Read Boros Dusun 2 SAMUEL 1 Bible Online

2 SAMUEL 1 - Boros Dusun bible

2 SAMUEL 1

¹Sanggeus Saul pupus, Daud mulih ti pangperangan tas ngelehkeun urang Amalek, cicing di Siklag dua poe.

²Isukna, dina katilu poena, aya budak ngora ti pasanggrahan Saul, datang ka Daud terus nyuuh. Bajuna beunang nyosoeh jeung sirahna ditaneuhan nyirikeun keur prihatin.

³Ku Daud dipariksa, ”Maneh anu ti mana?” Tembalna, ”Juragan, abdi teh kabur ti pasanggrahan Israil!”

⁴Saur Daud, ”Coba caritakeun kumaha perkarana?” Tembalna, ”Balad Israil seueur anu kasambut, sesana kalabur. Raja Saul sareng Yonatan oge kasambut.”

⁵Saur Daud, ”Geuning maneh nyaho Saul jeung Yonatan kasambut, kumaha?”

⁶Tembalna, ”Sumuhun, abdi keur kapareng ka Gunung Gilboa, katingal Saul nuju naleukeum kana tumbakna, diselempek ku pasukan kareta sareng ku pasukan kuda musuh.

⁷Anjeunna ngareret, abdi katingalieun seug disaur. Wangsul abdi, ’Nun, kaulan!’

⁸Anjeunna mariksakeun abdi saha. Diwangsul yen abdi bangsa Amalek.

⁹Ti dinya saurna, ’Kami paehan! Pek, da geus euweuh harepan hirup, turug-turug tatu parna.’

¹⁰Ku abdi ditumutkeun, da teu kitu ge tangtos anjeunna pupus. Harita ge parantos meh geubis. Makutana ku abdi dilaan, kitu deui kilat bahuna. Ieu kasanggakeun.”

¹¹Wek Daud nyosoeh anggoanana, segruk nangis. Balad oge careurik.

¹²Kitu jeung kitu bae jeung henteu bararang dahar nepi ka burit, nalangsa ku anu geus kasambut di pangperangan tur sakitu lobana: Saul, Yonatan, jeung bangsa Israil, umat PANGERAN.

¹³Geus kitu Daud mariksa deui ka eta budak ngora anu mawa beja, ”Saenyana maneh urang mana?” Tembalna, ”Urang Amalek, mung ngumbara di nagara Juragan.”

¹⁴Saur Daud, ”Teu sieun kasiku maneh ngabinasa raja lisahan PANGERAN?”

¹⁵Geus kitu anjeunna marentah ka hiji prajurit, saurna, ”Paehan ieu jelema!” Bek eta urang Amalek teh dipaehan.

¹⁶Saur Daud, ”Kalapa bijil ti cungap, ieu jelema cilaka ku biwirna sorangan, ngaku maehan raja lisahan PANGERAN.”

¹⁷Geus kitu Daud ngagurit hiji lagu sedih pikeun nangisan Saul jeung Yonatan, putrana.

¹⁸Laguna diparentahkeun kudu diajarkeun ka urang Yuda. (Ieu lagu kaungel dina Kitab Yasar.)

¹⁹”Di pasir-pasir di Israil, geus gugur para pamingpin! Para prajurit nu panggagahna perlaya ing dana laga!

²⁰Di Gat ulah diembar-embar, di Askelon ulah diuar-uar! Bisi awewe-awewe urang Pelisti barungah, bisi parawan-parawan umat brahala jaligrah.

²¹Di Gilboa tanah-tanah pagunungan sina ngahgar ulah kacakclakan hujan, ulah nyorang kaibunan! Da di dinya ngahunyudna tameng-tameng jalma perkosa, hina papa leungit pangaji, tameng Saul ngagoler geus taya harti.

²²Gondewa Yonatan matak gimir matak ketir, pedang Saul taya kawatir. Nguwak-ngawik nempuh musuh, nu keuna pinasti rubuh.

²³Saul, Yonatan, paeh hirup babarengan, estu aheng, matak deudeuh matak heman. Rikat leuwih ti galudra, bedasna leuwih ti singa.

²⁴Para wanita Israil ka Saul masing tibelat, ka aranjeun geus makean ku lawon sakelat, geus maparin perhiasan emas permata.

²⁵Para prajurit nu gagah wani, enggeus naremahan pati. Satria Yonatan lastari di pasir sepi.

²⁶Deudeuh teuing Yonatan, dulur awaking! Kanyaah anjeun teu aya tanding. Kanyaah Akang ka Rayi, langkung ti batan ka istri.

²⁷Para prajurit nu panggagahna perlaya ing dana laga, kari pakarangna, geus taya deui gunana.”