Read Sumi Naga SAMUEL ATUGHIU 7 Bible Online

SAMUEL ATUGHIU 7 - Sumi Naga bible

SAMUEL ATUGHIU 7

¹Tighenguno Keriat Yearim lo kuamino ighino AMPEU wu Puloshoqhi Bohu ikhiluveno tipau pewo timi lakhi paje Abinadab khuu atolo achekeno pa kilo qhive. Panonguno pa nu Eleazar pelono tipau ju kukutsu shipenike akighini pa shou betsuno kisheluve.

²Puloshoqhi Bohu huye Keriat Yearim lo ampe mukua toike ado kushuwo ngove. Tipa ghulokilo Israilmi kumtsuno AMPEU pelo kuphupe nike ghenguno mloqa khue.

³Samuel no Israilmi vilo pi, “Tsala nonguno amlo kumtsu suno AMPEU lau xatsughu ighinishi aye, shoinami lhouqo kumtsu eno Astar lhouliu julho kumtsu phevemasa. Nonguye AMPEU lau kumtsu ikhiphe pesu tsuvelo eno pa likhi mllalo, tishi aye pano Filistiyami kuka lono pano nongu xaphe luve nani.”

⁴Ikehu Israilmiye panongu no mllache keu Baal eno Astar lhouliu phekhave, ipuzu AMPEU likhi mllauve.

⁵Tishipuzu Samuel no Israilmi kumtsu Mizpa lo kukutsuno hitoi panongu vilo pi, “Ino nongu ghenguno AMPEU vilo inikhutsuni.”

⁶Ikehu panongu kumtsu Mizpa lo hekutsupe ngolu. Panonguno azu shopesu ighino akumllagho tsukeu kiqi shi AMPEU lau leqhi tsu eno tipa tsala kupuju kumvulu. Panonguno pi, “Ninguye AMPEU zulo axine shiva,” (Hi Mizpa alono Samuel no Israilmi dolo kiyimuto chekeu xakuthau shilue.)

⁷Kughou Israilmino Mizpa lo kumqo pesu ngo ani pikeu Filistiyamino chilu keno, Filistiyami kukami pano punguno pano timiqo sasu ighino panongu lethu. Tile Israilmiye tipau chiluno msaveno,

⁸Samuel vilo pi, “Ningu Lhou AMPEU lau tamono inikhu tsualo, Filistiyami ulono ningu xaphekulupu shitsulu kepushi.

⁹Tileno Samuel no bheriti lakhi heqhino kumtsu pesu aghakishi kumlla kiqi lono AMPEU tsughi pitive. Tishipuzu pano AMPEU lau Israilmi kuphutsulopi inikhutsu eno kuchouno AMPEU no pa kighini khochiletsu.

¹⁰Kughou Samuel no aghakishi shi akeno Filistiyamiye leniye azuu hughi; ikemu panonguno tishi akelono AMPEU no kungugha lono tsutsukusu panongu lau puwu. Tishikeu loye panongu aloqhi kubangve eno akumsa launo kohakhave.

¹¹Israilmino Mizpa lono poipeghi puzu Filistiyami hasu Bethkar kutolo hawu eno halukeqoye alaghi lono heqhivetsu ghi wue.”

¹²Tileno Samuel no atu lakhi ikhilu puzu Mizpa ngo Shen kuma dolo ghope qhino pi, “AMPEU no alaghi kumtsulo ningu kuphutsue” eno pano tipau pesu “Kuphutsukeu tu” [2] ipi kuvetsu.

¹³Ike Filistiyamiye tileno theqhiluve eno AMPEU no Samuel no xuake tivilo Israil lughi le iloghi pemo nikeu shi lakhavetsu.

¹⁴Ekron ngo Gat kuma dolo aphughi khijehi Filistiyamino leluvekeno kumtsu tsuchileve, ikehu Israilmiye azushe kumtsu ithulu chileluve. Tilikhi kumono Israilmi ngo Kananmi kuma dolo kulakishi ghi shiluve.

¹⁵Samuel ye pano xuake tivilo Israilmi shou ayehkipeu shilu.

¹⁶Mpe atsutsulo paye Bethel, Gilgal eno Mizpa lo wuno a-a hipaqolo kiyimuto ipeghikeu kumtsu pano xathavetsu che.

¹⁷Tishiveno paye pa-a Rama lo ide woveche, tipa aloghi paye xakuthau kumla shicheke. Rama lo AMPEU mlla nike ghenguno pano akumlla khache lakhi ghelu.