Read Boros Dusun BUDALAN 2 Bible Online

BUDALAN 2 - Boros Dusun bible

BUDALAN 2

¹Aya hiji jelema kaom Lewi, nikah ka hiji istri sakaom keneh.

²Seug eta istri ngalahirkeun hiji anak lalaki. Orokna teh teuing ku kasep, tuluy disumputkeun. Sanggeus meunang tilu bulan,

³orok teh geus teu bisa disumput-sumput deui. Tuluy dipangnyieunkeun kandaga tina wawalinian, dibalur ku ter supaya teu asup cai. Sok orok teh diasupkeun kana eta kandaga, tuluy diteundeun di sisi walungan, di antara jujukutan anu jarangkung.

⁴Ceuceuna ngawaskeun ti kajauhan hayangeun nyaho kumaha orok teh pijadieunana.

⁵Putri raja sumping arek ngebak di walungan, inang-inangna leuleumpangan turut-turut sisi. Ret putri ningali aya kandaga di bunian ku jujukutan, seug dipiwarang dicandak.

⁶Kandaga dibuka, eusina orok. Orok teh gogoaran, putri ngahelas pok sasauran, ”Tangtu ieu teh orok urang Ibrani.”

⁷Torojol ceuceu eta murangkalih marek ka putri tuluy miunjuk, ”Kumaha upama ku abdi dipangmilariankeun awewe urang Ibrani anu nuju nyusuan?”

⁸”Enya, jig,” waler putri. Leos nyi lanjang indit, teu lila geus datang deui jeung ibuna murangkalih tea.

⁹Saur putri, ”Pangnyusuankeun ieu orok, engke ku kami digajih.” Murangkalih ku ibuna dibawa mulang, dirorok sakumaha biasa.

¹⁰Sanggeus rada ageung disanggakeun ka putri. Ku putri diangken putra. Ceuk putri dina manahna, ”Ieu budak ku kami dibedol ti cai. Ngaranna kudu Musa.”

¹¹Dina hiji poe sanggeus akil baleg Musa angkat nepangan bangsana, urang Israil. Katingalieun yen bangsana sakitu diteungteuinganana, digawekeun sakitu beuratna. Malah katingalieun aya urang Israil, bangsa anjeunna, anu dipaehan ku urang Mesir.

¹²Musa luak-lieuk. Sanggeus tetela yen moal aya anu nangenan, habek urang Mesir teh ku anjeunna dipaehan, mayitna diruang dina keusik.

¹³Poe isukna anjeunna ka dinya deui. Beh ningali dua jelema papada urang Israil keur garelut. Ku anjeunna dipisah, nu salahna dielingan, ”Ku naon ka bangsa sorangan mahala?”

¹⁴Eta jelema nambalang, ”Na maneh teh dunungan kami? Rek jadi hakim? Rek maehan deuih ka kami, cara kamari maehan urang Mesir?” Musa ngagebeg sarta ceuk panggalihna, ”Ana kitu perkara aing kamari maehan teh geus kautara!”

¹⁵Eta warta kadangu ku raja, seug raja ihtiar arek nelasan Musa. Tapi Musa ngejat manten ka tanah Midian, sarta rek terus matuh di ditu. Dina hiji poe Musa keur calik deukeut hiji sumur. Torojol aya mojang tujuhan, putra-putra imam di Midian anu jenenganana Yitro. Eta mojang-mojang tuluy narimba ngareusian jolang, rek nginuman domba-domba jeung embe-embe ramana.

¹⁷Torojol deui tarukang ngangon lalaki, mojang-mojang teh disuntrung-suntrungkeun. Ku Musa dibelaan, angonanana sina ngarinum.

¹⁸Ti dinya mojang-mojang teh baralik. Ku ramana dipariksa, ”Sinarieun bisa tereh baralik?”

¹⁹Tembalna, ”Dibantuan ku hiji urang Mesir, anu ngabelaan ngalawan tarukang ngangon, mangnimbakeun, sareng manginumankeun ingon-ingon urang.”

²⁰Saur ramana, ”Di mana ayeuna jelemana? Ku naon ditaringgalkeun? Teang, sina ka dieu urang ajak dahar.”

²¹Musa kersaeun diandeg sarta terus matuh. Saterusna ku Yitro ditikahkeun ka Sipora, putrana,

²²seug puputra, lalaki. Saur Musa sajeroning manah, ”Aing di dieu teh ngumbara. Jadi ieu budak ngaranna kudu Gersom.”

²³Geus kitu lawas ti lawas raja Mesir pupus. Tapi urang Israil mah angger bae ripuh, mani tingjarerit menta tulung, sasambat ka Allah.

²⁴Ku Allah kadangu sarta Mantenna emuteun kana perjangjiana- Na ka Ibrahim, Ishak, jeung Yakub.

²⁵Kasangsaraan urang Israil ku Mantenna katingali sarta diperhatoskeun.