Read Boros Dusun KAJADIAN 26 Bible Online

KAJADIAN 26 - Boros Dusun bible

KAJADIAN 26

¹Hiji mangsa eta tanah katarajang deui paceklik, saperti bareto keur jaman Ibrahim. Ishak angkat ka Gerar nepangan Abimelek raja urang Pelisti.

²PANGERAN nembongan ka Ishak sarta ngandika, ”Maneh ulah ka Mesir. Cicing bae di tanah anu geus dituduhkeun ku Kami.

³Saheulaanan di dieu bae, ku Kami dibarengan jeung bakal diberkahan. Sabab ieu tanah ku Kami bakal dibikeun ka maneh jeung turunan maneh. Kami tetep mageuhan jangji ka bapa maneh.

⁴Maneh rek dibere turunan anu lobana lir bentang di langit, sarta maranehanana ku Kami bakal diserenan tanah sawewengkon ieu. Bangsa-bangsa kabeh bakal marenta diberkahan ku Kami cara ngaberkahan ka turunan maneh.

⁵Kami bakal ngaberkahan ka maneh, lantaran Ibrahim geus nurut jeung ngestokeun parentah-parentah Kami.”

⁶Tuluy Ishak matuh di Gerar.

⁷Urang dinya naranyakeun hal garwana. Ku anjeunna diwaler yen: ”Eta teh pun adi.” Teu wantuneun ngangken yen garwana, sieun dipaehan ku urang dinya, kawantu garwana geulis kabina-bina.

⁸Hiji mangsa, anjeunna katingali tina jandela ku Abimelek raja tanah Gerar, keur nyacapkeun kasono jeung Rabeka.

⁹Ishak ku anjeunna disaur, dipariksa, ”Moal lepat deui, eta istri teh tangtos garwa salira! Naon margina diangkenkeun rai?” Waler Ishak, ”Ku emutan, upami disebatkeun pun bojo, tangtos sim kuring aya nu maehan.”

¹⁰Abimelek, ”Teu sae kitu. Da saupami kitu mah gampil bae tuang geureuha teh digunasika ku salah saurang rahayat sim kuring, matak lepat ka sadaya urang dieu.”

¹¹Ti dinya Abimelek marentahkeun ka rahayatna, ”Ieu juragan reujeung garwana, ulah aya anu ngaganggu. Sing saha nu kumawani, tanwande dihukum pati.”

¹²Di eta tanah Ishak teh ngahuma. Barang dipanenan, hasilna saratus kalieun, kawantu diberkahan ku PANGERAN.

¹³Anjeunna jadi kacida beungharna, sabab usahana beuki maju, beuki maju.

¹⁴Barang urang Pelisti nyarahoeun yen Ishak kagungan ingon-ingon embe, domba, kitu deui badega-badega sakitu lobana, seug jadi malik sirik.

¹⁵Heug bae sumur-sumur anu bareto beunang ngali badega-badega Ibrahim ramana teh ku maranehanana diarurugan.

¹⁶Saur Abimelek ka Ishak, ”Ku margi ayeuna mah salira jadi leuwih kuat ti batan urang dieuna, sae ngalih bae ti dieu.”

¹⁷Ishak terus ngalih, ngababakan di hiji lengkob di Gerar, ngendek di dinya meunang sawatara lila.

¹⁸Sumur-sumur anu dikali di jaman ramana, anu diarurugan ku urang Pelisti sanggeus ramana pupus, ku anjeunna dikalian deui, malah dingaranan deui numutkeun ngaran-ngaran ti ramana.

¹⁹Hiji mangsa badega-badega Ishak ngali hiji sumur di eta lengkob, cinyusuna mani buburialan.

²⁰Tapi tukang-tukang angon urang Gerar ngajak cekcok ka tukang-tukang angon Ishak. Aromongna, ”Ieu sumur anu kami!” Seug eta sumur teh ku Ishak dingaranan ”Esek”, anu hartina cekcok.

²¹Badega-badega Ishak ngali deui sumur sejenna. Ieu oge jadi pacekcokan. Nya ku anjeunna dingaranan ”Sitna” anu hartina mumusuhan.

²²Ishak ngalih deui jauh ti dinya, jeung ngali deui hiji sumur. Ieu mah berekah henteu jadi pacekcokan. Seug ku anjeunna dingaranan Rehobot, hartina ”Kaluginaan”. Saurna, ”Nya di dieu urang ku PANGERAN dipaparin kaluginaan. Di dieu urang baris jadi makmur.”

²³Hiji mangsa Ishak angkat ka Bersyeba.

²⁴Peutingna PANGERAN nembongan sarta ngandika, ”Kami, Allah panutan bapa maneh Ibrahim. Ulah sieun Kami aya jeung maneh. Maneh bakal diberkahan, dibere loba turunan, ku karana abdi Kami Ibrahim.”

²⁵Ishak ngadegkeun altar, seug ngabakti ka PANGERAN. Geus kitu masang kemah, badega-badegana ngarali sumur.

²⁶Abimelek sumping ka Ishak ti Gerar, disarengan ku Ahusat juru nasehatna jeung Pikol, panglima balatantara.

²⁷Saur Ishak ka anjeunna, ”Aya pikersaeun ka sim kuring? Kapan kapungkur mah sakitu henteu saena ka sim kuring, dugi ka ngusir!”

²⁸Walerna, ”Ayeuna mah parantos terang, salira disarengan ku Allah. Ku emutan, urang kedah meungkeut hiji perjangjian anu kiat. Salira kedah jangji

²⁹yen moal ganggu ka pihak sim kuring. Sim kuring oge kitu moal ngaganggu ka pihak salira. Geuning kapungkur oge sim kuring teu kieu-kieu ka salira. Nalika angkat ti ditu salira henteu disisikudi. Geuning ayeuna salira diberkahan keneh ku PANGERAN.”

³⁰Ti dinya Ishak sasayagian seja nyukakeun tamuna, brak taruang leueut.

³¹Isukna isuk-isuk keneh, aranjeunna masing-masing ngikrarkeun jangjina kalawan sumpah. Sanggeus beres, tamu-tamu dijurung marulih. Dina paturay tineungna, aranjeunna geus pada silih mimitran.

³²Poe eta badega-badega Ishak daratang, bebeja ka anjeunna perkara ngali sumur tea, pokna, ”Caina parantos kapendak.”

³³Eta sumur ku anjeunna dingaranan ”Syeba”. Ku sabab eta, eta tempat teh tetep dingaranan Bersyeba.

³⁴Ari Esau sanggeus yuswa opat puluh taun nikah ka Yudit, anak Beri urang Het. Jaba ti eta nikahna teh ka Basmat, anak Elon, urang Het keneh.

³⁵Ishak jeung Rabeka bati susah sajeroning manah.