Read Boros Dusun 2 SAMUEL 4 Bible Online

2 SAMUEL 4 - Boros Dusun bible

2 SAMUEL 4

¹Barang Isboset putra Saul ngadangu warta Abner dipaehan di Hebron, leketey leuleus, kacida sieuneunana, sarta bangsa Israil pating sareblak.

²Isboset kagungan dua kapala pasukan, ngaranna Baana jeung Rekab, duanana anak Rimon urang Berot kaom Binyamin. (Berot oge diasupkeun ka wewengkon Binyamin.

³Ari urang dinyana pituin ti harita tuluy parindah ka Gitaim, urut maranehna bareto.)

⁴Turunan Saul aya deui, nya eta Mepiboset putra Yonatan. Basa Saul jeung Yonatan tiwas, yuswa Mepiboset kakara lima taun. Barang aya beja ti Yisrel yen Saul jeung Yonatan geus kasambut, Mepiboset ku embanna gancang dibawa kabur. Ku sabab kaburna rusuh, murangkalih teh ngagebut tina aisan, tuluyna jadi gempor.

⁵Dina hiji poe Rekab jeung Baana arindit ka bumi Isboset, tengah poe narepi. Isboset keur di pajuaran, keur kulem siang.

⁶Ari embanna keur milihan gandum di lawang panto, tuluy nundutan sarta reup bae kaheesan. Bus Rekab jeung Baana arasup ka jero bumi.

⁷Geus di jarero, blus ka kamar pajuaran. Isboset anu eukeur kulem tibra pisan teh ditelasan, mastakana diteukteuk tuluy dijingjing, sapeupeuting dibawa nyorang Lebak Yordan.

⁸Eta mastaka disanggakeun ka Raja Daud di Hebron, sarta kieu piunjuk eta dua jelema, ”Ieu nyanggakeun sirah Isboset anak Saul musuh Gusti, anu ngarah pati ka Gusti. Dinten ieu Jeng Raja dikersakeun ku PANGERAN iasa males pati ka Saul sareng turunanana.”

⁹Waler Daud, ”Demi jumenenging PANGERAN anu geus ngarahayukeun kami tina rupa-rupa bahla!

¹⁰Basa kami di Siklag dibere beja yen Saul pupus, anu mawa bejana ku kami dipaehan. Samarukna arek diganjar ku kami dumeh ceuk pangrasana mawa beja matak ngeunah.

¹¹Komo deui maraneh, anu jahat leuwih ti kitu, maehan jelema tanpa karana, tur dipaehanana teh eukeur sare di imahna sorangan! Kajahatan maraneh maehan Isboset tanwande ku kami dibales, sarta ngaran maraneh ku kami dipupus ti alam dunya!”

¹²Ti dinya Daud nimbalan prajurit, bek bae Baana jeung Rekab dipaehan. Leungeunna jeung sukuna diteukteukan tuluy digantungkeun deukeut hiji balong di Hebron. Ari mastaka Isboset dipendem dihijikeun ka makam Abner di Hebron.