Read Boros Dusun KAJADIAN 44 Bible Online

KAJADIAN 44 - Boros Dusun bible

KAJADIAN 44

¹Ti dinya Yusup marentah ka juru kawasa bumi, saurna, ”Eusian karung-karungna sing dedet, sina kabawa ku sataker tanagana. Duit pameulianana asup-asupkeun deui ka jero karung masing-masing, teundeun pangluhurna.

²Lumur perak kami asupkeun kana karung anu bungsu, sakalian jeung duit pameulian gandumna.” Prak dilampahkeun.

³Isukna, barang bray beurang maranehna geus dijurung laku, bral arindit nungtun kalde masing-masing.

⁴Sanggeus maranehna rada anggang ti kota, Yusup marentah ka juru kawasa bumi, saurna, ”Gancang jelema-jelema nu tadi teh udag. Mun geus kaudag, maneh kudu ngomong kieu: ’Ku naon ari maraneh, mulang jahat ka nu mikanyaah?

⁵Ku naon maling lumur perak kami? Eta lumur paranti gusti kami ngaleueut, jeung paranti anjeunna norah. Kacida teuing eta kalakuan teh!’ ”

⁶Sanggeus kasusul, seug gandek teh malikan kalimah gustina.

⁷Ari tembal maranehna, ”Kumaha, Juragan? Naon maksadna eta kasaurah teh? Sageuy abdi-abdi gaduh emutan kana kitu.

⁸Dalah artos anu kapendak di lebet karung tea oge geuning disanggakeun deui ka Juragan. Teu wararantun teuing pulang-paling emas atanapi perak ti gedong panutan Juragan.

⁹Saupami eta lumur kapendak ti salah sawios abdi sadaya, jalmina paehan bae, sesana sumeja masrahkeun diri, rido jaradi badega.”

¹⁰Jawabna, ”Hade. Tapi nu rek dijieun badega mah saurang bae, anu malingna. Nu sejenna bebas.”

¹¹Cag karung-karungna diecag-ecagkeun kana taneuh gagancangan, terus dibaruka ku masing-masing.

¹²Gandek Yusup mariksa mani taliti, mimiti ti karung nu cikal nepi ka karung nu bungsu. Gorehel, lumur teh kapanggih tina karung nu Binyamin.

¹³Bawaning ku ngenes-ngenesna, maranehna nepi ka nyarosoek papakean. Geus kitu karung-karung teh dimuatkeun deui kana kalde, tuluy baralik deui ka kota.

¹⁴Sacundukna Yuda sadudulur ka gedong Yusup, kasampak anjeunna keur ngantos. Bruk bae sadudulur teh pada meubeutkeun maneh kana taneuh payuneunana.

¹⁵Yusup ngalahir, ”Nahaon eta kalakuan kitu teh? Na teu kataksir yen eta kalakuan maraneh teh ku jelema saperti kami mah baris katorah?”

¹⁶”Gusti, kumaha abdi-abdi nya kedah unjukan?” wangsul Yuda. ”Kumaha nya bade mungkir? Kumaha nya kedah nembongkeun yen abdi-abdi beresih? Allah parantos nembrakkeun kalepatan abdi-abdi. Mangga sadayana damel badega, sanes mung anu kapendak nyumputkeun lumur bae.”

¹⁷Waler Yusup, ”Hamo! Kami hamo kitu! Saurang bae anu rek dijieun badega mah. Anu sejen jung baralik ka bapa maraneh, aman, moal dikumamahakeun.”

¹⁸Cong Yuda nyembah, pok deui miunjuk, ”Nun Gusti, manawi aya paidin, abdi Gusti sumeja nyanggakeun ieu piunjuk. Mugi Gusti teu jadi bendu. Gusti sasat Piraon ku manten.

¹⁹Gusti kapungkur mariksa, ’Kumaha maraneh boga keneh bapa, atawa boga deui dulur?’

²⁰Wangsul abdi-abdi, ’Gaduh. Pun bapa parantos kolot, dulur saurang deui, bungsu, anu lahirna saparantos pun bapa kolot pisan. Kaka teges eta barudak parantos tilar dunya. Jadi ti biang tegesna mah mung kantun eta, ku pun bapa kalintang dipideudeuhna.’

²¹Dupi pilahir Gusti, ’Bawa ka dieu, kami hayang nyaho.’

²²Ku abdi-abdi diunjukkeun ka Gusti, yen eta budak teu kenging lesot ti pun bapa. Saupami dugi ka papisah, tinangtos pun bapa puput umur.

²³Nanging pilahir Gusti, ’Lamun dulur maraneh nu eta henteu kabawa, maraneh ulah nete-nete deui ka dieu nemonan kami.’

²⁴Sadongkapna ka pun bapa, gandek dampal Gusti tea, sugri pilahir Gusti teh disanggemkeun.

²⁵Lami-lami pun bapa ngajurung deui abdi-abdi meser tedaeun ka dieu.

²⁶Sanggem abdi-abdi henteu wantun, reh diancam ku Gusti teu kenging deui ngadeuheus, upami henteu sareng pun dulur. Si bungsu kedah kabantun, nembe abdi-abdi wantun mios. Kitu sanggem abdi-abdi ka pun bapa.

²⁷Ari sanggem pun bapa, ’Maraneh nyaho, Ama boga anak ti indung tegesna teh ngan dua.

²⁸Nu saurang enggeus hilang, moal salah disasaak sato galak, lantaran taya beja-bejana.

²⁹Ayeuna, lamun anu ieu oge kudu leupas ti Ama, sarta nepi ka henteuna, atuh kami nu geus sakieu kolotna teh sasat diturihan nya hate ku maraneh, sina buru-buru paeh.’

³⁰Nun Gusti, upami ayeuna abdi-abdi wangsul henteu sareng eta budak, pisakumahaeun teuing remukna hate pun bapa, jalaran nyawana parantos kacangcang ku eta budak.

³¹Tinangtos pun bapa teras ngalenggerek dumugi kana patina. Nya tangtos abdi-abdi keneh nu jadi lantaran pun bapa anu sakitu kolotna gudawang hatena, temahna ajal sapisan.

³²Sajabi ti kitu, abdi Gusti parantos ikrar ka pun bapa, nanggel yen eta budak baris salamet. Saupami eta budak henteu kasanggakeun deui, abdi parantos sumpah sing ulah jamuga satutup umur.

³³Kitu nu mawi, nun Gusti, abdi bae gegentosna, anu ku Gusti kedah disiksa. Pun adi mah sanget-sanget nya panuhun mugi diwidian wangsul sareng lanceuk-lanceukna.

³⁴Kumaha nya wangsul, saupami henteu sareng eta budak? Abdi Gusti moal kiat ningal pun bapa ngalaman nasib sial.”