Read Boros Dusun KAJADIAN 38 Bible Online

KAJADIAN 38 - Boros Dusun bible

KAJADIAN 38

¹Harita Yuda indit ninggalkan dulur-dulurna, ngadon cicing di hiji jelema anu ngaran Hirah, anu asalna ti Adulam.

²Hiji mangsa nenjo hiji wanita, anakna urang Kanaan nu ngaran Sua, tuluy dikawin.

³Sanggeus kakandungan terus ngalahirkeun, anakna lalaki, dingaranan Er.

⁴Boga deui anak, lalaki, dingaranan Onan.

⁵Anakna anu katilu lalaki deui, dingaranan Selah. Waktu Selah lahir, Yuda geus pindah ka Kesib.

⁶Pikeun bojo putra cikalna anu ngaran Er, Yuda milih Tamar.

⁷Tapi Er nyieun pibendueun PANGERAN, nyieun hiji kajahatan. Ku sabab kitu ku PANGERAN dicabut nyawana.

⁸”Eta randa akangna teruskeun pirabi ku maneh,” ceuk Yuda ka Onan dulurna Er. ”Wajiban sakumaha mistina, neruskeun kawajiban akangna, supaya lanceuk maneh aya turunanana.”

⁹Ari Onan, ku sabab nyaho yen anak ti eta awewe lain eukeurna, nu matak unggal sapatemon jeung eta, cimanina sok dikana taneuhkeun, ngarah lanceukna teu boga turunan.

¹⁰PANGERAN bendu, nu matak Onan oge dicabut nyawana.

¹¹Ceuk Yuda ka Tamar, ”Balik bae heula ka bapa Nyai, ngadago Selah anak bapa akil baleg.” Nitah kitu soteh pedah risi, bisi Selah oge dicabut nyawana kawas lanceuk-lanceukna. Tamar balik ka bapana.

¹²Rada lila ti harita, bojo Yuda tea maot. Sanggeus waktu-waktu sungkawana kaliwat, Yuda indit ka Timna, duaan jeung Hirah sobatna, urang Adulam tea, rek nyukuran domba.

¹³Aya nu bebeja ka Tamar, pokna, ”Mitoha Nyai ayeuna keur ka Timna, rek nyukuran domba.”

¹⁴Tamar dangdan, papakean rarandaanana diganti ku pakean biasa, ari beungeutna buni make cindung. Bral leumpang ka Enaim, hiji lembur sisi jalan ka Timna, tuluy ngajanteng di lebah kaca-kaca. Tamar geus nyahoeun yen Selah anak Yuda nu lalaki ayeuna geus sawawa, tapi tacan bae diamprokkeun ka manehna.

¹⁵Ana katenjo ku Yuda, panyanana awewe bangor. Teu wawuheun kawantu buni dicindung.

¹⁶Ku Yuda disampeurkeun ka sisi jalan. Ceuk Yuda, ”Nyai, urang pelesir.” Panyanana lain minantuna. Tembal Tamar, ”Bade ku naon mayarna?”

¹⁷Ceuk Yuda, ”Ku embe bae, engke ku Akang dikirimkeun.” ”Mangga,” tembal Tamar, ”nanging kedah nganggo barang tanggungan, kangge tawis moal jalir.”

¹⁸Ceuk Yuda, ”Hayang ku naon?” Tembal Tamar, ”Ku eta bae, cap sareng rantayna, sareng eta teteken.” Sok barangna diserenkeun, tuluy sapatemon. Lila-lila Tamar ngandung.

¹⁹Harita Tamar tuluy balik, cindungna dibuka, rap make deui pakean rarandaanana.

²⁰Ti dinya Yuda ngirimkeun embe keur pamayar, dianteurkeun ku sobatna urang Adulam tea sarta barang nu dipake tanggungan kudu dipenta. Tapi anu diteang teu kapanggih.

²¹Seug ditanyakeun, ”Di mana rorompokna awewe bangor urang Enaim teh?” Jawabna, ”Da di dieu mah ti kapungkur oge teu aya awewe bangor.”

²²Sobat Yuda balik, bebeja, ”Teu kapanggih. Ceuk katerangan, ti bareto oge di dinya mah teu aya awewe bangor.”

²³Ceuk Yuda, ”Kajeun atuh. Hanas barang lapur, geus bae teu kudu dipapay, bisi matak disaleungseurikeun. Boro dikirim embe, ari heug henteu kapanggih.”

²⁴Heuleut tilu bulan aya anu bebeja ka Yuda, pokna, ”Nyi Tamar, mantu Bapa, gaduh kalakuan sapertos awewe bangor, ayeuna keur ngandung.” Jawab Yuda, ”Duruk awakna, sina paeh.”

²⁵Waktu rek diduruk, Tamar nitahan jelema sina ngomong ka mitohana, kieu, ”Abdi ngandung teh ku lalaki anu gaduh barang ieu: Cap sareng rantayna, sareng teteken. Mangga barangna tingalian.”

²⁶Yuda ujug-ujug wawuh kana barangna. Ceuk Yuda, ”Bener manehna, aing nu salah. Henteu buru-buru dikawinkeun ka Selah anak aing.” Ti harita, tetep Yuda henteu sapatemon deui jeung Tamar.

²⁷Barang geus deukeut kana waktuna Tamar ngalahirkeun, kanyahoan yen kakandunganana kembar.

²⁸Waktuna keur diheujeunkeun, orok nu hiji kaluar leungeunna heula. Ceg ku parajina dicekel, tuluy leungeunna dibeungkeut ku benang beureum, sarta ceuk parajina, ”Ieu lanceukna.”

²⁹Tapi eta leungeun teh ngalepot deui, ana borojol anu kaluar teh orok nu hiji deui. Ceuk parajina, ”Na utun, bedas-bedas teuing ngaborojol teh!” Ku kituna seug dingaranan Peres.

³⁰Ti dinya kakara nu hiji deui kaluar, anu leungeunna geus dibeungkeut ku benang beureum tea. Tuluy dingaranan Serah.