Read Sumi Naga SAMUEL ATUGHIU 28 Bible Online

SAMUEL ATUGHIU 28 - Sumi Naga bible

SAMUEL ATUGHIU 28

¹Tithiu kushuwa kumolo Filistiyamino panongu wu ghushimi hekutsuno Israilmi sasu aghu shinikeu shive eno Akis no David vilo pi, “Ti mthauno ino ithi akeuye no eno owu timiye igholo sukuqhano ilaumi shi-ghi aghushi nani keni.”

²David no khochile. “Enoma,” “Niye oqeu eno ino kiu shikulupukeno nono okutoshino ithi nani.” Akis no pi, “Tiye ighono aghile! Ino opelo alhokuthulo ighukheu shiniae.”

³Samuel thive kehu Israilmi kumtsuno pa ghenguno mloqa tsu eno pa kumoye pano achekeu taun Rama lo shiqhovetsu. Tileno Saul no tumu chekemi eno kuduumi kumtsu pa yeghi lono haphekhave.

⁴Filistiya ghushimiye Shunem taun phivilo aghazu shino ngo ae; eno Saul no Israilmi hekutsu pesu Gilboa naghutolo aghazu shino ngoa.

⁵Ikeloye Saul ye Filistiyami ghushimi ithulu pesu paye ighono kichimamaive,

⁶tighenguno paye kiu shinikela pi AMPEU vilo iniju. Ikemu AMPEU no kumu pa khochile tsumoe, asamou nomu momu asaqhi chekeu tu Urim ngo Thumim momu tungkupmi vechewo nomu pa lau khochilekeu shitsumove.

⁷Tileno Saul no pa qholo kijemi ahza tsughi pi, “Tumu chekemi totimi lakhi phusawo itsulo, tishi no li launo kimchi juni.” Panonguno khochile, “Endor lo tumu chekemi lakhi ani!”

⁸Tighenguno Saul ye ananu kilive, timi pelo paju kimchi lupemo nike ghenguno inapugha phimini pepuveno puthono pa gholo timi kini sasu atumuu atotiu lau wue. Pano li vilo pi, “Ighenguno aghungu putsa julo eno kiu shive nani keno ivilo pitsulo.” “Ino aje pitsu kemi ghungu kuphetsulo.”

⁹Atopuu no khochile, “Saul no kishi angka lono tumuchekemi eno kuduumi kumtsu Israil yeghi lono hapheve keno nonguno thebei ithi ani. Tishiaye kishino nonguye ikitime pesu iheqhive peniye pukaputsa ania?”

¹⁰Tighenguno Saul no akimthe shoqhi lakhi shighi li vilo pi, “Xukuau AMPEU jelono ino tushoqhi anike nono tusatumo shikeu ghenguno khilemu oghime moe” pi pano li vilo pi.

¹¹Atotiuno iniju, “Tishiaye oghenguno khuu kuphe tsuni kya?” “Samuel kuphe tsulo” pi pano khochile.

¹²Kughou atotiuno Samuel ithulukeno lino kumzapushi igha qauveno Saul vilo pi, “Noye kushiye ipishiqhi anikya? Noye akukau Saul ke!”

¹³Akukau no li vilo “Msakevilo!” pi, “Noye kiu ithulu anikya?” “Ayeghi lono aghungu lakhi ipeghi keu ithulu ani,” pi lino khochile.

¹⁴“Kiutoikeu ithulu anikya?” pi pano iniju. “Muchomi lakhi ipeghi ani eno paye chijeboboi keu phikuzu pepu ani,” pi lino khochile. Tileno Saul no tiye Samuel ghungu ipeghi anipi ithiveno sukumsa michi ayeghilo itsaqi piye.

¹⁵Samuel no Saul vilo pi, “Noye kushiye ishi kupna anikya? Kushiye ipelo ide ighi ani pekya?” Saul no khochile, “Niye ighono avesa ani! Filistiyamino isasu aghushi ani eno Alhou no iqhive. Paye tungkupmi vechewo nomu, momu asamo vechewo nomu, kumu iputsamovae. Tighenguno niye oku ani eno opelo niye kiu shimasakeno pitsu peniyeke.”

¹⁶Samuel no pi, “AMPEU no opheve eno oghumi shive kethiuno noye kushiye iku anikya?

¹⁷AMPEU no ivechewono ovilo kiu pive akeno tipau kiqi lono shivae: paye olauno akukaphu ikhisuwuvea eno tipau pesu David tsuvae.

¹⁸Kughengu nono AMPEU zahkutsu hebideveno Amalekmi ngo panonguno pighi aghikeu kumtsu qhoi puhavetsumoe. Tipau ghenguno AMPEU no olau tishi mlavae.

¹⁹Pano no eno Israilmi pesu Filistiyami ulo suve tsunikeu shiva. Thoghiuye noghi eno onuli ghi igholo ngoniae, eno AMPEU no Israil ghushimi pesu Filistiyami ulo phesuvetsuniae.”

²⁰Samuel no pikeutsa chilupesu akichiqhi kelauno paikhavi lono Saul ye pawu ayeghilo xachho pesu iluqive. Paye ighono miqemilei ngoa, kughengu paye putho pucho kumu chu-shomono akehu.

²¹Atotiuno pa lau sukungu ighi puzu paye kichimamai pesu akeu ithuluno lino pa vilo pi, “Akijeu, niye ikuxu msa akemu nono inijukeu kiqi lono shitsue.

²²Itehi ino kiu inijuni keno ti shilo. Ino oghenguno achuqupu hami kuto tsuni. Noye tipau chumasae, tishi anguno noye mtotoi olalo wulukepu shi nani.”

²³Saul no alibe chumo pi milive. Ikemu pa qholo kijemi ghi pa vilo chumasa kepi auve. Tighenguno ashekhaloye pulove eno ayeghi lono ide thughino alupalo iqalu.

²⁴Atotiuye amshiti atha pubeyike pighi achekeu heqhive. Tishino lino ashomukhu kunupe kuto eno kholaqhi sumono ashopa hami shitsu.

²⁵Lino achuqupu tipaqo pewo Saul ngo pawu kijemi zulo qhitsu eno panonguno ti chulu. Tishiveno tipajino panonguye cheve.