Read Boros Dusun 1 BABAD 13 Bible Online

1 BABAD 13 - Boros Dusun bible

1 BABAD 13

¹Raja Daud barempag jeung opsir-opsir nu nyangking sarebu prajurit jeung nu saratus prajurit.

²Sanggeus kitu anjeunna ngembarkeun ka sakumna bangsa Israil, ”Saupama maraneh rempug, jeung saupama ieu maksud sapagodos jeung pangersa PANGERAN Allah urang, hayu urang nitahan para utusan ka ditu ka dieu, ngondangan dulur-dulur sabangsa anu tinggal, kitu deui para imam jeung urang Lewi di desa-desana, sina ka darieu.

³Geus kitu urang nyokot Peti Perjangjian Allah anu geus lila kateler-teler ti wates Raja Saul.”

⁴Jalma rea nyatujuan, malah galumbira.

⁵Gancangna Daud geus ngumpulkeun urang Israil ti ditu ti dieu, ti kidul ti semet Walungan Sihor wates Mesir, nepi ka semet jalan anu bras ka Hamat di beulah kaler, diajak mindahkeun Peti Perjangjian ti Kiryat Yarim ka Yerusalem.

⁶Sanggeus kitu Daud angkat jeung jalma rea ka kota Baala, nya eta ka Kiryat Yarim di wewengkon Yuda, seja nyandak Peti Perjangjian Allah, anu ngagem jenengan PANGERAN, anu ngasta luhureun mukarabin.

⁷Seug Peti Perjangjian teh dikaluarkeun ti imah Aminadab, dimuatkeun kana padati anyar. Padatina diaping ku Usa jeung Ahio,

⁸dipirig ku Daud ngigel jeung jalma rea, tanda hormatna ka Allah, dibarung ku ngarawih jeung narabeuh kacapi, terebang, kecrek jeung tarompet.

⁹Barang narepi ka hiji panggilingan di Kidon, sapi anu narik padati teh tijalikeuh. Usa rikat nyanggap Peti Perjangjian sieuneun eta Peti tiguling.

¹⁰Tapi PANGERAN jadi bendu ka Usa dumeh nyabak eta peti, nepi ka Usa tiwas harita keneh di payuneun PANGERAN.

¹¹Daud kacida ngangresna ningali Usa tiwas ku bebendu PANGERAN, seug eta tempat teh ku anjeunna disebut Peres Usa, nepi ka ayeuna.

¹²Daud jadi kacida sieuneunana ku Allah, seug ngalahir, ”Kudu kumaha dibawana ieu Peti Perjangjian teh ku kami?”

¹³Tungtungna eta peti teh ku Daud henteu tulus dicandakna ka Yerusalem, ditunda di imah Obed Edom, asli urang Gat.

¹⁴Meunang tilu bulan ayana di dinya. Sajeroning kitu, saeusi imah Obed Edom jeung sagala pangabogana meunang berkah ti PANGERAN.