Read Boros Dusun 2 BABAD 10 Bible Online

2 BABAD 10 - Boros Dusun bible

2 BABAD 10

¹Rehabam angkat ka Sekem, sabab keur didaragoan di ditu ku urang Israil kaom-kaom kaler, rek dijenengkeun raja.

²Barang Yarobam bin Nebat anu keur aya di Mesir nyingkahan Raja Suleman, ngareungeu beja kitu, gancang bae mulang.

³Ku urang Israil kaom-kaom kaler anjeunna diala, ti dinya bareng nepungan Rehabam, tuluy mihatur kieu ka Rehabam,

⁴”Tanggungan anu ku tuang rama dikeunakeun ka kuring sadaya kacida ngaripuhkeunana. Manawi anjeun kersa maparin kaentengan malar hirup kuring sadaya ulah ripuh teuing, kuring sadaya seja satia jadi bawahan.”

⁵Waler Rehabam, ”Kaula menta tempo tilu poe rek nimbang-nimbang heula. Engke bae ka darieu deui.” Jalma-jalma terus budal.

⁶Rehabam mundut pituah para sesepuh urut jurunasehat Suleman, ramana. Saurna, ”Kumaha timbangan Bapa-bapa, jawab kumaha eta jelema-jelema teh?”

⁷Piunjuk para sesepuh, ”Upami Jeng Putra nembongkeun kahemanan, ngawaler ku nu pigenaheun hatena, tangtos maranehna bakal satia kumawula ka Jeng Putra.”

⁸Tapi eta nasehat para sesepuh teh ku anjeunna teu ditolih, anggur nepangan juru-juru nasehat nu diangkat ku anjeunna, barudak anu saumur jeung anjeunna.

⁹Saurna, ”Cik pirempug aranjeun kumaha hadena kuring teh? Jawab kumaha eta jelema-jelema anu marenta kaentengan teh?”

¹⁰Jawab maranehna, ”Saurkeun kieu, ’Cinggir kami leuwih gede ti batan cangkeng ama kami.’

¹¹Saurkeun deui kieu, ’Tanggungan maraneh ti ama kami memang beurat. Ku kami rek dijieun leuwih beurat. Maraneh ku ama kami disabet ku pecut, ku kami mah rek dibabukan ku pecut cucuk beusi!’ ”

¹²Sanggeus tilu poe tea, Yarobam jeung jalma loba ngadareuheus deui ka Raja Rehabam sakumaha pamundutna.

¹³Tapi raja lain nurut kana pituah para sesepuh. Ngawalerna ge keras,

¹⁴da nurutkeun timbangan anu ngarora. Saurna kieu, ”Ama kami mere tanggungan beurat ka maraneh. Tanggungan ti kami mah bakal beuki beurat. Ama kami nyabet ka maraneh ku pecut, kami mah arek ngababukan ku pecut cucuk beusi!”

¹⁵Jadi raja teh henteu malire kana pamenta eta jelema-jelema. Eta geus kitu dikersakeunana ku GUSTI Allah, sangkan laksana pangandika-Na ka Yarobam bin Nebat ku perantaraan Ahia jurupeleng ti Silo.

¹⁶Barang geus tetela yen pamentana ka raja teu dipalire, seug tinggorowok pokna, ”Rorod Daud saturunanana! Naon jasana ka urang? Eh urang Israil, baralik! Keun Rehabam mah sina kumaha karepna!” Jadi urang Israil teh barontak.

¹⁷Rehabam pada ninggalkeun, jadi raja ge ngan keur rahayat di wewengkon Yuda wungkul.

¹⁸Anggeus kitu Rehabam miwarang Adoniram anu keur ngamandoran jelema-jelema anu gawe paksa, dipiwarang nepungan urang Israil. Tapi tiwas pada ngabenturan ku batu. Sanggeus uninga kitu, clak Rehabam kana kareta, rurusuhan kabur ka Yerusalem.

¹⁹Ti harita rahayat karajaan Israil kaler ngalawan ka raja terah Daud.