Read Boros Dusun KAJADIAN 39 Bible Online

KAJADIAN 39 - Boros Dusun bible

KAJADIAN 39

¹Geus dicaritakeun yen Yusup ku kaom Ismail dibawa ka Mesir, terus digaleuh ku Potipar, kapala kawal karaton.

²Tapi Yusup disarengan ku PANGERAN, sagala lampahna mulus. Ari cicingna di gedong juraganana, urang Mesir tea.

³Juraganana geus waspada yen Yusup ditangtayungan ku PANGERAN, da sagala cabakna ngan kabiruyungan bae.

⁴Ngagandekna ku Potipar kaanggo pisan, nepi ka diangkat jadi purah ngurus gedong katut eusina sapuratina.

⁵Ti semet diurus ku anjeunna rajakaya jeung harta banda eta urang Mesir teh aya berkah ti PANGERAN, boh nu aya di gedong boh nu aya di kebon.

⁶Saniskara urusan ku Potipar diselehkeun ka Yusup, anjeunna mah geus tara pipilueun, iwal ti urusan tuangeun keur salirana. Ari Yusup nya kasep nya tegep dedeganana.

⁷Lila-lila geureuha juraganana kapincut, ka Yusup rajeun melong, tungtungna waleh, saurna, ”Urang ngedeng jeung kami.”

⁸Ku Yusup ditolak, saurna, ”Abdi ku juragan pameget parantos dipercanten ngurus gedong saeusina, anjeunna mah tara milu-milu uninga. Sagala kagunganana sina diurus ku abdi.

⁹Sagala rupi di ieu gedong dikawasakeun ka abdi, teu aya anu diulahkeun, lintang ti ka juragan istri, geureuhana. Paliyas abdi ngabales ku lampah anu sakitu kotorna tur matak dosa ka Allah.”

¹⁰Unggal-unggal poe eta istri teh ngagoda bae, tapi Yusup tagen teu kasasarkeun, pangajak juragan istri teu didangu.

¹¹Ari dina hiji poe, waktu Yusup rek nedunan papancen, di gedong teh sepi teu aya sasaha.

¹²Gep juragan istri ngajewang ka Yusup kana anggoanana, sarta saurna, ”Sok, urang ngedeng jeung kami.” Yusup nerejel terus lumpat kaluar, kari raksukanana bae dicecepeng ku juragan istri.

¹³Barang eling yen keur nyenyepeng eta raksukan sarta Yusupna lumpat,

¹⁴juragan istri ngagorowok ka pagawe-pagawe gedong. Ti dinya saurna, ”Deuleu ieu! Juragan pameget ngasupkeun eta urang Ibrani ka gedong, kari-kari eta jelema teh jadi kurang ajar. Bieu asup ka kamar kami, ngajak serong. Kami jejeritan.

¹⁵Ku sabab kami jejeritan, manehna ngagurinjal terus kabur kaluar. Ieu bajuna, katinggaleun di gigireun kami.”

¹⁶Eta raksukan ku anjeunna disimpen nepi ka juragan pameget sumping.

¹⁷Nyariosna ka carogena oge kawas tadi bae, saurna, ”Eta badega Akang, urang Ibrani tea anu ku Akang dicandak ka gedong, tadi asup ka kamar abdi bari teu uni, niatna ngaheureuyan ka abdi.

¹⁸Ku margi abdi jejeritan, manehna kabur kaluar, papakeanana tinggaleun di kamar.”

¹⁹Dunungan Yusup pohara benduna.

²⁰Yusup ku anjeunna ditangkep terus diselehkeun ka panjara, paranti ngabui sakitan-sakitan anu dihukum ku raja.

²¹Tapi Yusup ditangtayungan ku PANGERAN nepi ka jadi kanyaah sipir, meunang kurnia,

²²dipercaya ngurus sakitan-sakitan sejenna. Yusup enya-enya pisan ngajalankeun papancenna.

²³Sipirna mah geus tara nyaho-nyaho, kabeh kumaha Yusup bae, tina katembong mulus sagala lampahna, lantaran ditangtayungan ku PANGERAN.