Read Sumi Naga SAMUEL ATUGHIU 23 Bible Online

SAMUEL ATUGHIU 23 - Sumi Naga bible

SAMUEL ATUGHIU 23

¹Filistiyami no Keila taun le akeu eno aghi lupuwo qhipuakeu pukaluve tsu anipikeu sutsa David no chiluve.

²Tighenguno pano AMPEU vilo iniju, “Ipelo wuno Filistiyami lewu pemokesha?” AMPEU no khochile, “Iyei, wuno panongu lelo eno Keila susholu tsulo”

³Ikemu David wu timiqono pa vilo pi, “Ninguye Juda lo ngo akeu ghi kumsapu lukumkha shi ani, tishiaye tinguno alau ninguno Keila lo wupuzu Filistiyami ghushimi lenikeuye alhoksa kutuu shiniae!”

⁴Tighenguno David no itaghi AMPEU iniju eno AMPEU no pa vilo pi, “Wupuzu Keila levelo, kughengu Filistiyami shou tokulu shipenikeu ino otsu nani.”

⁵Tighenguno David ngo pawu timiqono Keila lo wuno Filistiyami lethu; panonguno timi kutomo heqhi pithivetsu eno panongu pichepighi ghi kutomo luvetsu. Tishikeu lono David no taun tipau susholuvetsuke.

⁶Kughou Ahimelek nu Abiathar no pokalukeno paye David gholo Keila lono kusholu, pa gholo amchi mlakuxa phi pesu wuveke.

⁷David ye Keila lo ighi anipikeu sutsa Saul vilo pithive. Tileno Saul no ishipi, “Alhou no pa kughapesu iulo suvetsuae; kughengu pa kutoshino ayino putukha puakeu eno khagho supuakeu taun lo iloghivae, pa likhi pa khathaluvae.”

⁸Tileno Saul no timi kumtsu kukutsuno Keila lo aghushiwuno David ngo pawu timiqo kughalopi ahza tsu.

⁹Kughou David ghi Saul no pa lenike akupughu shi akeu chilukeno, pano achineu Abiathar vilo pi, “Amchiphi hile sughilo.”

¹⁰Tile no ishipi, “AMPEU, Israil Lhou, Saul no ni oqeu lenike ghenguno Keila taun leno kutsa vetsuniye akupughu shi anipikeu chilu ani.

¹¹Keila lo xukuamiye igholono Saul ulo ilovepenikeo? Saul ye ino chilu aketoi kuchouno hilau ighini chinikesha? AMPEU Israil Lhou, ikhochile tsulopi ino oqhuiniju ani!” AMPEU no khochile, “Saul ye ighini putsae.”

¹²Tileno David no pi,”Keila lo xukuamiye iulo suvetsuno iwu timino Saul ulo tsuve nani kesha?” AMPEU no khochile, “Panonguye oulo iloghive nani.”

¹³Tighenguno David ngo pawu timiqo kumtsu kuqhakelo 600 huye paikhavi lono Keila qhiveno panonguno khilau wuniyeshi anikeno ti kudau cheve. Kughou Saul no David ye Keila qhiveno chevae pikeu chilukeno pa kupughu shipe chekeu shimove.

¹⁴David ye tipathiu Zip ghasaqha phivilo ato ghakhulo itshu auve. Saul no tsalakipetsulo pa phujua, ikemu Alhou no David pesu Saul ulo phesutsumoe.

¹⁵David ye Saul no pa kuxu phuchekeu ithuluno ighono msa ae. David ye Zip phivilo aghasaqha Hores ipikeulo ngoae.

¹⁶Jonathan no pa lau ighi eno Alhou no pa susholu nani pikeu tsa pesu pa shikumto tsu.

¹⁷Pano pa vilo ishi pi, “Msakevilo, ipu Saul ye oghime mla nani. Kughengu paye nono Israilmi shou akukau shive nani eno ino oshelo shi akiniu lakhulo ngove nani pikeu mutsuqhei ithi ani.”

¹⁸Tishino pamaye lakhino lakhi sasu akusapau kuchou shi anikeushi AMPEU zulono tushoqhikileve. David ye Hores lo ngove eno Jonathan no akilo idewove.

¹⁹Timi khamino Zip lono Gibea lo Saul lau wuno pi, “David ye Judea ghasaqha apeu Hakila naghutolo ni lughi Hores lo itshu ani.

²⁰Ninguno thebeyi ithi anike, Akijeu, nono pa kughalu nishi kutu akeu; tighenguno nilughi kudau ighilo eno ninguno opelo pa kughalukepu shitsuni.”

²¹Saul no khochile, “Nonguno ikimiye keu piyeke ghenguno AMPEU pelo nongu kumghatsu peniu!

²²Wulo eno akiniu thebeyi shijulo; mutsuqheino paye khilehi ngo aghi nani eno khuuno pano tilehi ngo akeu ithulukeno mutsumisheyi shilo. Ino chikulu lo paye ighono amuqukinie pike.

²³Mutsuqhei pano a-a khipaqolo itshu cheni keno phulu aye ilau vejoi pithi kepushi ighilo, Tishi aye ino nongu sasu wuni eno tsala pano itaghi tilehi ngo aghi aye ino pa hani, Juda yeghi kumtsu xukha jukepu shi aghi namu.”

²⁴Tighenguno panonguye Saul zu iqesu Zip lo idewove. David ngo pawu timiqoye Maon ghasaqhalo ae, tiye Juda ghasaqha iqi apeu yenguyelei keu khila lakhike.

²⁵Tileno Saul eno pawu timiqono David phuju. Tipau ghili David ye ithive; tishi kehu paye Maon ghasaqha apeu atuqu ake kudau iqive. Ikehu Saul ghi ti chiluno David hasu Maon ghasaqha kumtsu phuwu.

²⁶Saul ye naghuto tuxau cheve; eno David ngo pawu timino naghuto halau ngoae; ikehu David ye Saul lau no poveniye ighono mighi ae, kughengu Saul ngo pawu timiye David no ngo akeu a kupunu khoi ighiveno David eno pawu timiqo suxaluveni cheghiuve,

²⁷tileno aghinimi lakhino Saul lau ighino ishi pi, “Mtazu ighilo; kughengu Filistiyamino ayeghi le ighi ayae.”

²⁸Tilehino Saul ye David hachekeu lono idechile Filistiyami sasu aghushiniye wove; tighenguno a-a tipau pesu Pokalukeu Tuqu kutsuke.

²⁹Tishi kelono David ye ahuu iqhove eno Engedi ghasaqhalo itshuluve.