Read Boros Dusun 2 BABAD 19 Bible Online

2 BABAD 19 - Boros Dusun bible

2 BABAD 19

¹Raja Yosapat, raja nagara Yuda salamet, tuluy mulih ka karaton di Yerusalem.

²Aya hiji nabi, Yehu bin Hanani, ngadeuheus ka raja, miunjuk kieu, ”Naha sae Gusti ngabantu ka nu jarahat, sabilulungan sareng anu mikageuleuh ka PANGERAN? Eta damel Gusti teh ngalantarankeun PANGERAN bendu ka Gusti.

³Untung sanaos kitu ge Gusti aya keneh saena, parantos nyingkir-nyingkirkeun arca-arca Asera sesembahan rahayat, sareng parantos sateka-teka nuturkeun pangersa Allah.”

⁴Najan calikna di Yerusalem, Raja Yosapat sok angger angkat-angkatan nepangan rahayat, ngider ti Bersyeba ti tungtung kidul nepi ka rarambu pagunungan Epraim di tungtung kaler, ngawawadian rahayat supaya marulang deui ka PANGERAN, Allah karuhun maranehna.

⁵Di kota-kota Yuda anu dibenteng, anjeunna ngangkat hakim-hakim

⁶kalawan timbalan kieu, ”Masing ati-ati nibankeun hukuman. Wewenang anu dijalankeun ku maraneh teh lain ti manusa, sategesna eta teh wewenang ti PANGERAN. Lamun maraneh nibankeun hukuman, Mantenna aya nungkulan.

⁷Masing sieun ku PANGERAN, ati-ati tata peta, sabab PANGERAN Allah maraneh moal ngantep ka anu curang atawa beurat sabeulah atawa daek nampa pangruruba.”

⁸Ari di Yerusalem, anu ku anjeunna diangkat jaradi hakim teh sawatara urang Lewi, sawatara imam, jeung sawatara jalma kokojo, purah nguruskeun jalma-jalma anu boga perkara ngalanggar Hukum PANGERAN, atawa memeres pacekcokan urang kota.

⁹Maranehna ku anjeunna ditimbalan kieu, ”Jalankeun kawajiban maraneh kalawan sieun ku PANGERAN, tuhu ka Mantenna dina sagala lampah.

¹⁰Satiap aya dulur sabangsa ti mana bae ngunjukkeun perkara anu tumali jeung urusan getih, atawa palanggaran-palanggaran hukum jeung papakon-papakon anu salian ti eta, ati-ati papatahan pilampaheun dina nandangan cocoba, ulah nepi ka maranehna nyieun kasalahan atawa dosa ka PANGERAN. Lamun henteu kitu, boh maraneh boh eta dulur sabangsa, bakal kacida dibenduanana ku PANGERAN. Lampahkeun kitu, sangkan maraneh ulah nyieun kasalahan.

¹¹Anu wenang mere putusan ahir dina urusan agama, Imam Agung Amarya. Anu wenang mere putusan ahir dina perkara perdata, Sebaja bin Ismail, gupernur Yuda. Urang Lewi tanggung jawab ngurus sangkan putusan-putusan pangadilan tea jalan sakumaha mistina. Sing parengkuh. Jalankeun ieu parentah. Mugia PANGERAN nyarengan pihak nu bener!”