Read Sumi Naga SAMUEL ATUGHIU 30 Bible Online

SAMUEL ATUGHIU 30 - Sumi Naga bible

SAMUEL ATUGHIU 30

¹Atsala kini tikhauno David ngo pawu timiqo ye Ziklag lo ide ighilu. Amelekmino Juda yeghi apeu kudau le ano Ziklag ghi le thuve. Panonguno taun tipau pitilevetsu,

²tile kuami totimi kumtsu kughaluvemu lakhimu pithi mono panonguno wovekelo kumtsu sasu cheve.

³David ngo pawu timino ighikelo panonguno taun pitive aghi eno panongu nipu atianuli kumtsu sasu wuve tsu aghi.

⁴David ngo pawu timiqoye akulho shimoke kutolo qau khave.

⁵David nipu Ahinoam ngo Abigail pama ghi kugha sasu wuvetsu aghi.

⁶David ye ighono avekusa dolo ngove, kughengu pawu timi kumtsuno pututa nipunuli puhavekeu lono amlo shimo atuno David veqhi pithive nikeu shiuve; ikemu AMPEU pa Lhou no pa mlo shikumtotsu.

⁷David no achineu Abiathar Ahimelek nu vilo pi, “Achine mla kuxaphi hilau sughilo,” Abiathar no pewo patsu.

⁸David no AMPEU vilo iniju, “Niye wupuzu ni le ighikeqo hawu penikeo mokya? Niye wuno panongu kughasaghi peni keo mokya?” AMPEU no khochile, “Noye panongu hawulo; nono panongu halu nani eno akughushi sasu chekeqo ghi xaphelu nani.”

⁹Tighenguno David no pawu timi 600 sasu panongu hawu, eno panonguno chewo Besor ghokiti tolukelo panongu khamiye tilehi ngovepe.

¹⁰David no timi 400 likhi sasu hahu; ikemu itaghi timi 200 ye ighono akulho shi kutuve ke ghenguno aghoki heche iku mlaveno athiu ngove.

¹¹Timi David gholo chekeqono Ijipmi itimi lakhi aluzalo cheghike ithulu puzu sasu David lau ighi. Panonguno chuqu kusho pesu patsu.

¹²Khughuthi kiki eno atsaikipki akipiqhe kini ishi pesu patsu. Paye tipaqo chusho luve kethiuno pa philo akumto ideghilu; kughengu paye atsala kuthu kupuju kumu chu-shomono cheke.

¹³David no pa vilo iniju, “Ompiuye khuu kya eno noye khileno ighi anikya?” Pano khochile, “Niye Ijipmi lakhi eno Amalekmi qu axe shivekemi lakhike,” “Impeuno iqhivekeu ishi atsala kuthu shivae, kughengu ino sukutuuve kehu iqhiveke.

¹⁴Ninguno Juda yeghi apeu kudau Kheritmi lughi kudau levetsu eno Kaleb shiyehqo lughi levetsu eno Ziklag taun pitivetsue.”

¹⁵David no iniju, “Tishiaye noye khunoqo leu keno tipaqo lau isasu wunima?” Pano khochile, “Tsala nono Alhou jelono iheqhi pithimo momu ikugha pesu sachile sawo puzuu impiu lau tsupuwumoe pi tushoqhilu aye ino osawo piyeni.”

¹⁶Ikehu pano David sawo panonguno ngo akeu a piyeve. Le ighikeqo huye a-a kumtsu apanagha ngono chu-sho eno alokivishi ikhikulu shi ngo aghikha, kughengu panonguno Filistiya ngo Juda lono anhemgha kutomo lhelu eno suxa luvetsu kehu.

¹⁷Thoghiu inaqhe itheno David no panoqo lethu eno kijiliu kutolo panongu sasu aghushi ae. Lhothemi pano 400 kemel shou ikuno povekeqo kumo aye kutamiye lakhimu pokamlave.

¹⁸Tileno David no Amalekmino suxa pesu chekeu eno sasu cheghi kemi kumtsu hakhochile luve, tipau gholo pa nipu pamaghi hakholuve;

¹⁹kumu puhamoe. David no pawu timiqo nipunuli eno anhemgha suwuve tsukeu kumtsu ithulu chileluve.

²⁰Tilikhi kumono amshi pichepighi kumtsu hakho luve, pawu timino lhoxu kumtsu panongu zulono ha ghi ishi pi, “Hipaqo kumtsu David wu ke!”

²¹Tishino David ye timi 200 khunoqo ighono lhoveno pa gholo kumtsa wumlaveno Besor ghokitilo ngo khave keno tipaqo lau idewo. Panonguno azuu chesu ighino David ngo pawu timiqo sasu kusholu eno David ghi iqhoghi puzu panongu petha tsughi kusholu.

²²Ikemu ame kuhakeqo khami David gholo wukeqono ishi pi, “Panonguye ningu sasu wumoe, ikeke anhemgha hakholukeqo pesu panongu tsumlae. Panonguno pututa nipunuliye sasu wolu nani.”

²³Ikemu David no khochile pi, “Ithikuzumiqo, AMPEU no kiu ningu tsukeno tipau pesu hishi kepu kumoe! Pano ningu susho pukhalu eno ni le ighikeqo shou tokulu ningu tsue.

²⁴Nonguno kiu pi anikela tipaulo khuunomu pulosumlae! Kumtsu aphiphi shi kusajemasae: a-alo anhemgha kheakeqo pina azuu aghushiqalo wuno aghushi keqo pinamu aphiphi shi kusaje nani.”

²⁵David no hitoi ayezah mlavetsu, ikehu tinguno tilauye Israil lo hipau yezah pekishe susu ighive.

²⁶Kughou David no Ziklag lo ide ighikeno, pano aghushi lono hakholu keu nhemgha hami pa shou khuno qo Israil lo sakiphemi shi akeno panoqo lau hipau sutsa pi-ghi tsupuwu, “Hile agho hami nongu ghenguno tsupuwu ani, hiye AMPEU ghumi launo ninguno suxa sughikeu nhemghaqoke.”

²⁷Pano Bethel lo kuami, Juda yeghi apeu Rama lo kuami eno taun hipaqolo Jattir,

²⁸Aroer, Sifmot, Eshtemoa

²⁹eno Rakal lo kuami laughi; Jeramil lagha Kenimi lagha,

³⁰eno taun Horma, Borashan, Attak,

³¹eno Hebron hipaqo kumtsu lau tsupuwuve. Pano khile pa ngo pawu timi qono itsuchekha keno tipaqoa kumtsulo agho chhepuwu.