Read Boros Dusun 2 SAMUEL 9 Bible Online

2 SAMUEL 9 - Boros Dusun bible

2 SAMUEL 9

¹Dina hiji poe Daud mariksa, ”Kumaha aya keneh kulawargi Saul anu hirup? Lamun aya, kami arek mikaheman, sabab kami inget ka Yonatan.”

²Aya hiji jelema urut gandek kulawargi Saul ngaranna Siba. Tuluy dititah ngadeuheus ka Daud. Ku raja dipariksa, ”Maneh teh Siba?” Wangsulna, ”Leres, Gusti.”

³Raja mariksa deui, ”Kumaha ari kulawarga Saul aya keneh anu hirup? Lamun aya, kami arek nembongkeun kahemanan, nedunan jangji kami ka Allah.” Piunjuk Siba, ”Sumuhun aya, putrana Yonatan saurang, gempor sampeanana.”

⁴”Di mana?” lahir raja. Wangsul Siba, ”Sumuhun, di rorompok Makir bin Amiel di Lodebar.”

⁵Ku Raja Daud dipiwarang disaur.

⁶Mepiboset bin Yonatan putu Saul geus aya di payuneun Daud, geus rengkuh nyanggakeun hormat. Daud ngalahir, ”Mepiboset!” Jawabna, ”Leres, Gusti.”

⁷Saur Daud, ”Ulah reuwas-reuwas. Kami hayang mikaheman ka hidep, inget ka ama hidep, Yonatan. Tanah Saul eyang hidep salegana top ajang hidep. Jeung lamun hidep suka, iraha bae ge meunang ngariung dahar jeung kami.”

⁸Mepiboset ngawangsul, ”Beu Gusti, ku naon sakitu totomplokanana, padahal abdi teh teu benten ti anjing budug.”

⁹Ti dinya raja nyaur Siba, gandek Saul, timbalanana, ”Sagala rupa harta banda Saul sakulawarga, ku kami rek diselehkeun ka Mepiboset, incu gusti maneh.

¹⁰Eta tanah ahli-ahli Saul gusti maneh teh uruskeun ku maneh saanak-anak jeung badega-badega, panguruskeun panenna, supaya mareunang rejeki ti dinya. Mepiboset pribadi baris jadi tamu kami salalawasna, dahar sameja jeung kami.” (Ari Siba boga anak lalaki lima belas jeung badega dua puluh urang.)

¹¹Siba ngawangsul, ”Satimbalan Gusti sumeja diestokeun pisan.” Ti harita Mepiboset daharna dicandak sameja jeung raja, disaruakeun jeung putra-putra raja.

¹²Mepiboset boga budak lalaki hiji, ngaranna Mika. Siba sakulawarga jaradi gandek Mepiboset.

¹³Mepiboset anu sukuna duanana deog matuh di Yerusalem, daharna katuangan raja.