Read Sumi Naga SAMUEL ATUGHIU 29 Bible Online

SAMUEL ATUGHIU 29 - Sumi Naga bible

SAMUEL ATUGHIU 29

¹Filistiyamiye panongu ghushimi kumtsu xukutsusu Aphek lo ngolu eno Israilmino Jezril khilalo azupuki phivilo panongu ghazu shilu.

²Filistiyami kukami pano punguno pututau ghushimi aqhe qheno eno qhethonhe qhethonheno ipeghikha; David eno pawu timi ghi akukau Akis thikhau shi-ghi alache ipeghikha.

³Filistiyami ahzakutsumino panongu ithulu puzu ishi iniju, “Ibrimiye hilehi kiu shi akhani kya?” Akis no khochile, “Hiye David ke, paye Saul Israilmi kukau qholo kijemi lakhike. Ikemu paye igholo ngovekeu ado ta kushuwo shivae. Paye ilau ighive ke tsalanino ishikutolo kiumu mlaitha pimi keu niye pa kipimi ithumlae.”

⁴Ikemu Filistiyami ahzakutsuuye Akis ju panongu mlo ideveno pa vilo pi, “Timi tipau hapesu nono pa tsuvekeu taun lo kighide puwovelo. Pa pelo ni sasu aghushiqa lo wupekepu kumoe; kughengu kichighi aghushi ake mta lono paye nodiuveno ningu mithiuve mthae. Pa mpiu sasu kulashiniye ningu timiqo pithivekeu nguno alaghi kiviu kutau ye kuhae.

⁵Kiu kiu shi aghinamu hiye David ke, khuno ghili totimino ishi ilhe shipili chenikeno: Saul ye 1,000 likhi heqhilue, Ikemu David ye 10,000 heqhilue!”

⁶Tile Akis no David kuno pi, “Ino xukuau Israil Lhou jelono tushoqhi pi anike noye ilau ighono aghokulu shi acheni; tighenguno nono hipau ghushilo igholo wuno aghushitsu aye niye ighono imlo kiqi shi nani. Kughengu nono igholo auveke tsala lono ishi kutolo niye kumu okipimi ithumla aphi. Ikemu kukami kutamiye opulu bemlano ani.

⁷Tighenguno noye akivishi akilo idewovelo eno kumu panongu pulou kumou kumla shikevilo.”

⁸David no khochile, “Akijeu, niye kiu mla pimive kya? Tsala nono piketoi, noye ino oqe thuvekeu tsalanino ishikutolo kumu ikipimi phumla aye niye kushiye ogholo wumoni kya impeu eno ikukau ghumi sasu aghushi tsumoni kya?”

⁹“Nighi ogholo pulokuqha ani” pi Akis no khochile. “Noye Alhou wu kungumi toike pi niye okihi acheni. Ikemu kukami kutamino pi akeuno noye ni sasu aghushiqalo wupemlae ipi ani.

¹⁰David, tishiaye thoghiu inaqhe nongu khijehino Saul qhive puzu igholo ighive keno nongu kumtsu itheno ithuvelo eno zughughui aphilono chevelo.”

¹¹Tighenguno David ngo pawu timi kumtsu akuthuniye itheno ithughiveno Filistiya lo idewove eno Filistiyamino Jezril lo wuve.