Read Sumi Naga SAMUEL ATUGHIU 4 Bible Online

SAMUEL ATUGHIU 4 - Sumi Naga bible

SAMUEL ATUGHIU 4

¹Tipa ghulokilo Filistiyamino Israilmi sasu aghushiniye hekutsupe ngoa, ikehu Israilmi ghi panongu sasu aghushiniye kutothu. Israilmino panongu ghazu Ebenezer lo shi eno Filistiyamino Aphek lono panongu ghazu shilu.

²Filistiyamino lethu eno kumzapushi aghushino aghushiqa lono Israilmi shou toluve eno timi 4,000 kutolo pithivetsu.

³Kughou ghiqhi khamokeqo ghushimino aghazulo ide ighikeno, Israilmi sakipheuno pi, “Kushiye Filistiyami pelono ishiye ningu shou toluve anipe kya? Ningu wuno AMPEU wu Puloshoqhi Bohu Shilo lo akeu sughivenie, tishikeu lono pano ningu sasu wuno ningu ghumi wu lono ningu xalu nani.”

⁴Ikehu panonguno aghini kishimi Shilo lo hapuwuno AMPEU wu Puloshoqhi Bohu khikhi Akughushu MPEU kukano achekeu kiqi shi peitha chekeno tipau ikhiluve. Eli nu Hofni ngo Fineha pamaghi Puloshoqhi Bohu gholono ighi.

⁵Kughou AMPEU wu Puloshoqhi Bohu aghazulo sughi keno Israilmi kumtsuno ighono aghugha kije shi igha muku, tishi kehuno ayeghi papu itha.

⁶Filistiyamino igha muku akeu sutsa ti chiluno ishi pi, “Ibrimi ghazulo hushi ighamuku akeu kiqiye kiukya?” Kughou panonguno AMPEU wu Puloshoqhi Bohu panongu ghazulo suighiva pikeu sutsa ithivekeno,

⁷Filistiyamiye ighono msave; kughengu panonguno ishi pi, “Alhou lakhi aghazulo ighivae! Ninguye puhaveniae! Khilemu azuu hikithipushi ningu lau shiju mphie!

⁸Khuno Akuka kughushu Lhou ulono ningu xalu nani kya? Asaye yeghilo chekelo alhou hipaqono Ijipmi ghiqhi pithi khavetsuke.

⁹Filistiyami, amlo kuloghi shilulo! Kiptimi toi aghushilo tishimo aye ninguye Ibrimi qemi shiuveni cheni, puzuu panonguno ningu qemi shiche ketoiveni cheni. Tighenguno kiptimi toi kumjolo!”

¹⁰Ikehu Filistiyamiye kumzapushi aghushino Israilmi shou theqhiluve, Israilmiye kumtsuno pututa kilo pokhave. Tilehi timi kumzapushi ghiqhi pithivetsu: Israilmi alakiche ghushimi 30,000 pithive.

¹¹Alhou wu Puloshoqhi Bohu suxaluve tsu eno Eli nu Hofni ngo Fineha pamaghi pithivetsu.

¹²Tipa tsalanino Benjamin lagha lono timi lakhi aghushiqa lono posusu Shilo lo ighilu. Pa mlo ghime piyenike ghenguno pa phimini suxuveno pa kutsulo ayeghi epukuno poighi.

¹³Pano ighike ghulokilo Eli ye alaghi phivilo iqa no jukutoa kughengu paye AMPEU wu Puloshoqhi Bohu ghenguno pa mlo ime ae. Ike kughou timi huno aphughilo iloghi puzu sutsa kithe pesu pikulha keno, aphughi kumtsuno msake launo ighamuku khave.

¹⁴Eli ghi asutsa chiluno iniju,”Hiye kiu shikeu ghugha shi anikya?” Timi huno Eli lau po ighino kiu shive keno tipaqo sutsa pesu pa vilo pitsu.

¹⁵(Tipa ghulokilo Eli ye apunu mpe lhotoku tache shi ayea kehu anhethi kumu ithumlauve.)

¹⁶Timi huno Eli vilo pi, “Niye aghushiqa lono pojoluno ishi ajupuka pocheno hilehi ighilu ani.” Eli no pa vilo iniju, “Inu kiu shive kya?”

¹⁷Aghini kishiuno khochile, “Israilmi ye Filistiyami zulono pokhavae; hiye ningu ghenguno ighono tokumlapu shiva! Tilikhi kumono, onu Hofni ngo Fineha pamaghi ghiqhi pithivae eno AMPEU wu Puloshoqhi Bohu ghi suxapesu wuvae!” ipi.

¹⁸Kughou timi huno AMPEU wu Puloshoqhi Bohu jeku kemtsa, Eli ye khagho phivi lono pa kughuqa alono milekukauno veqhive; eno pa kuo shochhe ikiqiveno thive, kughengu paye ighono kitemi shive, eno mishisheyi kehu idethughi mlave. Paye ampe lhobidi Israilmi shou sakipheu shicheke.

¹⁹Tipa ghuloki Eli mukishiu, Fineha nipuye mishipu akehu, anga punukepu do ighive. Kughou AMPEU wu Puloshoqhi Bohu suxapesu wuvae pikeu eno tipa gholono Eli ngo Fineha ishi thivae pikeu lino chilu kemtsa liye apunu kusu suno anga lakhi punuve.

²⁰Liye thiveniye akelono totimi li ju akeuno li vilo pi, “Mtolo! kughengu noye anu kiptimi punuqhi vae!” Ikemu liye kumu khochile move.

²¹Lino anu je Ikhabod[1] kuvetsu, pakiqiye Puloshoqhi Bohu suxaluvekeu, eno li pangu ngo li kimi ishi thivekeu lono.

²²Lino ishi pi, “Israil launo AMPEU jukuvu chevae, kughengu AMPEU wu Puloshoqhi Bohu suxapesu wuve ake.”