Read Sumi Naga SAMUEL ATUGHIU 24 Bible Online

SAMUEL ATUGHIU 24 - Sumi Naga bible

SAMUEL ATUGHIU 24

¹Saul no Filistiyami sasu aghushi apuzu ide ighi kethiu, David ye Engedi ghasaqhalo ngo anipikeu ghili pa pithi.

²Tighenguno Saul no Israilmi dolo ghushimi kivimi 3,000 sasu wupuzu Aghalo Ne Tuqu kipelau David ngo pawu timiqo phusu wue.

³Pano alaghi phivilo atuki lakhi bherino ngochekeu alo ighilu eno tipau alou ilono pa tuthu pishe ghi ngoa. Ikeloye, atuki tipau alou David ngo pawu timi ghi itshuae.

⁴Panonguno pa vilo pi, “Hiye oghenguno ado kivishi ani! AMPEU no oghumi kughapesu oulo suvetsu nani pipuakeu hu, tighenguno nono pa lau kiu shinishi anikeno shiluvelo.” Tileno David no mkhano ipusu ipepuzu Saul phikuzu chijeboboikeu ashe ghothaluvetsu eno Saul ye tipau kitilamu mthae.

⁵Ikemu tishive kethiu David mlo a-a shimlave no

⁶pano pawu timiqo vilo pi, “AMPEU no kishepe akukau shi akeu impeu lau niye kumu au loqhimoni. Niye pa ghime moni kughengu paye AMPEU no kisheno akukau shi anipeke!”

⁷Tighenguno David no pawu timi vilo piputove tsuno Saul lemonikeu shive. Saul ye ithughi puzu atuki qhiveno pa lalo cheve.

⁸Tileno David no pa papesu wupuzu pa kuno pi, “Akijeu!” Saul no idetsughu ighi, tileno David no ayeghilo itsaqino asukumsa patsu no

⁹pa vilo pi, “Noye kushiye ino oheqhivenike pukaputsa anipi okidikemi tsa inicheni kya?

¹⁰Olikhi okutoshino hi ithi lumasake itehi atuki lo ngo akelohu AMPEU no okughape iulo sutsue. Iwu timi khamiye oheqhivelo pi ivilo piae, ikemu ino oghenguno amlo satsue eno ishi pive, niye pa ghimemo pive, kughengu noye AMPEU no okisheluno akukau shi anike.

¹¹Julepi, ipu, ophi kukuzu she iulo hi ghotha pesu pecheni! Niye oheqhi luvekepu shiae, ikemu tishinike zuqhu aphishe likhi ghothaluvetsue. Tighenguno hileno nono ithimasake niye omujochileni keu kukumsu mu kuha momu oghimeveni keu niye khilemu alolo kuhae. Nono iheqhiveniye ihacheni, niye olau kiu lhoksa kumla kumu mla puamoe.

¹²Nikujo khiuno kuqu anikeno AMPEU no nikujo dolo xatha tsu apeniu! Nono imthi anike ghenguno pa pelono aghime otsupeni, ikemu niye kumu oghimemo nanike jualo.

¹³Khaghilo ishi pichekeu tsa nono ithi ani, ‘Alhoksaye alhoksami likhino mla cheni?’ Tighenguno niye oghimemo nani.

¹⁴Julepi Israil kukau ye khuu heqhiniye pukaputsa ani kya? Julo, paye khuu hakuqo cheni kya? Atsukithi hacheni keo, ahi hacheni kya?

¹⁵Nikujo khuuno akipimi shi ani keno, AMPEU no xathatsu peni. Pa pelo akukupuna lo juno isaphu tsupeni eno olauno ixa phelu tsupeniu.”

¹⁶David no pita kemtsa, Saul no pi, “Inu David, noye kuchouno athotsa piani kesha?” pi ghi qauve.

¹⁷Tishino pano David vilo pi, “Noye achipiloe eno ino kuqu anie. Noye ilau kimiyekeu acheni, ino olau akumou akuqu mlae pinamu!

¹⁸Ishino noye kiutoi akivimi keno ipiyevae, AMPEU no ikughape oulo sutsu keghi noye iheqhimove.

¹⁹Timi lakhiye ghuthu khijehilo pa ghumi kughaluno pa ghimemono phepuwovelu kulupu kya? Nono ishi ilau kiu mlavetsu keno tipau ghenguno AMPEU no okumgha tsu apeni!

²⁰Ino thebei ithivae nono Israilmi kukau shilu nani eno ayehkipe qholo akukaphuye ishokibe wolu nani.

²¹Ikemu AMPEU jelono noye ilagha kughuko pukhaphe tsunikeu, ije eno isholokumi je kumsumamo nikeu shoqhi shilo”

²²David no tishi tsuniepi pulove. Tishiveno Saul ye pa kilo idewove, David ngo pawu timiqoye panongu no itshu akeu alo cheve.