Read Boros Dusun KAJADIAN 33 Bible Online

KAJADIAN 33 - Boros Dusun bible

KAJADIAN 33

¹Esau jeung opat ratus baladna geus beh katembong. Gancang Yakub ngabagi-bagikeun putrana ka ibuna masing-masing, ka Lea, ka Rahel jeung ka emban-emban.

²Emban-emban jeung putra-putrana ditempatkeun beulah hareup. Lea jeung putra-putrana satukangeun eta. Rahel jeung Yusup pangtukangna.

³Ari Yakub maju pangheulana seja nepangan Esau. Ti kajauhan keneh anjeunna sujud deui sujud deui nepi ka tujuh kali.

⁴Tapi Esau lumpat muru, terus ngarangkul jeung nyiuman. Aranjeunna silih tangisan.

⁵Ret Esau ka wanita-wanita jeung marurangkalih, pok mariksakeun, ”Ari eta saha, rai?” Walon Yakub, ”Sumuhun pun anak, paparin Allah ka jisim abdi.”

⁶Ser dua emban jeung marurangkalih ngadareuheusan ka Esau, terus marando.

⁷Ser deui Lea jeung marurangkalih, seug marando. Ahirna Rahel jeung Yusup, ngadeuheusan.

⁸Esau mariksa deui, ”Tadi Akang ningal rombongan sejen. Kumaha eta teh maksudna?” Walon Yakub, ”Sumuhun, eta sumeja kahaturkeun ka gamparan, pamugi ditampi.”

⁹Saur Esau, ”Akang geus ngarasa cukup. Sing tetep-tetep bae eta mah di rai.”

¹⁰Walon Yakub, ”Sanes kitu. Saupami leres gamparan ngangken ka jisim abdi, eta pangbakti mugi ditampi. Ningal pameunteu gamparan, jisim abdi mah asa ningal pameunteu Allah.

¹¹Ulah dugi ka teu ditampi eta pangbakti ti jisim abdi. Jisim abdi ku Allah parantos dipaparin pirang-pirang berkah, dugi ka gaduh sagala rupi.” Ku sabab dikeukeuhan, tungtungna ku Esau ditampi.

¹²Saur Esau, ”Hayu atuh urang terus, Akang ti hareup.”

¹³Tapi saur Yakub, ”Gamparan langkung tingali, eta barudak parantos lalungse. Domba sareng sapi sanesna eta oge jadi emutan, tur anak-anakna aralit keneh. Upami dipaksa dibantun gancang, sadinten oge tangtos pararaeh sadayana.

¹⁴Mangga gamparan mulih ti payun. Abdi tangtos nuturkeun lalaunan, sagancang-gancang lakuning barudak sareng ingon-ingon, seja ngetruk dugi ka panglinggihan gamparan, di Edom.”

¹⁵Saur Esau, ”Lamun sapuk, ieu balad Akang sawareh sina maturan.” Walon Yakub, ”Kasaean gamparan estu katampi. Nanging teu perlu dugi ka kitu.”

¹⁶Poe eta keneh Esau mulih deui ka Edom.

¹⁷Tapi Yakub anggur terus ka Sukot. Di dinya anjeunna ngadamel bumi kitu deui kandang-kandang keur ingon-ingon. Nya ku lantaran kitu eta tempat disebut Sukot, anu hartina kandang.

¹⁸Ti dinya, samulihna ti Mesopotami teh Yakub cunduk ka kota Sekem di tanah Kanaan. Tuluy masanggrahan di hiji lahan hareupeun eta kota.

¹⁹Saterusna eta lahan digaleuh sabagian ti rundayan Hemor, bapana Sekem, ku pangaji saratus potong perak.

²⁰Ti dinya anjeunna ngadamel altar, dingaranan ”El, Allah Panutan Israil”.