Read Sumi Naga SAMUEL ATUGHIU 22 Bible Online

SAMUEL ATUGHIU 22 - Sumi Naga bible

SAMUEL ATUGHIU 22

¹Tipathiu David ye Gat phughi lono pove eno Adullam taun phivilo atuki lakhilo itshuluve; Kughou pamunoqo eno pano bolomino paye tilehi anipikeu chiluno panongu ghi pa gholo kumtsa ngoluve.

²Amlo ghujumiqo momu api kupumi momu aloino mlakeqo kumtsu kuqhakelo pano 400 hekutsuluno pa lau cheve eno pano panongu sakiphetou shilue.

³David ye tileno chesu Muab yeghilo Mizpa lo ighilu eno Muab kukau vilo ishi pi, “Ipu ngo iza pama pelono ighino osasu ngolu penima ino Alhou no ighenguno kiu shikepukeno phulumono akedolo.”

⁴Ikehu David no papu ngo paza pama sawo Muab lo akukau gholo qhive eno pamaye David no atuki lo itshuake kutolo tilehi ngove.

⁵Tishiake lono tungkupu Gad ipikeuno David lau ighino pi, “Noye hilehi ngokevelo; ikemu mtazu Juda yeghilo chevelo.” Ikehu David ye tipa-a qhiveno Heret ghasulo cheve.

⁶Ghulo lakhi Saul ye Gibea lo ato lakhilo tamarish subo qholo iqa-a, pa ulo angupa pea eno pawu ghushimi no pa homxa pesu puthugho khea. David no pawu timi phupheluvae pi khamino pa vilo pikehu,

⁷pano ishi pawu kijemi vilo pi, “Inijulo, Benjamin lagha timiqo! Nonguye David no aluqhaqo, atsailuqo tsuni kughashi kumsu anikesha eno nongu pesu pawu ghushimi kijemi shipeni cheni kughashi anikesha?

⁸Tishikehu nongu kumtsu no imithi anikesha? Inu kuchouno David sasu kuqhano imithi akeu nongu khunomu ivilo pimoe. Nongu khunomu ighenguno alokumsu shitsumoe momu David, khuu iwu timi keno pano iheqhi pithiveniye adokivi phu akeu ghili eno inuno pa gholo sukuqhano pa shikumto animu khunomu tipau ghili ivilo pitsumoe!”

⁹Doeg ye Saul wu kijemi gholo puthugho ngoa eno pano pi, “Niye David no Nob lo akeu Ahitub nu Ahimelek lau wuchekeu ithulue,

¹⁰Ahimelek no AMPEU vilo David ye kiu shipemasa keno inijuju, tishino pano David achuqupu tsu eno Goliat khuu Filistiyami keno pa zutakihi ghi pesu David tsukeu ithuluke.”

¹¹Tileno akukau Saul no achineu Ahimelek eno pa bolomi kumtsu khunoqo Nob lo achineu shi akhakeno panongu kuwupe, ike panonguno pa lau ighi.

¹²Saul no Ahimelek vilo iniju, “Inijulo, Ahimelek!” Pano khochilepi, “Akijeu kiu shilepi anikya?”

¹³Saul no pa vilo iniju, “David okujoye kushiye imithi anikya? Noye kushiye achuqupu ngo azutakihi pa tsu kya eno pa ghenguno Alhou putsatsu kya? Kughengu paye isasu kimthiuva eno iheqhi pithive niye adokivi phu auvae!”

¹⁴Ahimelek no khochile, “David ye kijemi dolo ighono aghokuluu! Paye omakishiu eno oghukhe tou ke: tinguno alau akukau kuka kilo kuami kumtsuno akiqheu lono pa gihu ikhiluchekemie.

¹⁵Iyei, niye pa ghenguno Alhou putsa tsu, eno tiye ishino atughiu kumoe. Opithiveniye amuqu phu ani pikeuye akijeuno kimiyeno inguku tsukevilo momu nikibolo khumu nguku kepukumoe. Kughengu tipaqo ghili niye kitilamu mthae!”

¹⁶Akukau no pi, “Ahimelek, no eno obolomi kumtsu thivemasae.”

¹⁷Tishino pano aghukheu pa phivilo puthugho akeu vilo pi, “AMPEU wu achineu heqhi pithivelo! Panonguno David sasu kuchughuno paye pove amu ivilo pimoe, panonguye hipaqo kishekulu ithi amu pimoe.” Ikemu aghukheuno adoulo ye AMPEU wu achineu ghiqhi pithiveni keu pawu suqhemoe.

¹⁸Tileno Saul no Doeg vilo pi, “Nono panoqo ghiqhi pithivelo!” ike Doeg no panongu kumtsu ghiqhi pithive. Tipatsalani pano achinemi khunoqo amchi mlakuxa phi ukuzu keno pano lhotache pungu ghiqhi pithive.

¹⁹Saul no achinemi phughi Nob lo kughuna kuami, kiptimi, totimi anuli eno anga kughunu pichepighi, gadaha, bheri hipaqo kumtsu ghiqhi pithi khavetsu.

²⁰Ikemu Ahimelek nu gholo milakhi Abiathar ye pokaluveno paye David gholo sukuqhaluve;

²¹Pano poighi lu puzu Saul no AMPEU wu achinemi pithivekeu ghili David vilo pitsulu.

²²David no Abiathar vilo pi, “Ino Doeg ithulu ke tsalanino paye hipaqo kumtsu Saul vilo pive nani pikeu ithi ae. Nobolomi thivekeuye ighengunoke.

²³Noye igholo ngovelo, khilemu msakevilo. Saul no nikujo heqhiveniye phu ani, ikemu isasu aye osusholu nani.”