Read Boros Dusun 2 RAJA-RAJA 14 Bible Online

2 RAJA-RAJA 14 - Boros Dusun bible

2 RAJA-RAJA 14

¹Amasia putra Raja Yoas jadina raja nagara Yuda dina taun kadua Yoas putra Yoahas ngarajaan nagara Israil,

²dina yuswa dua puluh lima taun. Calikna di Yerusalem, ngarajaanana dua puluh salapan taun. Jenengan ibuna Yoadan, urang Yerusalem keneh.

³Lampahna matak pikamanaheun PANGERAN, ngan teu saperti Raja Daud karuhunna. Anjeunna cara ramana bae,

⁴henteu ngagempur tempat-tempat pangibadahan ka brahala; rahayat masih keneh ngalurban jeung ngarukus di tempat-tempat kitu.

⁵Sanggeus Amasia ngaraos yen kakawasaanana geus nanceb, teu talangke deui ngahukum paeh ponggawa-ponggawa anu nelasan Raja Yoas ramana.

⁶Tapi henteu terus maehan ka anak-anakna, sabab anjeunna tunduk kana timbalan PANGERAN anu kaungel dina Hukum Musa, yen: ”Bapa teu meunang dihukum paeh ku karana kajahatan anakna; anak teu meunang dihukum paeh ku karana kajahatan bapana; sing saha anu jahatna, eta anu kudu dihukum paeh.”

⁷Di Lebak Uyah Amasia numpes 10.000 serdadu urang Edom, ngarebut kota Sela, sarta eta kota diganti ngaranna jadi Yoktel, nepi ka kiwari.

⁸Sanggeus kitu Amasia ngintun utusan ka Yoas raja Israil, nangtang perang.

⁹Tapi ku Raja Yoas diwaler kieu, ”Sakali mangsa di Pagunungan Libanon, tangkal cucuk ngirim pamenta ka tangkal kiputri, pokna, ʼAnak awewe andika ku kula rek dipenta keur pibojoeun anak kaula.ʼ Pareng aya sato leuweung ngaliwat, tangkal cucuk teh kaidek.

¹⁰Beu Amasia, ulah kena-kena geus bisa ngelehkeun urang Edom! Benerna geus mashur mah enggeus masing jongjon di imah. Keur naon ngusik-ngusik pibalaieun, anu temahna andika jeung rahayat cilaka?”

¹¹Tapi ku Amasia teu didangu. Ku sabab kitu Raja Yoas jengkar nyandak balad ka wewengkon Yuda, teras merangan di Bet Semes.

¹²Balad Amasia eleh, prajuritna kalabur ka saimah-imahna.

¹³Amasia ku Yoas ditangkep jeung dicandak ka Yerusalem. Sumping ka Yerusalem, Yoas ngarugrugkeun kuta nagara ti semet Gapura Epraim nepi ka Gapura Juru, panjangna kira-kira dua ratus meter.

¹⁴Emas perak anu kapendak ku Yoas dicandak, kitu deui paparabotan Bait Allah jeung rajabrana karaton kabeh dirampas, dicandak mulih ka Samaria. Malah nyandak sandera sababaraha urang.

¹⁵Carita Yoas salian ti eta, kitu deui kagagahanana waktu perang ngalawan Amasia raja Yuda, kaungel dina Kitab Babad Raja-raja Israil.

¹⁶Sanggeus Yoas pupus jeung dikurebkeun di makam karajaan di Samaria, Yarobam II putrana ngagentos jadi raja.

¹⁷Sanggeus Yoas raja Israil pupus, Amasia raja Yuda masih keneh ngarajaan lima belas taun.

¹⁸Carita Raja Amasia salian ti eta kaungel dina Kitab Babad Raja-raja Yuda.

¹⁹Sanggeus kitu di Yerusalem aya anu sakait rek nelasan Amasia. Amasia kabur ka Lakis. Tapi ku musuhna diudag nepi ka beunang, tuluy ditelasan di dinya.

²⁰Layonna dicandak kana kuda ka Yerusalem, tuluy dimakamkeun di makam karajaan di Kota Daud.

²¹Ti dinya urang Yuda ngamakutaan putrana anu yuswana genep belas taun, nya eta Usia, dijadikeun raja.

²²Sanggeus ramana pupus, Usia hasil ngarebut deui kota Elat jeung ngomean eta kota.

²³Yarobam II putra Yoas jadi raja nagara Israil dina taun kalima belas Amasia putra Yoas ngarajaan nagara Yuda. Calikna di Samaria, ngarajaanana opat puluh hiji taun.

²⁴Lampahna nirca ti PANGERAN, nurut kana kajahatan Raja Yarobam bin Nebat saheulaeunana, anu mawa Israil kana dosa.

²⁵Anjeunna meunangkeun deui sakabeh wewengkon Israil, ti kalerna mimiti ti jalan ka Hamat, ka kidulna nepi ka Laut Paeh, tinekanan sakumaha jangji PANGERAN Allah Israil anu diandikakeun ka abdi-Na, Nabi Yunus bin Amitai ti Gat Heper.

²⁶Katingali ku PANGERAN yen urang Israil kacida balangsakna turug-turug teu aya pisan anu nulungan.

²⁷Ku Mantenna ditulungan ku jalan Raja Yarobam II, sabab ngahukumna lain pikeun salalawasna, lain supaya urang Israil tumpur sama sakali.

²⁸Carita Raja Yarobam II salian ti eta, hal kagagahanana dina perang, jeung hal anjeunna mulangkeun Damsik jeung Hamat jadi deui bawahan nagara Israil, kaungel dina Kitab Babad Raja-raja Israil.

²⁹Anjeunna pupus, dimakamkeun di makam karajaan di Samaria, sarta Jakaria putrana ngagentos jadi raja.