Read Boros Dusun 1 RAJA-RAJA 7 Bible Online

1 RAJA-RAJA 7 - Boros Dusun bible

1 RAJA-RAJA 7

¹Ari pikeun salirana ku anjeun, Suleman ngadamel hiji karaton, anu diadegkeunana nepi ka tilu belas taun.

²Eta karaton disebutna ”Karaton Leuweung Libanon”, panjangna opat puluh opat meter, rubakna dua puluh dua meter, luhurna tilu belas satengah meter. Eta karaton ngadegna ku tilu jajar pilar tina kayu kiputri, sajajarna lima belas pilar, ti luhurna diamparan ku jajalur balok-balok kiputri. Lalangit kamar-kamarna oge ku kayu kiputri, ditunjang ku pilar-pilar.

⁴Saban gigirna make jandela tilu-tilu jajar.

⁵Panto-panto jeung jandela-jandelana ukuranana pasagi burung. Jajaran jandela-jandela beulah ditu merenahna lempengan jajaran jandela-jandela beulah dieu, paeunteung-eunteung.

⁶Aya rohangan ”Bale Tihang-tihang” anu panjangna dua puluh dua meter, rubakna tilu belas satengah meter, make tepas digolodogan, disangga ku tihang-tihang.

⁷Aya deui rohangan ”Bale Singgasana” anu disebut oge ”Bale Pangadilan”, paranti Suleman mutus perkara, bilikna tina lante nepi kana kaso-kaso papan kiputri.

⁸Ari kamar-kamar pikeun Suleman ku anjeun ayana di tepas sejen, tukangeun Bale Pangadilan, dijieunna sakumaha gedong-gedong sejenna. Ari pikeun prameswarina, putri raja Mesir tea, dipangdamelkeun hiji malige, potonganana sarua keneh jeung eta.

⁹Eta wawangunan kabeh, katut buruan gedena, ti pademen nepi ka hateupna, dijieunna tina batu-batu anu aralus. Batu-batuna geus disiapkeun ti tempat ngalina, dipotongan nurutkeun ukuranana, sisi-sisina tukang jeung hareup diratakeun ku ragaji.

¹⁰Batu-batu pademenna galede, geus beunang ngukur-ngukur ti tempat ngalina keneh. Ukuranana aya anu panjangna tilu satengah meter, aya anu nepi ka opat meter.

¹¹Luhureun batu-batu pademen kakara dipasangan batu-batu lianna, eta oge geus beunang ngukur ti dituna, jeung balok-balok kiputri.

¹²Wangunan tembok buruan karaton, wangunan tembok buruan jero Bait Allah, jeung wangunan tembok rohangan paranti asup ka jero Bait, disusunna saban tilu lapis batu tatah ditumpangan ku salapis balok kai kiputri.

¹³Geus kitu Suleman miwarang ngala hiji paledang anu cicingna di nagara Tirus, ngaranna Huram, pinter barang jieun tina tambaga.

¹⁴Bapana oge sarua paledang, pinter barang jieun tina tambaga, urang nagara Tirus, tapi geus teu aya, umurna pondok. Ari indungna asal ti kaom Naptali. Dina pagaweanana jadi paledang, Huram kacida ahlina tur geus pangalaman. Pangangkir Suleman ku manehna ditarima, arek mangnyieunkeun barang-barang tina tambaga.

¹⁵Huram geus prak digawe. Mimiti nyieun dua pilar tambaga, jangkungna masing-masing dalapan meter, kurilingna lima meter tilu puluh senti, tuluy dipasang di lawang Bait Allah.

¹⁶Ti dinya nyieun dua mamakutaan tambaga, jangkungna masing-masing dua meter dua puluh senti, dipasangkeun kana puncak pilar tea.

¹⁷Puncak pilar masing-masing dihias ku rarantean anu dijeujeut,

¹⁸jeung ku dua jajar dadalimaan tambaga.

¹⁹Mamakutaan teh dirupakeun kembang bakung, jangkungna masing-masing sameter dalapan puluh senti.

²⁰Ari diterapkeunana di opat pongpok pilar luhureun rarantean. Dina unggal puncak eta mamakutaan diterapan dadalimaan dua ratus siki, didua jajarkeun.

²¹Eta dua pilar tambaga ditempatkeunana ku Huram di hareupeun lawang Bait Allah, hiji di sisi kidul, dingaranan ”Yakin”, hiji di sisi kaler dingaranan ”Boas”.

²²Mamakutaan kembang bakung tambaga tea diterapkeunana dina puncak eta dua pilar. Kitu dijieunna eta dua pilar tambaga sarta geus jadi.

²³Geus kitu Huram nyieun hiji tatalagaan tambaga, bangunna buleud. Jerona dua meter dua puluh senti, garis tengahna opat meter opat puluh senti, kurilingna tilu belas meter dua puluh senti.

²⁴Handapeun biwir tatalagaan sakurilingna dipapaesan ku wawaluhan tambaga dua jajar anu dicitakna ngahiji jeung tatalagaanana.

²⁵Eta tatalagaan ditumpangkeun kana tonggong dua belas sasapian tambaga anu nyalanghareup ka luar, ka kidul, ka kaler, ka kulon, ka wetan, tilu-tilu.

²⁶Kandelna tatalagaan tujuh puluh lima senti. Biwirna siga biwir cangkir jebleh, niron lambaran kembang bakung. Eusi eta tatalagaan kira-kira opat puluh rebu liter.

²⁷Ti dinya Huram nyieun sapuluh padati tambaga, masing-masing panjangna sameter dalapan puluh senti, rubakna sameter dalapan puluh senti, luhurna sameter tilu puluh senti.

²⁸Dijieunna ku papan-papan pasagi sarta dipasangkeunana make wengku,

²⁹dipapaesan ku sisingaan, sasapian, jeung tiruan mahluk-mahluk jangjangan. Wengku-wengkuna make gambar timbul, gambar ranggeuyan mangle di luhureun jeung handapeun sisingaan jeung sasapian tea.

³⁰Kikipingna opat-opat tina tambaga, pupurusna oge tambaga. Di opat juruna make opat panyangga anu nanggeuy paso. Panyanggana dipapaesan ku gambar timbul ranggeuyan mangle.

³¹Tungtung panyangga paso tea diwengku ku hiji buleudan, luhurna tina beungeut padati opat puluh opat senti, ka handapna dua puluh dua senti, sakurilingna make ukiran.

³²Jangkungna kikiping genep puluh genep senti, tempatna handapeun papan-papan pasagi tea, pupurusna dihijikeun kana badan padati.

³³Bangun kikiping sakumaha bangun kikiping kareta biasa; pupurusna, pinggiranana, jari-jarina jeung bola-bolana, kabeh tambaga.

³⁴Dasar badan padati saban juruna make tihang pamageuh anu ngahiji jeung badan padati, jadi tihang pamageuhna opat-opat.

³⁵Unggal padati, di bagian luhurna dibiwiran sakurilingna, rubakna dua puluh dua senti, tihang pamageuhna kitu deui papan-papanna ngahiji kana badan padati.

³⁶Unggal lolongkrangna digambaran mukarabin, singa, jeung tangkal korma, sarta unggal gambarna beulah luhur jeung beulah handap digambaran ku ranggeuyan mangle.

³⁷Kitu dijieunna eta padati-padati teh, kabeh saukuran jeung sabangun.

³⁸Anggeus nyieun padati-padati, Huram nyieun paso tambaga sapuluh, hiji paso pikeun hiji padati. Gurat tengah masing-masing sameter dalapan puluh senti, pieusieunana masing-masing kira-kira dalapan ratus liter.

³⁹Eta padati-padati ku Huram ditempatkeunana lima di beulah kidul Bait Allah, lima di beulah kalerna. Tatalagaanana dipernahkeunana di juru Bait Allah beulah kidul wetan.

⁴⁰Kajaba ti anu tadi, Huram nyieun katel-katel, sosodok-sosodok, jeung pinggan-pinggan. Sakur parabot anu ku Raja Suleman dipiwarang dijieun pikeun kaperluan Bait Allah, kabeh geus anggeus dijieun ku Huram. Barang-barang anu dijieunna nya eta: Dua tihang gede. Dua mamakutaan anu jiga cangkir jebleh di puncak eta dua tihang. Rante lilit papaes mamakutaan. Opat ratus dadalimaan, anu dipasang dua jajar, papaes mamakutaan. Sapuluh padati. Sapuluh paso. Hiji tatalagaan. Dua belas sasapian anu munggu tatalagaan. Katel-katel, sosodok-sosodok, jeung garpuh-garpuh. Eta kabeh keur kaperluan Bait Allah anu dijieun ku Huram pikeun Raja Suleman.

⁴¹

⁴²

⁴³

⁴⁴

⁴⁵

⁴⁶Raja miwarang ngadamel eta barang-barang teh di pangecoran logam di Lebak Yordan anu pernahna antara Sukot jeung Sartan.

⁴⁷Tambaga anu dipake nyieun eta barang-barang ku raja teu kungsi ditimbang heula tina ku loba-lobana, jadi beuratna teu kanyahoan sabaraha-sabarahana.

⁴⁸Jeung deui Suleman miwarang ngadamel paparabotan tina emas pikeun Bait Allah. Nya eta: altar, meja paranti nyuguhkeun roti ka Allah,

⁴⁹sapuluh suku lampu paranti di hareupeun Kamar Pangsucina, lima di kidul lima di kaler, kembang-kembang, lampu-lampu, cacapit,

⁵⁰pinggan-pinggan, panetel-panetel lampu, bokor-bokor, pisin-pisin wadah seuseungitan, parukuyan-parukuyan, piring-piring wadah ruhak, engsel-engsel panto Kamar Pangsucina jeung engsel-engsel panto Bait Allah beulah luar. Eta kabeh dijieunna tina emas.

⁵¹Sanggeus Suleman anggeus ngadamel eta Bait Allah, barang-barang anu ku Daud ramana geus disanggakeun ka PANGERAN, ku anjeunna disimpen di kamar rajabrana Bait Allah, boh anu tina perak boh anu tina emas, kitu deui barang-barang salian ti eta.