Read Boros Dusun KAJADIAN 25 Bible Online

KAJADIAN 25 - Boros Dusun bible

KAJADIAN 25

¹Ari Ibrahim nikah deui. Garwa nu ayeuna Keturah.

²Ngababarkeun: Simran, Yoksan, Medan, Midian, Isbak jeung Suah.

³Yoksan puputra Syeba jeung Dedan. Ari putra-putra Dedan nya eta: urang Asur, urang Letus jeung urang Leum.

⁴Midian puputra Epa, Eper, Hanok, Habida jeung Eldaa. Sakitu turunan anjeunna ti Keturah.

⁵Ibrahim ngahibahkeun sagala kakayaanana ka Ishak.

⁶Tapi samemeh anjeunna pupus, putra-putra ti garwa nu lianna oge dipaparin bagian. Sanggeus mareunang bagian ku anjeunna dijarurung laku ka tanah wetan, sina jarauh ti Ishak.

⁷Ibrahim yuswana nepi ka 175 taun.

⁸Jadi pupusna teh sanggeus sepuh pisan.

⁹Ku Ishak jeung Ismail dikurebkeun di Guha Makpela, anu pernahna di hiji lahan wetaneun Mamre, bogana Epron bin Sohar, urang Het.

¹⁰Eta lahan ku Ibrahim geus digaleuh ti urang Het. Nya di dinya anjeunna dikurebkeunana. Sarah oge, geureuhana, dikurebkeunana teh di dinya.

¹¹Sadikantunna ku Ibrahim, Ishak diberkahan ku Allah, matuhna deukeut Sumur Lahai Roy.

¹²Ari Ismail, putra Ibrahim ti Hajar urang Mesir, embanna Sarah tea,

¹³kagungan sababaraha putra lalaki. Ieu ngaran-ngaranna, nurutkeun parelean umurna: Nebayot, Kedar, Adbel, Mibsam,

¹⁴Misma, Duma, Masa,

¹⁵Hadad, Tema, Yetur, Napis jeung Kedma.

¹⁶Aranjeunna jaradi karuhun ti dua belas kaom, sarta ngaran-ngaranna diparake ngaran-ngaran pakampungan-pakampungan jeung tempat-tempat pakemahanana.

¹⁷Ari Ismail yuswana 137 taun, tuluy pupus.

¹⁸Turunan anjeunna hirupna di wewengkon antara Hawila jeung Sur, wetaneun Mesir, sapanjang jalan anu brasna ka tanah Asur. Harirupna misah ti nu jadi dulur.

¹⁹Ieu lalakon Ishak putra Ibrahim.

²⁰Nikahna dina yuswa opat puluh taun, ka Rabeka putra Betuel urang Aram ti Mesopotami, saderekna Laban.

²¹Ku sabab garwana henteu bae kagungan putra, ku anjeunna dipangnedakeun ka PANGERAN. Panedana dikabul, Rabeka bobot,

²²bobotna kembar. Waktu keur dikandungna keneh, eta dua sakembaran teh papaduk-paduk. Saur Rabeka, ”Ku naon aing teh nepi ka nyorang nu siga kieu?” Seug anjeunna neneda ka PANGERAN, neda bongbolongan.

²³Ku PANGERAN diwaler, lahirana-Na, ”Di jero kandungan maneh aya dua bangsa. Di mana gumelar, baris jadi dua kaom anu silih lawan. Nu hiji leuwih kuat batan nu sejen, sarta cikalna baris ngawula ka adina.”

²⁴Nepi ka waktuna, Rabeka babar, putrana kembar.

²⁵Anu kaluarna ti heula kulitna beureum jeung pinuh ku bulu, nu matak dingaranan Esau.

²⁶Anu kaluar pandeuri, leungeunna ngeupeul pageuh kana keuneung Esau, nya dingaranan Yakub. Harita, yuswa Ishak geus 60 taun.

²⁷Sanggeus sawawa, Esau jadi paninggaran anu ahli, purah ngencar ti imah, ari Yakub adatna cicingan, karesepna di imah.

²⁸Ishak resep ka Esau, da sedep daging beubeunangan Esau moro. Sabalikna Rabeka resep ka Yakub.

²⁹Dina hiji poe waktu Yakub keur popolah, jol Esau balik tas moro. Ku sabab lapar,

³⁰pok ngomong ka Yakub, ”Cik Akang menta eta anu beureum-beureum, lapar mani leuleus.” (Nya ti harita Esau teh meunang lalandian Edom.)

³¹Ari tembal Yakub, ”Mangga. Tapi kudu ditukeuran ku hak cikal Akang.”

³²Ceuk Esau, ”Heug! Akang mah dareukeut kana paeh ieuh; jadi naon untungna keur Akang hak kacikalan teh?”

³³Jawab Yakub, ”Sumpah heula yen rek mikeun hak cikal Akang.” Seug Esau sumpah, terus hak cikalna dijual ka Yakub.

³⁴Geus kitu ku Yakub diberean roti jeung kaolahan kacang beureum tea. Beres dahar nginum, Esau cengkat terus indit. Kitu Esau mah, luas miceun hak cikalna.