anipi ithiveno chevelo.

²³Nikujo lakhino lakhi sasu pulokile keu shoqhi chuvekeu kiqi lono AMPEU no tipau nikujo dolo puatsulu nani kepi pulu ani.”

²⁴Tighenguno kughapua ketoi David ye alulo itshu auve. Aqhithe pinye ghulhu lo akukau Saul no aghulhu alo ighilu,

²⁵eno thosu pa lakhua kudau atozu phivilo iqaluve. Abner no pa phivilo iqa eno Jonathan no pa gizuu shi-ghi aghulhu lupa halau iqa. David-a loye khumu ngomono kumsa shia,

²⁶ikemu Saul ye tipa tsalani kumu imijumoe, kughengu pano kumsukeuno, “Pa lau kiwala kupunave kehu, paye aphi kimthe shimlano auve kughashi ae.”

²⁷Tishiwo thoghiu, Aqhithe Pinye ghulhu thiu ghi David no ngokepu a loye khumu ngomono kumsa shiae, tileno Saul no Jonathan vilo iniju, “Kiu shivekeno David ye ighina ghi ishighi aghulhu alo ighimove kya?”

²⁸Jonathan no Saul khochile, “David no Bethlehem lo wunike ghenguno ivilo ahza khuauve;

²⁹pano ishi pike, ‘Ipelo wolupelo, kughengu ni sholokumi ampelo shichekeu ghakishi ti taun lono shi ani. Ikehu imunoqono nighi tilehi ighilopi iku ani. Tighenguno niye oshou kuchou ipi ikhilu aghi aye ipelo wono imunoqo putsau lupelo.’ Hipaqo ghenguno David ye akukau ghulhulo sumlavae.”

³⁰Tileno Saul ye Jonathan jupesu ighono pa mlo ideveno pi, “No asalhau! Itehino ino ithiva, noye David saphu ani, ipuzu olikhi oshiputha eno oza ghi shiptha ani!

³¹David no xu ake thaqhu loye noye khilemu hipa ghakhu shou akukau shiluni chemoepi noye vethalumo kesha? Itehi mtazu wuno pa sasu hile ighilo, paye thive masa putsae!”

³²Tileno Jonathan no papu Saul ghechile ghi ishi iniju, “Kiu ghenguno pa pithiveni kya? Paye kiu mlapusa puani kya?”

³³Tishi iniju kemoayeno Saul no angu pesu Jonathan yiveniye chhepuwo, tileno Jonathan no mutsuqhei papuye David pithiveniye shi anikenapi vetha luve.

³⁴Jonathan ghi amlo ideveno aghulhu lupalo kutope qhipuakeu kumu chusho tsumono puthughove—tiye Aqhithe Pinye ghulhu tsala akiniu loke. Paye David ghenguno ighono pa mlo sathuve; kughengu papu Saul no ighono pa thaigha ke.

³⁵Jonathan no David sasu ashoqhi shipua keu kiqi lono paye tishiwo thanau pa putsaniye alulo huve. Pano pa gholo itimi kitila lakhi sasu wuno

³⁶pa vilo pi, “Ino apiji kapuwunike posu wuno sughilo.” Itimi huno powu eno Jonathan no apiji pesu pa hechesu kapuwuve.

³⁷Kughou itimi huno powo apiji khile vesukeno tipaa toluke mtsa Jonathan no ighamuku pa vilo pi, “Apijiye hu agizuu aghaulo ani!

³⁸Tile puthugho ngokevilo, papashilo!” Itimi huno apijiqo ikhiluveno suwo pa tsuve.

³⁹Kiu kiqi shi anikela paye kumu mthae; ikemu Jonathan ngo David pama likhino kusuqe puakeu ithive,

⁴⁰Jonathan no pa ghunanu pesu itimi ulo suvetsuno pewo taun lo qhi puaghi tsulopi puwove.

⁴¹Itimi huno cheve kethiuno David no atupikiye tikhau no puthugho ithughi no khonhequ pa gizulo pishiqhope ghuthu kuthu itsaqi tsu. David ngo Jonathan pama kumma ghi qaukhave. David mlo ghime nguno alauno Jonathan no amlo ihshi kutuve.

⁴²Tileno Jonathan no David vilo pi, “Alhou pelo osachepeni. AMPEU pelo nikujo dolo eno nikujo lagha kughuko dolo kiutoi nikujo lakhino lakhi lau tushoqhikile keno hipau alhokuthulo tishi alupeniu.” Tishiveno David ye cheve eno Jonathan ye idechile taun lo wove.